Inkomoko y’izina “Benimana, nk’irya kabiri ry’Abanyarwanda

Yanditswe na IGIHE
Kuya 17 Nyakanga 2018 saa 08:06
Yasuwe :
0 0

Abantu benshi bakunze kuvuga izina Benimana, abandi bakaryita abana babo, ndetse hari n’ababirimba mu ndirimbo no mu mvugo, abandi bakabisikanya mu ndamukanyo yabo ya buri munsi.

Nk’uko tubikesha igitabo “Intwari z’Imbanza, zubatse u Rwanda rugahamya igitinyiro” cyanditswe na Nsanzabera Jean de Dieu, inzobere mu busizi, umuco n’amateka y’u Rwanda, ryanabaye inkomoko y’Inshoberamahanga, igira iti “Imibereho ya Benimana, inzira zabo ni amabanga.”

Iki gitabo bucukumbuzi ku mvano yaryo kivuga ko Cyilima Rujugira ari umwe mu bami b’u Rwanda bahuye n’amakozere akomeye ya buriburi mu mateka y’u Rwanda, ariko yose akayitwaramo neza, ku buryo yagerageje kweyura ibihu byinshi byari bibuditse mu kirere cy’u Rwanda.

Yabaye umwe mu bami b’u Rwanda, bahanze ibintu byinshi byagendeweho mu mushinga wo kubaka u Rwanda, kugeza aho rugeze ubu, ni we wahanze umutima wo kwihagararaho, kwihesha agaciro, kwimakaza ubugabo, gutabarana no kwanga agasuzuguro mu Banyarwanda, mu buryo buhanitse buruta ubw’abami bamubanjirije, ndetse n’urwego ruhanitse rwo gukunda abaturage be mu rwego rw’ikirenga.

Yashyizeho imirongo migari y’ubwirinzi bw’igihugu ubwo yashyiragaho urugerero, ibyo yabikoze ubwo yabonaga Ibihugu byose bituranye n’u Rwanda byarusuzuguye mu buryo buhanitse bigashaka kururimbura burundu.

Mu gihe murumuna we Karemera Rwaka yari yarihaye Ingoma uwayirazwe ariwe Rujugira adahari, yaramusamye kuko atigeze yubahiriza imihango y’ubwiru mu iyimikwa rye no mu miyoborere ye, agatsinda yitwaga Karemera Rwaka kandi mu mazina y’abami b’u Rwanda iryo zina ritabamo, amaze kugera ku ngoma arahuma.

Rubanda bati “Ni Ingoma imurashe kuko atari we wayirazwe,” basubira mu bwiru, bemeza ko Rujugira agomba kugarukira Ingoma. Abiru bati “N’ubundi Ingoma ntiyari iyawe!!!”

Bihutiye kujya kubundura Rujugira wari warabundiye mu Bugesera bw’Abahondogo aho yari yarahunze se Mazimpaka washakaga kumwica nk’uko bivugwa mu mateka y’Ingoma z’Abami b’u Rwanda.

Burya ngo “Uko inkima irushaho kurira, niko barushaho kuyirunguruka,” mu myaka 16 Karemera Rwaka yamaze ku ngoma, ibihugu by’Amahanga byari bikikije u Rwanda (u Bugesera bw’Abahondogo, u Burundi, Gisaka cy’Abazirankende na Ndorwa) byarimo gukengura intege nke ze mu mitegekere y’igihugu, bigahora bimugenzura umunsi ku wundi ari na ko bijya inama yo guhuza umugambi wo kurukuraho burundu, kuko icyo gihe rwari rumaze kuruta kure ibyo bihugu runabirusha amaboko ashingiye ku baturage, ku butunzi nk’Inka n’Ingabo zatojwe gukunda igihugu no kukirwanirira.

Rujugira aho yari abunze mu Bugesera, uwo mugambi yarawumvaga, akawutega amaso ngo azarebe iherezo ryawo, nuko igihe cye cyo kubunduka ngo ajye kwima Ingoma ya se Mazimpaka kiragera, kigera umugambi wo gutera u Rwanda nawo waramaze kunozwa.

Muri icyo gihe cye, abo bami b’ibihugu bikomeye bategekaga ni:

Kimenyi IV Getura, wategekaga i Gisaka cy’ Abazirankende

Gahaya II Muzora, wategekaga Ndorwa y’ Abashambo

Nsoro III Nyamugeta, wategekaga u Bugesera bw’Abahondogo

Mutaga III Sebitungwa, wategekaga u Burundi

Rujugira yarabundutse agera i Rwanda bamuha Inyonga aba umwami uganje mu rwa Gasabo. Akimara kwima Ingoma, yahise akubita agatima ku makuru afitiye gihamya y’ibihugu bigiye kumutera, nibwo atekereje uburyo ibyo byishyize hamwe bifite amaboko, asanga bizanyukanyuka abaturage be ntihagire n’usigara wo kubara inkuru, nuko yigira inama ati “Mu Rwanda nta kibuga gihari cyo kurwaniramo ngo batwangirize igihugu, abaturage n’umutungo tumaze kugeraho, reka biriya bihugu tubitange ku nkiko zabyo, azabe ariho urugamba ruremera, icyo gihe kandi tuzabahashya tubaganisha mu iwabo kuko tuzaba turi hafi neza y’Inteko zabo, bizatworohera no kwambuka tujya mu bihugu byabo, bityo tuzaba twirinze ko hari ibyacu byakwangirika n’abaturage bacu bakahasiga ubuzina.”

Nuko Rujugira afata umugambi wo gushyira ingerero z’Ingabo nyinshi ku nkiko z’u Rwanda na Ndorwa mu Majyaruguru, ku nkiko z’u Rwanda n’i Gisaka mu Burasirazuba no ku nkiko z’u Rwanda n’u Bugesera bwari bwegeranye n’u Burundi mu Majyepfo y’i Burasirazuba ho ahashyira izikubye gatatu iz’ahandi kuko byari ibihugu bibiri bizaturuka mu cyerekezo kimwe.

Nyinshi mu ngabo z’Abarundi, zari zikambitse ku mugezi witwa Rwantambi, ahari hateganye n’urugerero rwa Nyaruteja ku ngabo z’u Rwanda mu majyepfo y’igihugu.

Urugerero rw’ingabo za Rujugira rwamaze igihe kitari gito, kugeza nubwo ingabo ze zabuze ibyo zirya, zakwicwa n’inzara zikarya ibyatsi byitwa “Imiheka” byakundaga kuboneka mu rugerero rw’i Mpanga ya Mageragere, ku musozi wa Gitabage.

Ahasaga mu wa 1691, nibwo urugamba rwaremye, Ingabo z’u Rwanda zihigika bidasubirwaho ibyo bihugu uko ari bine, abami babyo barahagwa, Ndorwa yo biyiviramo gutsindwa burundu n’Igikomangoma Ndabarasa cyari kiyoboye urugerero rwo ku nkiko z’u Rwanda na Ndorwa.

Muri icyo gitero cyabaye mu ntango y’ishyikirizwa ry’ibimenyetso bya cyami [Inyonga] kwa Rujugiro ahasaga mu wa 1691, cyahitanye Igikomangoma Gihana mwene Yuhi Mazimpaka wari murumuna wa Rujugira na Mutata II Sebitungwa w’i Burundi.

Kubera icyo gikorwa cy’ikirenga Rujugira yakoze cyo kurwanya ibihugu bine bikomeye akabitsinda, ni ho havuye imvugo igira iti “u Rwanda ruratera ntiruterwa,” iba ibaye inkomoko y’Insigamigani nshya ziyongera ku zari mu gihugu ku ngoma zamubanjirije.

Kwihagararaho, kwanga agasuzuguro no gukunda abaturage biba umurage ndagwabuvivi na bugingo n’ubu mu Rwanda, bishimangiwe na Cyilima II Rujugira umuhungu wa Yuhi III Mazimpaka.

Umugani “U Rwanda ruratera ntiruterwa,” iyo uruteye nturutsinda, ahubwo rurakwanamiza rukagutsinda!!! Icyo gihe yifashishije Ingabo yashyize ku rugerero, yashoboye kwanamiza urwo rugamba maze ahigika u Burundi, ntibwongera kwaguka bugana mu Majyaruguru, atsinda i Gisaka n’u Bugesera.

Kuva icyo gihe uwo mugani washinze imizi mu buvanganzo bw’Abanyarwanda kugeza magingo aya. Igitero ibyo bihugu bine byagabye mu Rwanda, nicyo kizwi ku izina ry’Inzora mu mateka y’u Rwanda n’u Burundi.

Ntibyatinze Cyilima Rujugira agaba igitero mu Bugesera aratsindwa. Ubwo Ingabo yari ayoboye zari zimaze kubona ko zitsinzwe mu gitero zagabye mu Bugesera kandi zitaragishakiye intsinzi, zahise zifata Rujugira zimwambura umuheto we ngo adakomeza guhangana, nuko zikwira imishwaro zirahunga.

Cyilima yahise ahindukira bwangu na we atangira kwiruka amasigamana ngo ahunge, dore ko yari azi no kunyaruka akabanikira bigatinda. Mu gihe yarimo kwambuka umukoke ngo agere i Rwanda, yateye ikirenge hakurya, igisinde kiramurimbukana, aba aguye mo atyo!!!

Ako kanya Nsoro, Umwami w’u Bugesera wari ubakurikiye yahise ahasesekara, arebye uwo muntu waguye mu mukoki, asanga ni Rujugira, ahita yibuka ko bakiri abasore bombi bakundanaga ndetse akaba yaranamwibye umugono ahugiranye akamutwara umugore witwa Kalira wari mwiza cyane bombi barambagizaga, ahita agira umutima wa mpuhwe.

Nuko ahita ayora ibyatsi by’imbagara byari hafi aho abimurundumuriraho mu rwego rwo kwanga ko Ingabo ze zitwaga Imanzi zamuhingukiraho zikamwica. Nuko Nsoro amaze kugira atyo, ahindukirira Ingabo ze aziyobya ibirari, ati “Ba sha, nimuze twigendere Rujugira ni umuhanya araducitse.”

Bamaze kurenga Rujugira yapfupfunutse muri ibyo byatsi akenguza ngo arebe uko yava muri uwo mukoke nuko avamo yishimye ko arokotse, agenda abitekerezaho kugeza ubwo atoboye aravuga ati “Aho umugabo aguye uteraho utwatsi,” bishatse kuvuga ko ubugabo ari magirirane, ibyago by’umugabo abikurwamo n’abandi. Uwo mugani warahamye mu muco w’Abanyarwanda kugeza magingo aya.

Ubwo Cyilima Rujugira yatahukaga ageze mu rugo rwe rwari ku Gisozi agasanga Ingabo ze zacuze umwijima zibaza uko byagendekeye Sebuja, zibonye ahingutse zitangira kuvuga ibyivugo by’intsinzi, nuko arabacecekesha n’ijwi rituje ati “Imana iruta Imanzi,” kuko yankijije iza Nsoro, Umwami w’u Bugesera igihe mwari mwampanye, Imana iruta Imanga, mwebwe ngabo zanjye mwampanye nkirasanira kugeza magingo aya mvuye ku rugerero, Imana iruta Ingabo zose (yashakaga kuvuga Imanzi z’u Bugesera n’Imanga z’u Rwanda) kuko yazinkuye mu maboko nkaba ngifite impagarike n’ubugingo.

Bitewe n’amakozere Rujugira yahuye na yo ku ngoma ye, cyane cyane mu gitero cya biriya bihugu bine byifatanyije bikamutera akabitsinda, akongera kandi akarokoka igitero cy’ubushotoranyi yari yagabye mu Bugesera, akagikizwa n’imbaraga zikomeye, akava mu nzara z’Imanzi za Nsoro, yahise arushaho gusubira mu mateka y’abami b’u Rwanda, uburyo igihugu cyavutse, uko kirimo kwaguka umusubizo, n’ibitero by’inkazi bagiye bacamo kandi bakabirokoka.

Asoje iryo sesengura rye, nibwo yashyize ubuvumbuzi bwe ku mugaragaro ko Abanyarwanda ari Abana b’Imana yaremye ijuru n’Isi mu buryo budasubirwaho, ko bakorana na yo, umunota ku munota, isegonda ku isegonda.

Cyilima Rujugira ni we wahanze Igisigo gikomeye mu mateka y’u Rwanda, cyuje imvugo ihanitse aho yagize ati “Imana yirirwa ahandi, igataha i Rwanda”. Muri icyo kibariro, nibwo yahanze izina rya kabiri ry’Abanyarwanda, aho yabise “Benimana” akimara kubitangaza, ahita ahanga n’inshoberamahanga iherekeza iryo zina, yaje no kuvamo umugani w’ibihe byose, nuko agira ati “Imibereho ya Benimana, inzira zabo ni amabanga.”

Ubwiru bw’Abanyarwanda n’ibanga ry’inkomoko y’intsinzi bahorana, ritangira guhugukirwa n’amahanga, batangira kubona Abanyarwanda nk’abandi bandi batari bagenzi babo, igitinyiro cyabo, gitangira kwigaragariza amahanga, iyo mvugo na yo yamamara mu Banyarwanda hose, bayigira iy’ikirango cyabo.

Iyo umunyarwanda yaciraga umunyamahanga uriya mugani, agira ati “Imibereho ya Benimana, inzira zabo ni amabanga’’ yahitaga ashaka uburyo bwose yahikura, kuko yumvaga ko ikigiye gukurikiraho ari ukuzingira agafura. Abanyarwanda burya ni Benimana, kandi imibereho yabo, inzira zabo ni amabanga!


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza