Guverinoma ya Canada yategetse ko Padiri Nsengiyumva Juvénal yirukanwa muri Canada kubera gutwara yasinze, nyuma y’uko asimbutse koherezwa mu Rwanda acyekwaho ibyaha bya Jenoside yakorewe Abatutsi mu 1994.
Padiri Juvénal Nsengiyumva uba mu Mujyi wa Montréal yarwanyije koherezwa mu Rwanda inshuro nyinshi aranatsinda nyuma yo kwandikira Papa amubwira ko nta ruhare yagize mu bwicanyi.
Inkiko za Canada zamuhanaguyeho ibyaha byo kugira uruhare muri Jenoside yakorewe Abatutsi no gushishikariza abantu ubwicanyi.
Aho yahungiye muri Repubulika Iharanira Demokarasi ya Congo we n’abandi bapadiri 28, bandikiye Papa Yohani Pawulo II tariki 2 Kanama 1994 bamumenyesha uko mu Rwanda byifashe.
Nk’uko Urukiko Mpuzamahanga Mpanabyaha rwashyiriwe u Rwanda (ICTR/TPIR) rubivuga, ngo urwo rwandiko rwashyiraga mu majwi Umuryango wa FPR Inkotanyi ndetse rukemeza ko Abatutsi basanzwe bafite uburenganzi busesuye.
Yageze muri Canada mu 1999 asaba ubuhungiro abanza kubwangirwa ariko nyuma yemerwa kuhaba ahawe uburenganzira na Minisitiri ushinzwe abinjira n’abasohoka.
Ikinyamakuru The National Post cyo muri Canada kivuga ko inkiko zo mu Rwanda zimukurikiranyeho guhakana Jenoside yakorewe Abatutsi.
Guhakana Jenoside ntibifatwa nk’icyaha muri Canada kuko n’uwahakanaga Jenoside yakorewe Abayahudi witwa Zundel yarekuwe. Iki ni kimwe mu byatumye ahanagurwaho icyaha ahabwa uburenganzira bwo gutura muri Canada nk’uko iki kinyamakuru kibivuga.
Nsengiyumva yemezaga ko kumwohereza mu Rwanda byaba ari ukumushyira mu mazi abira kubera ibitekerezo bye.
Kuri uyu wa mbere yangiwe n’Umucamanza Danièle Tremblay-Lamer kuba yajuririra iki cyemezo cyo kumwohereza mu Rwanda kubera isindwe, n’ubwo akiri muri Canada.
Me Noël Saint-Pierre umwunganira yavuze ko atunguwe n’icyo cyemezo agira ati : “Ndahamya ko atazagira ibihe byiza mu gihugu cye. Turi kugerageza ngo nibura azoherezwe mu kindi gihugu”.
Nsengiyumva Juvénal yabaye Padiri mu mwaka w’1992 muri Diyoseze ya Ruhengeri mu Majyaruguru y’u Rwanda mbere yo guhunga muri Nyakanga 1994.
IKINYARWANDA
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
