300 baguye mu mirwano muri Sudan y’amajyepfo

300 baguye mu mirwano muri Sudan y’amajyepfo


Yanditswe kuya 13-03-2012 - Saa 10:38'

Abantu bagera kuri 300 nibo byemejwe ko baguye mu mirwano hagati y’amoko abiri yo muri Jonglei yo muri Sudan y’amajyepfo, naho abandi bagera ku 15.000 bava mu byabo kuri uyu wa Mbere.

Nk’uko tubikesha urubuga rwa africareview, iyi mirwano ishyamiranyije abo mu bwoko bwa Murle n’ubwa Nuer, yatangiye kuwa Gatanu ubwo agatsiko kitwaje ibirwanisho kagizwe n’urubyiruko rugera ku 3000 ruturutse mu gace kitwa Pibor, rwasazwe n’uburakari rwateye ahororerwa inka mu kandi gace kitwa Akobo.

Abagera kuri 230 nibo bakomeretse kuri uyu wa Mbere, imibiri y’abagera kuri 305 irahambwa, naho abandi bagera kuri 200 baburiwe irengero, nk’uko Goyul Joyol umuyobozi w’agace ka Akobo abitangaza.

Yavuze ko abarwana batumye abantu ibihumbi bava mu byabo mu duce 18, banabanyaga amashyo n’imitungo yabo.

Ati: “Abaturage hano batakaje ibibatunga. Bibwe amatungo yabo nkaba ntinya rero ko bari bube ntacyo bafite cyo kurya.”

Umuyobozi w’agace ka Twich y’uburasirazuba, Dau Akoi Jurkuch avuga ko imirwano yo muri Akobo yageze no mu karere ayobora, aho abantu naho batangiye gukora ibikorwa by’ubusahuzi ndetse n’ubujura bwitwaje intwaro, biba amatungo bayasanze mu nzuri rusange.

Guverineri wa Leta ya Jonglei, Kuol Manyang yahamagariye abantu kugira ubworoherane no guhagarika kugaba ibitero.

Hagati aho Perezida wa Sudan y’amajyepfo Salva Kiir Mayardit, ubwo yari i Bor, mu Murwa mukuru wa leta ya Jonglei, yatangije igikorwa cyo kwambura intwaro abasivili, igikorwa atekereza ko kizafasha mu kugarura amahoro muri iyi leta yagutse cyane.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO