Imyaka 35 irashize Alexis Kagame wacukumbuye amateka y’u Rwanda atabarutse

Yanditswe na Philbert Girinema
Kuya 2 Ukuboza 2016 saa 09:43
Yasuwe : XX
0

Musenyeri Alexis Kagame, yabaye umuhanga udasanzwe, umwanditsi n’umunyamateka ukomeye, akibukirwa ku bitabo byuje ubuhanga yanditse n’ibisigo, birimo Indyoheshabirayi, Inganji Karinga, Umuririmbyi wa Nyiribiremwa, Isoko y’Amajyambere n’ibindi.

Yavutse kuwa 15 Gicurasi 1912 i Kiyanza mu Buliza, ni mu Karere ka Rulindo mu Majyaruguru. Mu myaka 69 y’ubuzima bwe, Kagame yasize umusanzu ukomeye asiga u Rwanda na Afurika bamumenye nk ’umunyamateka, Umuhanga mu ndimi n’Umuhanga mu byo gutekereza (filozofiya).

Ubuzima bwe mu buto

Kagame yakuze ari umuhanga haba mu bitekerezo no mu mivugire, yaje kuba inshuti ya hafi y’umwami Mutara III Rudahigwa waje no kumuha uburenganzira bwo gukusanya ibitekerezo by’abiru ngo abyandikemo igitabo.

Yatangiye kwiga mu Ishuri rya Leta Mbiligi Gatolika Ruhengeri mu 1925, icyo gihe yari afite imyaka 13. Yaharangije nyuma y’imyaka itatu mu 1928, asaba kujya mu iseminari nto i Kabgayi mu karere ka Muhanga mu 1929, aharangiriza mu 1933.

Yakomeje mu iseminari nkuru ari umuhanga mu buryo budasanzwe, kugeza abaye umupadiri mu 1941.

Alexis Kagame nk’umwanditsi

Mu 1943 nibwo Kagame yasohoye igitabo cye cya mbere cyagarukaga ku mateka y’u Rwanda yise Inganji Karinga, gikurikirwa n’ibindi byinshi bigaruka no ku busizi, agenda ahuza imyemerere gakondo n’ubuzima bwa gikirisitu, ingingo yanditseho cyane.

Alexis Kagame kandi yagiye akora inyingo nyinshi zirebana n’ubusizi nyabami.

Musenyeri Kagame yifashishije ibyiciro biboneka mu rurimi rw’Ikinyarwanda agaragaza ubuhanga bw’Abanyafurika mu mitekerereze, mu bushakashatsi bwamuhesheje impamyabushobozi y’ikirenga mu bya filozofiya muri Kaminuza ya Mutagatifu Gregoire i Roma, igitabo gishingiye ku iyigandimi nyarwanda, yise “La philosophie Bantu-Rwandaise de l’être”, hari mu 1956.

Agarutse mu Rwanda, yatangiye kwigisha mu iseminari asohora n’ibitabo byinshi, bitari ku mateka y’u Rwanda gusa, ahubwo bigera no ku rurimi rw’Ikinyarwanda.

Mu 1959 nyuma y’itanga ry’Umwami Mutara III Rudahigwa, ingoma ya Cyami yatangiye gusa n’ivaho, ariko Alexis Kagame we kubera ibitekerezo bikomeye yari afite ntiyagira ikindi kibazo, ahubwo ahabwa kujya kwigisha muri Kaminuza Nkuru y’u Rwanda ubwo yashigwaga mu 1963.

Icyo gihe kandi yari n’umwarimu muri Kaminuza y’Igihugu ya Zaire i Lubumbashi, ubu ni muri Repubulika Iharanira Demokarasi ya Congo, aho yigishaga amateka ya Afurika y’iburasirazuba n’iyo hagati.

Kuwa 5 Nyakanga mu 1979 yahawe na leta impeta y’ishimwe ubwo yagirwaga “Officier de l’ordre national des Grands lacs”, ndetse amaze kugirwa igisonga cya Musenyeri muri diyosezi ya Butare muri 1980, Papa Yahani Pawulo wa II yamugize Musenyeri w’icyubahiro ku ya 4 Nyakanga 1981, aba Musenyeri atyo nubwo atari umwepisikopi nk’abo tuzi ubu.

Kuwa 2 Ukuboza 1981 nibwo Musenyeri Alexis Kagame yitabye Imana aguye i Nairobi mu bitaro by’i Nairobi muri Kenya afite imyaka 69 aho yari yagiye kwivuza, ndetse umurambo we leta yishingira kuwuzana mu Rwanda kubera agaciro yari afite mu gihugu.

Kagame yabaye mu Nama y’Ubuyobozi bwa Rwanda-Urundi kuva muri 1956 kugeza ku bwigenge bw’u Rwanda.

Uretse ibihembo mpuzamahanga, kuwa 3 Nzeri 2014, Musenyeri Alexis Kagame yashyikirijwe igihembo n’Inteko Nyarwanda y’Ururimi n’Umuco cyiswe “Igihembo Cya Akademi”, cyashyizweho hagamijwe gushima abantu bakora ibikorwa by’indashyikirwa mu kubungabunga ubusugire n’iterambere by’ururimi n’umuco by’u Rwanda.

Musenyeri Alexis Kagame ni umwe mu bahanga u Rwanda rwagize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza