Kwamamaza

Abafaransa bakuye ingabo zabo muri Centrafrique

Yanditswe kuya 30-10-2016 saa 18:52' na Rabbi Malo Umucunguzi


U Bufaransa bwatangaje ko ibikorwa by’ingabo zabwo zari muri Repubulika ya Centrafrique birarangira kuri uyu wa Mbere, nyuma y’imyaka hafi itatu ziri mu bikorwa byiswe ‘Operation Sangaris’ byatangijwe mu Ukuboza 2013, bigamije guhosha amakimbirane yari yavutse hagati y’amoko.

Ibi bikorwa byari bibangikanye n’iby’Umuryango wa Afurika Yunze Ubumwe bigamije kugarura amahoro, MISCA, ariko nyuma byaje kwegurirwa Umuryango w’Abibumbye byitwa MINUSCA, byahosheje ubugizi bwa nabi mu Murwa Mukuru Bangui n’ubwo ituze ritarakwira ibindi bice.

Ni igikorwa cyagirwagamo uruhare n’abasirikare basaga 250o baturuka mu mitwe itandukanye y’ingabo z’Abafaransa.

AFP yanditse ko muri Kamena u Bufaransa aribwo bwatangaje ko bugiye kugabanya abasirikare babwo muri Centrafrique bakagera kuri 350, bakwifashishwa gusa nk’inyunganizi ku ntumwa z’Umuryango w’Abibumbye ziri muri icyo gihugu.

Umwuka mubi muri Centrafrique watangiye kuwa 5 Ukuboza 2013 ubwo havukaga ubushyamirane hagati y’umutwe w’abarwanyi b’abakirisitu, Anti-Balaka ukagaba ibitero ku duce tw’Abayisilamu, bizamura uburakari bw’umutwe ubashamikiyeho wa Seleka.

Iyo mirwano imaze gutangira nibwo u Bufaransa bwohereje ingabo zabwo muri icyo gihugu muri gahunda y’Umuryango w’Abibumbye yo gukumira ubugizi bwa nabi, icyo gikorwa cyitirirwa ‘Sangaris’, akanyugunyugu gato gatukura kaba muri icyo gice.

U Bufaransa bwakunze kugirira ibikorwa byinshi bya gisirikare muri iki gihugu bwanakolonije, kugeza na nyuma y’ubwigenge cyabonye 1960.

Nyuma y’iyi mirwano yagejeje igihugu ku ihirikwa rya Perezida rya Perezida François Bozize wahiritswe na Seleka irangajwe imbere na Michel Djotodia, hagiyeho guverinoma y’inzibacyuho, igeza ku itorwa rya Faustin-Archange Touadera muri Gashyantare 2016.

Nyuma y’amezi atatu Perezida w’u Bufaransa, François Hollande yaje kugenderera iki gihugu ndetse atangaza ko “ituze ryagarutse,’’

Gusa izi ngabo z’Abafaransa zakunze gushinjwa ibikorwa byo gusambanya abana, nk’aho muri Nyakanga 2014 byasakuje cyane.

Ubushinjacyaha bwaje gufungura iperereza, ariko ibirego ntibyajya hanze mbere ya Mata 2015, kugeza ubwo byaje gusakara ko abasirikare b’Abafaransa baha abana ibiribwa n’amafaranga y’intica ntikize bagamije kubasambanya.

Kugeza ubu ingabo zari muri Sangaris zirebwa n’amaperereza atatu arebana n’ibyaha byishingiye ku gitsina byakorewe muri Centrafrique.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved