Yemen: Nyuma y’Ababikira bakomoka muri Afurika, Abanyesomaliya 42 bishwe barashwe

Yanditswe na Jean Luc K. Mugisha
Kuya 18 Werurwe 2017 saa 01:28
Yasuwe :
0 0

Abaturage bakomoka muri Somaliya 42 biganjemo abagore n’abana, bahitanywe n’amasasu bamishijweho mbere y’uko bafata urugendo rwerekeza ku Nyanja Itukura.

Nk’uko byatangarijwe i Genève ku cyicaro cya OIM, Umuryango Mpuzamahanga wita ku bimukira, ubwo bugizi bwa nabi bwabereye Hodeida mu burengerazuba bwa Yemen, umujyi uyobowe n’aba-chiites b’aba-Houthis.

Joel Millman, Umuvugizi wa OIM, yatangarije AFP ko 35 mu bandi bimukira bakomeretse bari mu bitaro byo muri ako gace. AFP yemeje ko yabonye amakuru avuga ko abo baturage batahitanywe n’igitero cy’indege ahubwo barashwe.

Abandi bimukira babashije gucika amasasu bajyanywe gufungirwa muri gereza nkuru ya Yemen.

Saba, Ibiro Ntaramakuru biri mu maboko y’aba-Chiites byatangaje ko abo baturage bakomoka muri Somalia bahitanywe n’igitero cy’indege kiyobowe na Arabia Saoudite, igihugu kiyoboye urugaga rw’ingabo zihanganye n’uwo mutwe witwaje intwaro.

Jeune Afrique ivuga ko bitaramenyeka neza niba abo baturage bakorewe ubwicanyi bifuzaga kuba muri Yemen cyangwa bari mu rugendo rwerekeza mu bihugu by’u Burayi banyuze muri Yemen.

Nubwo Yemen imaze igihe iri mu ntambara ikomeje kwakira impunzi nyinshi zo mu ihembe ry’Afurika zihunga imibereho mibi izugarije.

Si ubwa mbere abanyafurika bicirwa muri Yemen, kuko ku itariki 4 Werurwe umwaka ushize, ababikira bane biciwe muri icyo gihugu barimo abanyafurika batatu; abanyarwandakazi babiri, umunyakenyakazi n’undi ukomoka mu Buhinde.

Mu ntangiriro z’uku kwezi OIM yatangaje ko "abimukira 22 bakomoka muri Afurika yo munsi y’Ubutayu bwa Sahara, biciwe Sabratha muri Lybia nyuma yo kwanga kujya mu bwato bwerekeza i Burayi ku ngufu".

Impunzi z'Abanya-Somalia zishwe zikuwe mu bwato bwari ku cyambu cya Hodeida, mu mujyi uri mu maboko y'inyeshyamba z'aba- houthis(Ifoto ya Reuters)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza