Abakiri bato barasabwa gutera ikirenge mu cy’intwari z’u Rwanda

Abakiri bato barasabwa gutera ikirenge mu cy’intwari z’u Rwanda


Yanditswe kuya 15-01-2013 - Saa 14:27' na Vénuste Kamanzi

Mu gihe habura igihe gito ngo hibukwe intwari zitangiye igihugu, abakiri bato barasabwa kurebera ku rugero rw’intwari z’u Rwanda, bagakura bakora ibikorwa by’indashyikirwa byazatuma na bo bazajya bibukwa nk’intwari cyangwa bakambikwa imidari n’impeta z’ishimwe.

Ibyi byagarutsweho na Kalisa Edouard Umunyamabanga Uhoraho muri Minisiteri y’umuco na Siporo, mu kiganiro n’abanyamakuru cyabereye ku cyicaro cya Minisiteri kuri uyu wa Kabiri tariki ya 15 Mutarama, ikiganiro cyanitabiriwe n’uhagariye inteko y’ururimi n’umuco, ndetse n’ubuyobozi bw’urwego rw’igihugu rushinzwe Intwari z’igihugu, imidari n’impeta by’ishimwe, basobanura ibijyanye na gahunda yo kwibuka intwari muri uyu mwaka.

Nk’uko biteganijwe kuva tariki 23 kugeza 31 Mutarama uyu mwaka, ni icyumweru cyahariwe kuzirikana intwari z’igihugu, hazatangirwamo ibiganiro ku biranga intwari, ubuzima n’uburyo zitoranywa, gusobanura ibyiciro byazo, gushishikariza abanyarwanda kwihesha agaciro kagaragarira mu gukunda igihugu, kucyitangira, kwitangira abandi no kwigana ibikorwa byiza byaranze intwari.

Tariki ya mbere Gashyantare nk’uko bisanzwe ukaba ari wo munsi mukuru ku rwego rw’igihugu wo kwizihiza intwari z’u Rwanda, umunsi wahawe insanganyamatsiko igira iti “Ubutwari ni Ishingiro ry’Agaciro n’iterambere”.

Kalisa yakomeje asaba ko muri icyo cyumweru, ababyeyi bajya bazana abana babo mu biganiro, kugira ngo bazakurane umuco w’ubutwari.

Muri uyu mwaka ubuyobozi bw’urwego rw’igihugu rushinzwe Intwari z’igihugu, imidari n’impeta by’ishimwe bwavuze ko nta ntwari nshya zizatangazwa ndetse nta n’abantu bazambikwa impeta cyangwa imidari by’ishimwe bari baboneka bafite ibikorwa bibashyira muri ibyo byiciro, gusa ubushakashatsi bugikomeje.

Ni ku nshuro ya 19 uyu munsi ugiye kwizihizwa, harishimirwa ko ubu abanyarwanda benshi bamaze kwinjiza mu mico yabo ubutwari nko guhiga, kurwanya ikibi, kwikemurira ibibazo n’ibindi, n’ubwo n’ibigwari bitanga serivisi mbi, bihohotera abana n’ibindi na byo ntaho byagiye.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO