Ruhango : Umuvuzi gakondo yafashe umurwayi we ku ngufu

Polisi mu Karere ka Ruhango, kuwa Kabiri yataye muri yombi umugabo w’umuvuzi gakondo wafashe ku ngufu umugore w’abandi. Ukekwaho iki cyaha witwa John Singirankabo ubu afungiwe kuri Sitasiyo ya Polisi ya Nyamagana.

Amakuru yizewe atangwa n’abatuye mu Murenge wa Ruhango, avuga uyu wafashwe ku ngufu (amazina ye ntiyatangajwe ku bw’impamvu z’umutekano we) yatumyeho Singirankabo mu nzu ye kugira ngo amuvure ikibazo cyo kuba amaze imyaka ibiri ashakanye n’umugabo we ariko akaba atarabyara. Singirankabo kandi yakiriwe n’umufasha w’uyu mugore wafashwe ku ngufu wahise ajya ku kazi mu kanya gato.

Urubuga rwa Polisi y’Igihugu dukesha iyi nkuru ruvuga ko nyuma y’isaha imwe bari kumwe, umugabo w’uyu wahohotewe yagarutse mu rugo asanga umugore we bamaze kumufata ku ngufu. Uyu muvuzi gakondo yari yateye uyu mugore umuti utuma ata ubwenge bita ‘Nyiramutarambirwa’.

Umugabo w’uyu mugore witwa Dusabimana ageze mu rugo yahise abafungirana mu nzu nyuma ahamagara abaturanyi be kugira ngo baze kumubera abahamya. Aho yahise yitabaza inzego za Polisi.

Uyu wafashwe ku ngufu yahise ajyanwa ku Bitaro bya Kabgayi aho yakorewe isuzuma ry’ibanze ryerekanye ko yafashwe ku ngufu. Hagati aho Singirankabo ahakana ko yakoze iki cyaha.

Nahamwa n’ibyo aregwa, Singirankabo azahanirwa ibyaha bibiri birimo gufata ku ngufu no kwitwaza umwuga agakora amahano. Icyaha cyo gufata ku ngufu nikimuhama azakatirwa igihano cy’igifungo kiri hagati y’imyaka 5 n’i 10 nk’uko biri mu ngingo ya 336 y’igitabo cy’amategeko ahana y’u Rwanda.

Ku kwitwaza umwuga we agakora amahano nibimuhama azakatirwa igifungo kiri hagati y’ukwezi kumwe n’imyaka ibiri nk’uko biri mu ngingo ya 217 y’igitabo cy’amategeko ahana.

Umuvugizi wa Polisi y’Igihugu, Supt. Theos Badege yasabye Abanyarwanda ko bajya bashaka abaganga b’inzobere aho kujya mu bavuzi gakondo.