Kwamamaza

Abaperezida bashyigikiye Nkurunziza barwaye indwara imwe yo kwikubira ubutegetsi- Mbonimpa

Yanditswe kuya 19-11-2016 saa 17:44' na Ntakirutimana Deus


Impirimbanyi y’Uburenganzira bwa muntu mu Burundi, Pierre-Claver Mbonimpa, yemeza ko abaperezida ba Afurika bashyigikiye ko Umukuru w’Igihugu mu Burundi, Pierre Nkurunziza, aguma ku butegetsi ari abo bahuje umugambi wo kubugundira.

Mbonimpa ubarizwa mu Bubiligi aho yagiye kwivuriza ibikomere yasigiwe n’amasasu yarashwe, ubwo yagaragazaga ibitekerezo bye, ni umwe mu bashimangiye ko Perezida Nkurunziza atagomba kwiyamamariza manda ya gatatu, itaravuzweho rumwe ndetse igateza imvururu zimaze guhitana abatari bake.

Mu kiganiro yagiranye na Jeune Afrique ubwo yari mu Bufaransa ku wa Kane tariki ya 17 Ugushyingo 2016, yatumiwe n’Umuryango Mpuzamahanga wita ku Burenganzira bwa muntu ngo ahabwe igihembo yagenewe nk’imwe mu mpirimbanyi z’iyubahirizwa ry’uburenganzira bwa muntu; Mbonimpa yavuze byinshi ku Burundi, ku birimo kuhabera ndetse no ku babihuza na Jenoside.

Mbonimpa ashyirwa ku mwanya wa mbere mu guharanira uburenganzira bwa muntu mu Burundi, ndetse akaba ari umwe mu bantu bakunzwe banafatwa nk’intwari n’abaturage bamwita Mandela wo mu Burundi nk’uko bitangazwa n’umushakashatsi wa Human Rights Watch, Carina Tertsakian.

Nyuma yo kuraswa amasasu arimo iryamufashe ku musaya, irindi ku gihaha cy’ibumoso, irindi rikamuhusha ku ijosi, Pierre Claver Mbonimpa yahise ava mu Burundi nyuma y’iminsi ine ajya kwivuriza mu Bubiligi.

Ibyabaye kuri Mbonimpa ntibimubuza kuba Perezida w’Ihuriro ry’Imiryango irengera uburenganzira bwa muntu n’ubw’imfungwa(APRODH).

Mu kiganiro yagiranye na Jeune Afrique yatangaje ko nyuma yo kurokoka urupfu muri Kanama 2015 ubu ameze neza. Ati “Meze neza, nagiye noroherwa aho ngereye mu Bubiligi, aho navuwe mu buryo bukwiye. Ariko mu Burundi ubutegetsi bwishe umukwe wanjye n’umuhungu wanjye wari ufite imyaka 24 mu gihe nari mu bitaro. Nibyo bimbabaza cyane bikanca intege.”

Ku bijyanye n’ubutabera, ntiyemera ko hari uburi mu Burundi, ahereye ku kuba nta cyakozwe ku byamubayeho n’umuryango we. Ati “ Nta perereza ryigeze rikorwa, impamvu iroroshye, nta butabera buri mu Burundi niyo mpamvu ntahwema kubuharanira kugira ngo bube bwagera aho bwigenga. Uyu munsi abacamanza b’Abarundi ntibashobora gukora iperereza ku byaha badahawe uburenganzira na Guverinoma. Ndasaba nshikamye ko ubutabera mpuzamahanga bukomeza gukurikirana ibirimo kubera mu Burundi.”

U Burundi bwivanye muri ICC kuko bwikeka amabinga

Mbonimpa asanga kwivana muri urwo rukiko bifite impamvu ariko adashima. Ati “Nabivuze kenshi nabisubiramo, iyo ushaka kuva muri ICC ni ukubera ko hari icyo wikeka. Mu by’ukuri nafashe ko ari Pierre Nkurunziza n’aba-lieutenant be bivanye muri urwo rukiko, kuko Abarundi bazakomeza kurugirira icyizere.”

Mu rwego rwo kwerekana ko barufitiye icyizere, Abarundi baba mu Buholandi ndetse n’abandi bari muri diaspora y’icyo gihugu bateguye urugendo rwabaye, tariki ya 11 Ugushyingo 2016, imbere y’icyicaro cya ICC mu Buholandi rwo kwerekana ko barushyigikiye.

Mbonimpa ati “ Sinakwita ubwicanyi buri kubera mu Burundi Jenoside”

Tariki ya 15 Ugushyingo umuryango FIDH, urengera uburenganzira bwa muntu mu Burundi washyize ahabona raporo iteza ubwega ko ubwicanyi burimo gukorwa muri iki gihugu bushobora kubyara Jenoside.

Mbonimpa ati “Jenoside, ubwicanyi bukorerwa abantu benshi… Kuri njyewe ni cya kimwe. Sinakwita Jenoside, ubwicanyi burimo kubera mu Burundi. Ndetse na FIDH ntiyabihamije ahubwo yavuze ko bushobora kubyara Jenoside. Niba ari Jenoside Loni ishobora kuzabitubwira.”

Abashigikiye Nkurunziza ni abo bahuje umugambi

Mbonimpa yavuze kuba bakuru b’ibihugu bya Afurika bakomeje gushyigikira Nkurunziza barimo Idris Déby Itno wa Chad, akaba n’Umuyobozi w’Umuryango w’Ubumwe bwa Afurika.

Yagize ati “Abaperezida ba Afurika barwaye indwara imwe, gushaka kuyobora batavaho ndetse no gukizwa n’ibyagombaga guhabwa abaturage. Nta gitangaje ko bashyigikirana.”

Gusa avuga ko bose badashyigikiye Nkurunziza ndetse bituma yizera ko Umuryango w’Ubumwe bw’u Burayi uzakomeza gufasha u Burundi kubonera umuti ibibazo by’umutekano muke bihavugwa.

Nkurunziza ntazanga burundu kwitabira ibiganiro, ntari hejuru y’Isi

Avuga ku biganiro by’amahoro, Mbonimpa yagize ati “ Ibiganiro niyo nzira yonyine yo kubaka. Nkurunziza ntiyizege atsinda intambara nubwo yamaze imyaka 10 mu ishyamba. Yabaye perezida kubera amasezerano ya Arusha.”

Mbonimpa atangaza ko uburyo bukwiye bwo kugarura amahoro mu Burundi ari uko Nkurunziza yakwitabira ibiganiro, ku cyatuma icyo gihugu kigira amahoro, kandi ngo ntiyabyanga burundu kuko atari hejuru y’Isi y’ubu.

Akomeza avuga ko Abarundi bakomeje gusaba ko amasezerano ya Arusha n’Itegeko Nshinga byubahirizwa. Ati “Ni umuti w’izo mvururu, nkuko byabaye mbere […] amasezerano ya Arusha n’Itegeko Nshinga birabisobanura neza; nta perezida ugomba kuyobora manda zirenze ebyiri.”

Gusubira mu Burundi kuri Mbonimpa birashoboka, ariko se ryari?

Ati “ Nzasubirayo umunsi umwe mu Burundi, uko bizagenda kose! Ndi Umurundi. N’imyaka yanjye 66 umwanya wanjye uri iwanjye mu Burundi. Ndi mu buhungiro, mu mahanga ndi impunzi ya politiki, navuye mu gihugu mfite uruhushya rwa Guverinoma kandi nzakomeza kuvurirwa mu Bubiligi.”

Mbonimpa atangaza ko namara gukira azasaba ubuyobozi bukamwemerera gusubira mu Burundi, ariko nagerayo ngo ntazaceceka, azakomeza gukora ibishoboka kugira ngo ikibazo kiri mu Burundi gikemuke.

Impirimbanyi y’Uburenganzira bwa muntu mu Burundi, Pierre-Claver Mbonimpa, ashimangira ko abaperezida bashyigikiye Perezida Nkurunziza barwaye indwara yo kugundira ubutegetsi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved