Kwamamaza

Abanyakenya bitambitse iyemezwa ry’umushinga w’itegeko ryo guca amashashi muri EAC

Yanditswe kuya 26-11-2016 saa 12:27' na Hagengimana Philbert


Abadepite bagize Inteko Ishinga Amategeko y’Umuryango wa Afurika y’Iburasirazuba (EALA) bahagaritse by’agateganyo ibiganiro ku mushinga w’itegeko ryo guca amashashi n’ibindi bikoresho bya palasitike mu Karere, nyuma y’aho abacuruzi b’Abanyakenya bawigometseho.

The Eastafrican dukesha iyi nkuru itangaza ko abacuruzi n’abanyenganda muri Kenya ari bo bamaganye uwo mushinga w’itegeko, bagaragaza ko uramutse wemejwe itegeko rigatorwa, rishobora kubatera igihombo kitagira ingano kandi hari ubundi buryo bushobora gukoreshwa mu gukemura ikibazo cy’ingaruka amashashi atera.

Abo bacuruzi n’abandi barebwa n’ikibazo cy’ibikoresho bikoze muri palasitike muri Kenya, bateraniye mu nama kuwa Gatatu w’iki cyumweru, bemeranya ko badakwiye kuva ku izima, kuko uwo mushinga w’itegeko wa EALA ushobora kugira ingaruka zikomeye ku nganda zabo.

Umuvugizi wa EALA, Bobi Odiko, yemeje ko ibiganirro ku mushinga w’iryo tegeko wari watangiye kuganirwaho muri Kanama i Arusha muri Tanzania, ariko ibyo biganiro bikaba byahagaritswe by’agateganyo kugeza muri Mutarama 2017.

Ati “Uwo mushinga ukeneye ikindi gihe gihagije cyo kubanza kuwuganiraho n’abarebwa na wo bose, ntukwiye kuganirwaho muri iyi nama.”

Akomeza avuga ko kwigiza inyuma ibyo biganiro bizafasha gukuraho ibibazo byo kutumvikana hagati y’abanyamuryango ba EAC, kwari gushingiye kuri uwo mushinga.

Uwo mushinga w’itegeko wakomotse ku gitekerezo cya Depite Hajabakiga Patricia, umwe mu bahagarariye u Rwanda muri EALA, wasabye ko hashyirwaho uburyo bushingiye ku mategeko, bwo gukumira ihumana ry’ikirere, biciye mu kubuza ikorwa n’icuruzwa, kwinjiza ndetse no gukoresha ibikoresho bikoze muri palasitike muri Afurika y’Iburasirazuba.

Umuyobozi w’Ihuriro ry’abacuruzi n’abanyenganda zikora ibikoresho bya palasitike muri Kenya (KAM), Phyllis Wakiaga, yatangaje ko abanyenganda muri Kenya bafite ubushake bwo kurwanya iyangirika ry’ikirere no kubungabunga ibidukikije, ariko ko iryo tegeko ritowe ryabagiraho ingaruka mbi.

Abo bacuruzi bifuza ko aho guhagarika ikorwa n’icuruzwa ry’amashashi n’ibikapu bya palasitike, harebwa uburyo buboneye bwakorohereza ikigo gishinzwe kubungabunga ibidukikije mu gucunga imikoresherezwe yabyo.

Uretse abacuruzi b’Abanyakenya, Abagande na bo ntibakozwa iby’uwo mushinga w’itegeko, mu gihe Abanyatanzania bo bageze ikirenge mu cy’u Rwanda mu gukumira ikoreshwa ry’amashashi.

U Rwanda rwiyemeje guhagarika ikoreshwa ry’amashashi ndetse no kuyinjiza mu gihugu muri 2005, mbere y’uko muri 2008 hashyirwaho itegeko rikumira ikoreshwa n’iyinjizwa mu gihugu ryayo mu rwego rwo kurengera ibidukikije.

Ku rwego mpuzamahanga, ibihugu birimo Bangladesh, Botswana, Israel, n’u Bufaransa nabyo byamaze kwemeza iri tegeko.

Abanyakenya bitambitse iyemezwa ry’umushinga w’itegeko ryo guca amashashi muri EAC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved