U Bubiligi : Umunyarwanda Mabenga Jean Pierre ariyamamariza kuba Burugumesitiri

Umunyarwanda Mabenga Jean Pierre w’imyaka 41, ufite abana 2 n’impamyabushobozi ihanitse mu by’ubukungu na DES (Impamyabumenyi yihariye) mu gucunga umutungo akaba no mu ishyirahamwe nyarwanda DRB-Rugali mu Bubiligi ; ari mu bahatanira kuyobora komini ya Saint Gilles mu matora azaba tariki ya 14 Nzeri 2012.

Komini ya Saint Gilles izwi cyane no kuba ituwe n’abaturage baturuka mu bihugu 130 bitandukanye bikaba bimwe mu biranga ubukungu bwayo mu bijyanye n’imyumvire n’imibereho myiza, ikaba kandi ituwe n’abanyabugeni benshi (Artistes) ndetse ni imwe muri Komini zigize Umurwa mukuru w’u Burayi ari wo Bruxelles.

Uyu mugabo ufite ubwenegihugu bw’u Bubiligi yagiranye ikiganiro n’umunyamakuru wa IGIHE mu Bubiligi, Karirima Aimable Ngarambe.

IGIHE : Ni iki cyaguhaye imbaraga zo kwiyamamariza amatora ya komini utuyemo muri Saint Gilles mu mujyi wa Bruxelles ?

MJP : Icyatumye niyamamariza aya matora muri komini ntuyemo ni ukugira ngo ntange umusanzu mu kubaka iyi komini. Imigambi mfite muri make ni itatu :

Gukora ibishobotse byose kugira ngo urubyiruko ndetse muri rusange abadafite akazi babashe kukageraho dukoresheje neza ibyemezo byafashwe mu rwego rwo gutanga akazi.

Gufasha abikorera ku giti cyabo ndetse no gukangurira urubyiruko kwihangira imirimo. Icyo nakora ni ugusaba abayobozi bakongera imfashanyo n’ingufu muri urwo rwego.

Gufasha abaturage bashya binjiye cyangwa bimukiye muri komini kugira ngo babashe kugira uruhare mu mibereho myiza yabo n’abandi bahatuye kandi mu bwisanzure.

IGIHE : Kwiyamamaza kwawe harimo iyihe nyungu, ni iki bizakongerera birenze imirimo y’indi wakoraga ?

MJP : Kwiyamamaza kwanjye birerekana ko n’ubwo ntavukiye ino ko mfite ubushake ndetse n’ubushobozi mu gukorera igihugu ntuyemo kandi mfitiye ubwenegihugu. Ibyo bigatuma ngira agaciro muri komini ntuyemo, kimwe n’abandi bose baturuka mu bihugu bya kure nko muri Afurika n’ahandi

IGIHE : Ni ki wamarira Abanyarwanda batuye muri komini utuyemo uramutse utowe ?

MJP : Nindamuka ntowe, nzafasha Abanyarwanda batuye muri komini yanjye kandi mbikore nk’uko ngomba kubikorera buri muturage wa komini ntuyemo. Icyo binzafasha cyane ni uko Abanyarwanda bazanyisangaho, bansaba nk’inama cyangwa se tukigana imishinga. Naho ubundi iyo uyobora cyangwa ukora politiki abaturage bose baba bareshya.

IGIHE : Kuba umukandida muri komini se birakomeye ?

MJP : Kuba umukandida muri komini muri rusange ugomba kuba uri mu ishyaka rya politiki ryakwemeye (ndi mu ishyaka rya politiki ryitwa CDH - Centre Democrate Humaniste), cyangwa se ukaba uri ku ilisiti yasinywe n’abaturage nibura 100. Icyangombwa cyane ni ukugira ubushake n’ubushobozi mu kubaka komini utuyemo.

IGIHE : Nkawe w’umunyapolitiki ukurikirana ibibera mu RDC muri iki gihe, ubivugaho iki ?

MJP : Icyo mbona kandi nemeza ni uko ibibazo by’Abanyekongo bizarangizwa n’Abanyekongo ubwabo. Ak’imuhana kaza imvura ihise. Icyo nifuza ni uko ibibazo bya Congo byarangira vuba maze mu karere k’ibiyaga bigari hakaza umutekano uhagije. Niba Congo isabye inkunga ibihugu by’abaturanyi, ikabikora ku mugaragaro kandi binyuze mu nzira z’ubufatanye, nta kwitana bamwana kwabaho.

IGIHE : Kuki wahisemo gukorera Politiki mu Bubiligi ntuyikorere mu gihugu cyawe cya kavukire cy’u Rwanda ?

MJP : Impamvu ni uko maze igihe ino kitari gito aho nageze tariki ya 12 Nzeri mu mwaka w’1993 naje nje kwiga mu ishuri rikuru rya gisirikare ryitwa “Ecole royale Militaire” riri hano i Bruxelles, nkaba narindangije amashuri yisumbuye mu Rwanda.

Nyuma ya Jenoside yakorewe Abatutsi nagumye ino, kuko ubuyobozi bw’ingabo zariho icyo gihe bwadusabye gutaha n’abandi banyeshuri twari kumwe, jye mbabwira ko ntashobora kujya mu bwicanyi n’intambara ntemera ni bwo ngumye mu Bubiligi, bituma ngenda ntanga umusanzu mu buryo nshoboye muri iki gihugu none ngeze aho niyamamaza nk’umunyapolitiki ku mwanya wa Burugumesitiri.

Ku kibazo cyerekeranye n’uko nakora politiki mu Rwanda, nk’uko maze kubisobanura imyaka maze hano impa ubumenyi bwo gusobanukirwa n’imibereho yaho mbese muri make maze kuhamenya kandi ndahakorera ariko igihe nikigera n’i Rwanda naho nahakorera Politiki.

IGIHE : Ni ubuhe butumwa waha Abanyarwanda mu bana muri DRB-Rugali hano mu Bubiligi ?

MJP : Ndabanza nshimire IGIHE ko mwampaye uyu mwanya hanyuma nsabe bazanshyigikire cyane muri aya matora cyane abatuye Saint Gilles n’inshuti zabo.

IGIHE : Murakoze

MJP : Namwe murakoze

Dore ubutumwa bwa Mabenga Jean Pierre yandikiye inshuti ze kuri Facebook :

“Nshuti, baturage ba Komini ya Saint Gilles namwe nshuti z’abahatuye, mbatumiye mu matora ya Komine yacu tariki ya 14 Nzeri 2012, mbasaba no kuzantora kuri lisiti y’ishyaka ndimo CDH kuri N° 6, muzantore kuri N° 9 (Jean-Pierre MABENGA) kugira ngo tubashe guhindura imibereho ibe myiza kurushaho.”