USA: Trump yagaragaje uburakari mu kiganiro n’abanyamakuru yatumije atunguranye

Yanditswe na Jean Pierre Tuyisenge
Kuya 17 Gashyantare 2017 saa 01:35
Yasuwe : XX
0

Perezida wa Leta Zunze Ubumwe za Amerika, Donald Trump, yagaragaje amarangamutima adasanzwe ubwo yavugaga ku makuru amaze iminsi amuvugwaho ko yakoranye n’u Burusiya mu gihe yiyamamazaga, avuga ko ari ukubeshya.

Ibi yabitangarije mu kiganiro yagiranye n’Abanyamakuru kuri uyu wa Kane cyamaze isaha n’iminota 15.

Trump yahakanye ibyagiye bivugwa ko yakoranye n’u Burusiya igihe yiyamamazaga ashimangira ko nta gahunda n’imwe yigeze agirana n’iki gihugu.

Yagize ati "Icyo kibazo nakunze kugisubiza cyane, nta gahunda nagiranye n’u Burusiya, nta deni mfitanye nabo nta na gahunda dufitanye, ni amakuru y’ibinyoma.’

CNN dukesha iyi nkuru ivuga ko Trump yagize uburakari bukomeye bidasanzwe bigaragara kuri Perezida cyane igihe ari mu ruhame.

Yagize ati “Sinigeze mbona ibitangazamakuru bitangaza amakuru apfuye nk’ibivuga kuri politiki. Nibyo amakuru menshi ni ibinyoma.”

Yanenze ibitangazamakuru byatumye uwari umujyanama mu by’umutekano w’igihugu Michael Flynn yegura ku wa 13 Gashyantare 2017

Trump yavuze ko imvugo ye itagamije gusebya cyangwa gusenya igitangazamakuru icyo ari cyo cyose, yemeza ko yiteguye ko ubutumwa yatanze bushobora gusobanurwa ukundi mu itangazamakuru.

Ati”Ejo uzasanga bavuga ngo Donald Trump yatutse itangazamakuru, nta bibi mvuze, gusa ndabivuze namwe murabizi ntimuri beza, sindi kubatuka gusa ndi mu bihe byiza byo kubibabwira.”

Abari hafi ya Trump bavuga ko icyo kiganiro cyabaye ari we ubyitekerereje ijana ku ijana kuko yabyutse ajya mu biro bye abwira abamufasha ati “ Uyu munsi dukore ikiganiro n’abanyamakuru.”

Uko Trump yagaragaraga byerekanaga ko yari arakaye bidatewe n’inama y’abanyamakuru cyangwa ibyo yari afite byo kubwira abanyamerika ahubwo ari ibivugwa kuri guverinoma ye.

Ati “ Sinanga inkuru mbi iyo ivuga ukuri, ariko ndwanya ibivugwa kuri guverinoma yanjye.”

Trump yatanze urugero ku kuntu itangazamakuru ryatangaje umwanzuro we wo gukumira abaturage baturuka mu bihugu birindwi by’abayisilamu, icyemezo cyateje impagarara ku kibuga cy’indege mbere y’uko giteshwa agaciro n’urukiko rw’Ubujurire muri icyo gihugu.

Yatangaje ko icyemezo cyafashwe n’urwo rukiko ari kibi cyane ariko yizeza ko itegeko rishya agiye gushyiraho rirebana no gukumira abimukira rizajyana n’icyemezo cy’urwo rukiko bimuha kwizera ko kizashyirwa mu bikorwa.

Trump yashimangiye ko nta gahunda yigeze agirana n'u Burusiya ubwo yiyamamazaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza