USA :

USA : "Lisiti z’abatunze imbunda zishobora gukoreshwa nk’izakoreshejwe hicwa Abatutsi"


Yanditswe kuya 14-04-2013 - Saa 10:52' na Richard Dan Iraguha

Muri iyi minsi muri Leta Zunze Ubumwe za Amerika hari impaka ku mushinga w’itegeko rigenga gutunga imbunda ku baturage, hagakorwa lisiti y’abazitunze mu gihugu hose, bamwe mu bagize Kongere ya Amerika bashyigikiye uwo mushinga ariko abandi ntabwo bemera izo mpinduka.

Abashyigikiye uwo mushinga bavuga ko bizafasha Amerika kugenzura ikoreshwa ry’intwaro mu rwego rwo kugabanya ibyaha. Ariko Jeff Duncan umwe mu bagize Kongere ya Amerika yamagana uwo umushinga w’itegeko ryo kubarura abatunze n’abakoresha imbunda muri Leta Zunze Ubumwe z’Amerika, akaburira Leta ye ko ayo malisiti ashobora kwifashishwa kimwe na listi zakoreshejwe hicwa Abatutsi muri Jenoside mu Rwanda.

Duncan agereranya kubarura abatunze imbunda muri Amerika, nk’ibarura ryakozwe mu Rwanda mu mugambi wa Jenoside, bityo agasanga ayo malisiti y’abatunze imbunda akozwe muri Amerika, ashobora kuzifashishwa n’abagizi ba nabi bagakora ikibi.

Ku rukuta rwe rwa Facebook Duncan yagize ati “Soma amateka ya Jenoside yo mu Rwanda. Urasanga Abatutsi bose barasabwe na Leta yariho kwibaruza n’aho babarizwa ndetse iyi myirondoro iza kwifashishwa mu kumenya aho buri mututsi wese yarimo abarizwa ngo yicwe.

Kuva guverinoma yari ifite amazina n’imyorondoro ndetse n’aho buri mututsi wese yabarizwaga mu Rwanda (mwibuke ko buri munyarwanda yari afite indangamuntu igaragaza ubwoko bwe niba yari umututsi, umuhutu cyangwa se umutwa) abicanyi babashije kugenda bica Abatutsi umuryango ku wundi”.

Duncan yongeraho ati “Ntanze uru rugero kugira ngo ngaragaze ko kubarura abatunze imbunda bishobora gutera ingaruka mbi cyane.”

Kuba hari bamwe basanga gukora listi y’abatunze imbunda ari kimwe mu byafasha gukumira ibyaha, Duncan we si uko abibona.

Avuga ko ubutegetsi bwa Amerika bugomba gushyiraho ingamba zo kugabanya ibyaha, no gucunga umutekano, bagahangana n’abakora ibyaha kandi bakabahana, aho kwambura abantu uburenganzira bwabo bwo kwirinda.

Agira ati “Reka dufate abanyabyaha, reka dufate abakora ibyaha bakoresheje imbunda, ariko tureke itegeko riha abaturage ba Amerika uburenganzira shingiro.”
Duncan avuga ko kubarura abantu batunze imbunda atari cyo gishobora gukumira ubwicanyi agatanga urugero nk’ubwabaye mu mujyi wa Newtown mu 2012 (ubwicanyi bwahitanye abantu 28 harimo abana 20) cyangwa ubwabaye mu mujyi wa Aurora (umuntu yishe abantu 3 abarashe, nawe araswa na polisi)
Ibi abishingiraho akavuga ati “Kurenganya imbunda ubwayo cyangwa isasu runaka” ku bwicanyi ubwo aribwo bwose “Ni nko kurenganya icyuma kicishijwe Nicole Brown Simpson (umugore wicishijwe icyuma mu mwaka wa 1994 mu mujyi wa Los Angeles) cyangwa se imihoro yakoreshejwe bica Abatutsi miliyoni mu Rwanda.”

Jeff Duncan avuga ko ibitekerezo bye byubakira ku bakurambere bashinze Leta Zunze Ubumwe za Amerika ari nabo bashyizeho Itegeko Nshinga rya mbere ry’igihugu, aho bavuga ko umuturage afite inshingano zo kwirinda no kurinda igihugu cye.

Ubusanzwe muri Leta Zunze Ubumwe za Amerika abaturage bemerewe gutunga, kugura no gucuraza intwaro, icyakora buri Leta ifite amategeko yayo yihariye agenga gutunga, gukoresha no gucuruza intwaro.

Jeff Duncan ari muri congere ya Amerika kuva mu mwaka wa 2011, ari mu ishyaka ry’aba Repubulikani akaba ahagarariye Leta ya carolina y’amajyepfo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO