Umwami w’u Buholandi yahishuye uburyo yamaze imyaka 21 atwara indege mu ibanga

Yanditswe na Mukaneza M.Ange
Kuya 18 Gicurasi 2017 saa 05:28
Yasuwe :
0 0

Umwami w’u Buholandi, Willem-Alexander yatangaje ko yamaze imyaka 21 ari umupilote mu ndege za sosiyete ya KLM, itwara abantu n’ibintu mu kirere.

Alaxander wimitswe muri Mata 2013, yavuze ko muri icyo gihe cyose yakoraga nk’umufasha w’utwara indege, kandi akabikora nibura kabiri mu kwezi.

Mu kiganiro n’ikinyamakuru De Telegraaf, umwami yatangaje ko gukora mu ndege byamufashaga kuruhuka mu mutwe no kuba agiye kure y’inshingano z’ibwami zitabaga zimworoheye.

Ati “Uba ufite indege, abagenzi n’ikipe muri gukorana, uba ufite inshingano zo kubareberera. Ntabwo ushobora gufata ibibazo byawe wakuye ku butaka ngo ubijyane mu kirere. Ushobora kubyikuramo, ukita ku kindi kintu. Ibi ni byo binduhura.”

Amabwiriza arebana no gukaza umutekano yashyizweho mu 2001, nyuma y’igitero cyo kuwa 11 Nzeri, cyagabwe ku muturirwa wa World Trade Center muri Amerika, yakumiraga abagenzi kwinjira mu mwanya wagenewe abatwara indege, yatumye nta wubasha kumumenya igihe yabaga yakoze.

Kuba kandi ngo yari umufasha w’umuplote byamuhaga amahirwe yo kuvugana n’abagenzi bitamusabye kubanza kuvuga izina rye.

Ati “ Inyungu irimo ni uko iteka nshobora kuvuga ko nifuriza buri wese ikaze mu izina ry’utwaye indege n’ikipe yose. Ku bw’ibyo rero si ngombwa kuvuga izina ryanjye, ariko akenshi burya abagenzi nta nubwo baba bateze amatwi.

Umwami willem-Alexander wanakoze no muri sosiyete ya Martinair, yatangiye gutwara indege mu myaka 30 ishize, ubwo yari akiri umunyeshuri.

Uku gukunda gutwara indege kwe byatumye mu myaka ya 1980 ajya muri Kenya, aho yakoraga nk’umukorerabushake mu kigo AMREF cyatangaga ubufasha mu buvuzi, nyuma yerekeza muri kindi cyita ku nyamaswa ‘Kenya Wildlife Service’.

Si umwami Willem-Alexander wagaragaje gukunda ibyo gutwara indege gusa, kuko n’igikomangoma Charles cyo mu Bwongereza n’abahungu be William na Harry bagiye batwara iza gisirikare.

Rimwe na rimwe iyo agiye mu ruzinduko rw’akazi, umwami wa Brunei, Sultan Hassanal Bolkiah na we ngo ajya gufasha abatwara indege.

Umwami yatangaje ko gukora mu ndege byamufashaga kuruhuka mu mutwe no kuba agiye kure y’inshingano z’ibwami zitabaga zimworoheye
Willem-Alexander yakoraga nk’umufasha w’utwara indege

angel@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza