Amwe mu mateka ya Uhuru Kenyatta

Amwe mu mateka ya Uhuru Kenyatta


Yanditswe kuya 9-03-2013 - Saa 15:55' na Deus Ntakirutimana

Uhuru Muigai Kenyatta yavutse tariki ya 26 Ukwakira 1961 muri Kenya, abyarwa na Jomo Kenyatta na Ngina umugore wa kane kuri se. Jommo Kenyatta yabaye Perezida wa mbere wa Kenya (1964–1978).

Izina Uhuru risobanura ubwigenge mu kiSwahili mu gihe Kenyatta bisobanura umukandara w’amasaro ya Massai. Kenyatta yize amashuri yisumbuye mu ishuri rya St Mary’s School i Nairobi, Kaminuza ayiga kuri Amherst College muri Leta zunze ubumwe za Amerika.

Imwe mu mirimo itandukanye yagiye akora:

Mu 2001 yabaye umudepite mu Nteko Ishinga Amategeko ya Kenya aho nyuma yaho yaje kuba Minisitiri w’ubutegetsi bw’igihugu ku ngoma ya Daniel Arap Moi. Umwanya wa Minisitiri w’ubutegetsi bw’igihugu yaje kongera kuwuhabwa ku bwa Mwai Kibaki muri Mutarama 2008, mbere yo kuba Minisitiri w’intebe wungirije n’uw’ubucuruzi muri Mata muri Guverinoma yari ihuriweho n’imitwe myinshi.

Kuva mu 2009 kugeza mu 2012 yabaye Minisitiri w’imari, aho yari yungirije Minisitiri w’intebe akaza kwegura kuri uwo mwanya muri Mutarama 2012.

Mu 2008 yarezwe n’urukiko mpuzamahanga mpanabyaha (ICC) mu gukangurira ubwoko akomokamo bw’Abakikuyu guteza imvururu zahitanye abantu barenga 1000, nyuma yo kutishimira ibyavuye mu matora ya Perezida wa Kenya mu 2007.

Tariki ya 15 Ukuboza 2010, Uhuru Kenyatta yashinjijwe uruhare rwe muri izo mvururu. Uru ruhare rwe azakomeza kurukurikiranwaho muri Kamena 2013.

Ubuzima bwe mu mashyaka

Mu buzima bwe bwa politiki, mu 1997 Uhuru Kenyatta yabaye umuyobozi w’ishyaka KANU mu mujyi avukamo. Yaje gukomeza kuzamurwa mu ntera na Kibaki wanamushyiraga mu myanya itandukanye ahuriramo n’abanyapolitiki.

Mu Gushyingo 2006, Kenyatta yasimbuwe ku buyobozi bwa KANU na Biwott, maze yanga uwo mwanzuro mu Kuboza uwo mwaka, urukiko rw’ikirenga rumusubiza umwanya we, yemezwa bidakuka muri Kamena 2007.

Yagiye kandi ajya mu yandi mashyaka atandukanye nka TNA, KANU, PNU guhera mu 2007 kugeza mu 2012, mu gihe kugeza ubu abarizwa muri Jubilee Alliance ari na ryo yiyamamarijemo kuyobora igihugu.

Mu buzima busanzwe, Kenyatta afite radiyo enye na televiziyo ebyiri, akaba ari no mu bakire ba mbere muri Kenya, aho afite umutungo ubarirwa muri miliyoni 500 z’amadolari ya Amerika. Ahanini uyu mutungo ukaba ukomoka ku muryango we avukamo wari ukize cyane.

Kenyatta yashakanye na Margaret Wanjiru Gakuo mu 1991. Bafitanye abana batatu aribo Jomo, Ngina na Jaba. Margaret Kenyatta ntazwi cyane mu gihugu cya Kenya.

Kenyatta na Madamu we Margaret Gakuo
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO