Abanyekongo na none bongeye kuzinga uturago berekeza muri Uganda

Abanyekongo na none bongeye kuzinga uturago berekeza muri Uganda


Yanditswe kuya 2-03-2013 - Saa 03:16' na IGIHE

Mu gihe hari hateye kabiri Abaturage b’Abanyekongo basa nk’abatekanye mu bice bimwe na bimwe byo mu Burasirazuba, ubu ibintu byongeye kujya irudubi nyuma y’aho abarwanyi bo mu mutwe wa M23 basubiraniyemo, kuko byatumye abaturage benshi bahunga iyo mirwano berekeza muri Uganda.

Imirwano yatumye abaturage bahunga, ishyamiranije impande zitavuga rumwe zo mu mutwe w’Abarwanyi ba M23, nyuma y’aho ucikiyemo kabiri igice kimwe kikaba kiri ku ruhande rwa Pasiteri Jean Marie Runiga wari ukuriye uyu mutwe mu rwego rwa politiki, ikindi kikaba kiri ku ruhande rwa Gen. Sultani Makenga Umugaba w’Ingabo z’uyu mutwe ndetse bikaba bivugwa ko ari we wabaye asimbuye Runiga no ku buyobozi bwa Politiki.

Amakuru dukesha BBC avuga ko urusaku rw’amasasu rwumvikanye mu gace ka Bunyoni gaherereye mu birometero bigera ku icumi by’umupaka wa Bunagana, ari rwo rwatumye aba baturage bafata utwangushye bagahungira muri Uganda.

Uhagarariye Ishami ry’Umuryango w’Abaibumbye ryita ku mpunzi muri Uganda, yatangaje ko mu gitondo cyo kuri uyu wa Gatanu tariki ya 1 Werurwe impunzi zigera ku 4,500 zari zimaze kwambuka umupaka zihunga, abenshi bakaba baturukaga mu byaro biri hafi y’umupaka, nyuma yo kwambuka abenshi bari bakiri mu Mujyi wa Bunagana ari ku ruhande rwa Uganda.

Amakuru kandi yatangazwaga n’Umuvugizi wa M23, uruhande rwa Gen. Makenga ariwe Col Vianney Kazarama ni uko muri iyo mirwano haguye abasirikare benshi, hakaba hari amakuru avuga ko abaguye muri iyi mirwano ku mpande zombi bagera kuri 30.

Aba baturage bahunze ku bwinshi mu gihe mu kwezi k’Ugushyingo Umwaka ushize nabwo abatuye mu Mujyi wa Goma no mu nkengero zawo bari bahunze berekeza mu Rwanda, ubwo M23 yafataga uyu mujyi nyuma ikaza kuwusubiza ingabo za Leta ya Congo Kinshasa.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO