USA: Trump asanga amatora akwiye gusubikwa agatangazwa nka Perezida

Yanditswe na Uwishyaka Jean Louis
Kuya 28 Ukwakira 2016 saa 10:24
Yasuwe : XX
0

Ubwo yari mu bikorwa byo kwiyamamaza muri Leta ya Ohio kuri uyu wa kane, Donald Trump yakerensheje mu ruhame Hillary Clinton bahanganye, avuga ko amatora ashatse atakwirirwa akorwa, ahubwo bakamutangaza nk’uwayatsinze.

Donald Trump yagize ati "Erega ubu mutekereze kuri jye jyenyine, dushobora gusubika amatora intsinzi tukayegurira Trump. Gahunda ze (Hillary Clinton) ni mbi cyane, mbese turatandukanye cyane.”

Ayo magambo asa n’asekeje, ayavuze mu gihe aherutse gutangaza ko ashidikanya ku migendekere myiza yayo ari na ko agenda asubira inyuma mu ikusanyabitekerezo ku matora.

Aha yavugaga ko itangazamakuru na bamwe mu banyapolitiki bakora iyo bwabaga ngo babe ari bo bagena uzayatsinda, ari na bwo yabwiye abarwanashyaka be ko ubutegetsi bwabo bushobora kwibwa bicishijwe mu buriganya mu matora.

Trump akomeje kuza inyuma ya Hillary Clinton mu ikusanyabitekerezo ku matora ku rwego rw’igihugu ndetse no muri Leta z’ingenzi zishobora gutuma umukandida atsinda.

Fox News iherutse gutangaza ko Clinton afite amahirwe yo gutsinda amatora ku kigero cya 49%, mu gihe Trump we afite 44%.

Ayo magambo Trump ayavuze nyuma y’aho aherutse kugaragaza Hillary Clinton nk’umunyantege nke, aho yabajije abarwanashyaka be ati “Ni nde munyantege nke kurusha undi hagati ya Jeb Bush (wikuye mu byo guhagararira Aba-Republicain mu matora) na Hillary Clinton?” Iyo mbaga yahise isubiza ko ari Hillary Clinton.

Trump yari yabanje kuvuga ko Jeb Bush ari umunyantege nke ubwo yari agifite amahirwe yo kuba ari we utoranywa guhagararira ishyaka ry’Aba-Republicains mu matora y’ibanze, nyuma aza no kuvuga ko Hillary Clinton nta ntege afite zo kuba yayobora nka Perezida. Ibi yongeye kubishimangira kuri uyu wa Kane agaragaza ko Hillary Clinton ari umunyantege nke cyane.

Nubwo Trump yakomeje kwibasira Clinton amushinja ubushobozi buke mu kuyobora iki gihugu cy’igihangange, Clinton na we ntiyicecekeye kuko yamushinje kurangwa n’ivanguraruhu no kuvuga amagambo y’urukozasoni ku gitsina gore, byakurikiwe n’ubuhamya bwa bamwe mu bagore bemeje ko yashatse kubafata ku ngufu, ibirego yamaganiye kure avuga ko bigamije kumwangiriza isura mu matora.

Amatora y’umukuru wa Leta Zunze Ubumwe za Amerika, ateganyijwe kuba ku wa 8 Ugushyingo.

Trump asanga amatora akwiye gusubikwa bakamutangaza nk'uwayatsinze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza