Kwamamaza

Rurageretse hagati y’aba-démocrate na FBI

Yanditswe kuya 31-10-2016 saa 09:31' na Mukaneza M.Ange


Umwe mu bayobozi b’Ishyaka ry’aba- démocrate uri muri Sena ya Leta Zunze Ubumwe za Amerika, yavuze ko kuba umuyobozi w’Ibiro bishinzwe iperereza (FBI) yaratangaje ko hari gukorwa iperereza kuri email zifite aho zihuriye na Hillary Clinton wiyamamariza kuba Perezida ari ukwica itegeko.

Harry Reid yashinje James Comey, uyobora FBI kurenga ku itegeko ribuza abayobozi kwitwaza umwanya bafite bagakora icyo ari cyo cyose gishobora kugira ingaruka ku migendekere y’amatora.

Mu ibaruwa Reid yanditse, yavuze ko ibyo Comey yakoze bigamije gufasha aba-républicain kwigaranzura aba-démocrate.

Yanamushinje kandi kuba yaranze gushyira ahagaragara amakuru arebana n’umubano ukomeye uri hagati ya Donald Trump uhagarariye ishyaka ry’aba-républicain mu matora na leta y’u Burusiya kandi amaze igihe kinini amwandikiye abimusaba.

Ku wa Gatanu nibwo FBI yongeye kubyutsa ikibazo cya email zirimo ubutumwa burebana n’amabanga y’igihugu Hillary Clinton yohereje akoresheje mudasobwa ye bwite hagati ya 2009-2014 igihe yari Umunyamabanga wa Leta Zunze Ubumwe za Amerika. Ikibazo cyari cyararangijwe muri Nyakanga 2016 Clinton ahanaguweho icyaha.

Ni mu gihe habura ibyumweru bitageze kuri bibiri ngo amatora y’Umukuru w’Igihugu abe, FBI ikaba ivuga ko hari email z’umwe mu bakorana bya hafi na Clinton bagomba gukoraho iperereza.

BBC dukesha iyi nkuru ivuga ko email ibihumbi 650 ari zo zigiye gukorwaho iperereza, zirimo iz’uwitwa Huma Abedin bivugwa ko zavumbuwe muri mudasobwa ya Anthony Weiner wahoze ari umugabo we.

Izi email zabonywe ubwo hakorwaga iperereza ku byaha byo koherereza ubutumwa burebana n’ubusambanyi ku mukobwa utarageza imyaka y’ubukure, bishinjwa Weiner wahoze ari umudepite.

FBI ivuga ko izi email zishobora guhindura ibyari byagaragaye mu iperereza ku kuba Clinton yarakoresheje mudasobwa ye bwite mu kohereza no kubika ubutumwa burebana n’amabanga y’igihugu.

Ku cyumweru nibwo hamenyekanye andi makuru ko Ibiro bishinzwe ubutabera byari byabujije FBI kumenyesha Inteko Ishinga Amategeko ibijyanye n’iri perereza rishya.

Iki gitekerezo cyamaganiwe kure na Donald Trump uhanganiye intebe y’Umukuru w’Igihugu na Hillary Clinton, avuga ko kigamije guhishira ibyaha byakozwe na Hillary Clinton.

Amatora muri Leta Zunze Ubumwe za Amerika ateganyijwe ku itariki 8 Ugushyingo 2016.

Ubushakashatsi ku mukandida uhabwa amahirwe muri aya matora (polls) bwakozwe n’ibinyamakuru ABC News na Washington Post bugaragaza ko Hillary Clinton ashyigikiwe ku kigero cya 49% mu gihe Donald Trump ari kuri 46%.

Abashyigikiye Hillary Clinton barashinja FBI gushaka kubogamira ku barwanashyaka ba Trump

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved