Kwamamaza

Abadepite ba EALA bakomoje kuri ruswa ivugwa muri EAC n’intambara muri Sudani y’Epfo

Yanditswe kuya 22-11-2016 saa 10:18' na Jean Pierre Tuyisenge


Abadepite bagize Inteko Ishinga Amategeko y’Umuryango wa Afurika y’u Burasirazuba EALA, bamaganye ruswa ikomeje kuvugwa mu bihugu byo muri aka karere n’umutekano muke muri Sudani y’Epfo, basaba ibihugu binyamuryango kugira icyo bibikoraho.

Abadepite bagera ku 10 bayobowe na Perezida wa EALA, Daniel Fred Kidega, basabye abaturage b’ibihugu bigize uyu muryango gusaba abayobozi babo gukora ibishoboka byose bakarwanya ruswa ikomeje kugaragara mu bigo bya leta n’abikorera ku giti cyabo.

Mu kiganiro n’abanyamakuru cyabereye mu Inteko Ishinga Amategeko ya Kenya, kuri uyu wa Mbere, Kidega yagize ati “Twe nk’Inteko, twamaganye bikomeye ibikorwa byose bya ruswa mu bihugu bigize aka karere, haba mu nzego za Leta n’iz’abikorera.”

Daily Nation yanditse iyi nkuru, ivuga ko iri jwi ry’abadepite rizamuwe mu gihe ishyaka riri ku butegetsi muri Kenya (Jubilee Alliance) rimaze iminsi ryotswa igitutu n’abatavuga rumwe na Leta basaba ko ruswa n’ikimenyane byahagarara, mu gihe hitegurwa amatora y’Umukuru w’Igihugu.

Kidega yavuze ko Inteko ya EALA yashyigikiye umushinga w’itegeko riha ububasha abaturage bo muri aka karere gutungira agatoki inzego zibishinzwe ahantu hose hagaragaye ruswa.

Iryo tegeko niriramuka ritowe,rizaha umutekano usesuye abakorerabushake mu gutanga amakuru ku buryo bizatera n’abandi imbaraga zo kugaragaza abari mu bikorwa bifitanye isano na ruswa.

Bagarutse ku bibazo by’intambara biri muri Sudani y’Epfo

Ku kibazo cy’umutekano ukomeje kuba muke muri Sudani y’Epfo, Abadepite ba EALA, basabye ko ibihugu bigize umuryango wa Afurika y’u Burasirazuba byagira icyo bikora mu maguru mashya mu gushakira igisubizo kirambye ibyo bibazo.

Bati “ Dushishikajwe cyane n’ibibazo bya politiki biri mu gihugu kinyamuryango cyacu, turasaba impande zose bireba by’umwihariko abayobozi batowe, gukora uko bashoboye bagahagarika icyo kibazo."

Yavuze ko ikibazo cy’umutekano muke kiri muri Sudani y’Epfo kigira ingaruka ku kwihuza kw’akarere kose muri rusange, gasanzwe gafite intego yo guhangana n’ibibazo by’imiyoborere mu banyamuryango bako no guteza imbere abagatuye.

Kidega yavuze ko ari inshingano zabo zo guharanira amahoro mu bihugu binyamuryango bya EAC.

Aba badepite bagaragaje kandi ko ikibazo cy’inkunga idahagije cyatumye habaho guhagarika imirimo imwe n’imwe cyane muri Nzeri n’ Ukwakira.

Kidega yasabye ibihugu bigize uwo muryango gutanga inkunga yabyo bitarenze Ukuboza nkuko babyemeranyijwe n’inama y’Abaminisitiri.

Depite Daniel Kidega avuga ko bakwiye kugira icyo bakora kugira ngo ruswa muri EAC ihagarare

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved