Abaperezida bo muri EAC bagiye gufata umwanzuro ku guteranya imodoka no guca caguwa burundu

Yanditswe na Rabbi Malo Umucunguzi
Kuya 16 Gicurasi 2017 saa 08:03
Yasuwe :
0 0

Inama ya 18 y’Abakuru b’Ibihugu bigize Umuryango wa Afurika y’Iburasirazuba (EAC) igiye guteranira i Dar Es Salaam muri Tanzania kuwa 20 Gicurasi 2017, haganirwa ku ngingo zirimo umushinga wo guteranyiriza imodoka mu karere no guca burundu itumizwa ry’imyenda yambawe.

Nk’uko Ubunyamabanga bwa EAC bwabitangaje, muri iyi nama ikomeye hazanaganirwa ku masezerano y’ubufatanye mu bucuruzi hagati ya EAC n’Umuryango w’Ubumwe bw’u Burayi akomeje kutavugwaho rumwe n’ibihugu bihuriye muri uyu muryango.

Mu ngingo z’umunsi harimo n’uburyo buhamye bwo gutera inkunga ibikorwa by’umuryango, nyuma y’igihe bigaragara ko ibihugu bidatangira imisanzu yabyo ku gihe, ndetse u Burundi bukaba bukomeje kugwiza ibirarane.

Itangazo ryashyizwe ahagaragara kuri uyu wa Kabiri rikomeza rigira riti “Mu bizasuzumwa harimo na raporo yakozwe harebwa niba Somalia ishobora kwinjira muri EAC; raporo ku buryo bwafasha mu guteza imbere guteranyiriza imodoka mu karere no kugabanya izakoze ziva hanze y’Umuryango; na raporo ku isuzuma ryakozwe ku nzego zo gukora imyenda no gutunganya impu, hagamijwe guca burundu itumizwa ry’imyenda n’inkweto byambawe.”

Iyi nama izanasuzuma ibirebana no kwishyira hamwe nk’igihugu muri EAC, gushyiraho Umunyamabanga Mukuru ukomoka muri Tanzania no kwemeza umucamanza ukomoka muri Sudani y’Epfo mu rugereko rwa Mbere rw’Iremezo rw’Urukiko rwa Afurika y’Iburasirazuba.

Iyi nama kandi izashyikirizwa raporo ku buryo Sudani y’Epfo iri kwisanga muri EAC na raporo ku mavugurura ari gukorwa muri EAC.

Biteganyjwe ko iyi nama izemeza imishinha y’amategeko iheruka gutorwa n’Inteko Ishinga Amategeko y’Umuryango, EALA, ikanatangaza ihuzwa ry’imyigire mu mashuri makuru na za kaminuza mu karere, Common Higher Education Area.

Iyi nama y’Abakuru b’Ibihugu ibanzirizwa n’iy’abaminisitiri bashinzwe ibikorwa bya EAC, yatangiye i Dar Es Salaam kuva kuri uyu wa 16 kugeza kuwa 18 Gicurasi 2017.

Icibwa rya caguwa ni imwe mu ngingo zigiye kuganirwaho n'abakuru b'ibihugu bya EAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza