Kwamamaza

Abarundi mu myigaragambyo bamagana umwanzuro wa Loni

Yanditswe kuya 9-10-2016 saa 12:30' na Philbert Hagengimana


Abaturage b’u Burundi cyane abatuye mu Mujyi wa Bujumbura, bakoze imyigaragambyo imbere y’ibiro by’Umuryango w’Ubumwe bw’u Burayi n’iby’ishami ry’Umuryango w’Abibumbye riharanira uburenganzira bwa muntu muri iki gihugu, bamagana icyemezo cy’Umuryango w’Abibumbye cyo gukora iperereza ku bayobozi cyangwa abandi bashamikiye ku butegetsi bwa Nkurunziza bakoze ibyaha by’iyicarubozo no guhungabanya uburenganzira bwa muntu.

Radiyo Mpuzamahanga y’Abafaransa (RFI), itangaza ko kuri uyu wa Gatandatu tariki ya 8 ukwakira 2016, Abarundi bigabije imihanda mu Mujyi wa Bujumbura, barangajwe imbere na Freddy Mbonimpa,Umuyobozi w’Umujyi wa Bujumbura hamwe n’Umuvugizi wa Minisiteri y’Umutekano, Therence Ntahiraja bagamije yo kwamagana icyo icyemezo cyafashwe mu mpera z’ukwezi gushize.

Hashize ibyumweru bitatu abategetsi b’u Burundi mu ruhando mpuzamahanga bavugwaho guhamagarira abaturage kwigaragambya bamagana iperereza ku bakoze ibyaha bihungabanya ikiremwamuntu riteganywa gukorwa.

Abigaragambya bagendaga baririmbira hamwe indirimbo bavuga bati ’Indyarya n’abarya ruswa’. Bavugaga kandi ko bashyigikiye ubuyobozi bw’igihugu cyabo ku cyemezo bwafashe cyo kwikura mu Rukiko Mpuzamahanga Mpanabyaha (ICC).

Asubiza ku byo kwirukana intumwa za Loni mu Burundi nk’uko abigaragambyaga babisabaga mu ntero yabo, Therence Ntahiraja, yirinze kwerura niba koko biri buhite bishyirwa mu bikorwa, gusa yemeza ko kwigaragambya kwabo kimwe n’ibyo basaba byose bifite ishingiro, ati “Kubikora ku gahato byo ntibishoboka. Ibyemezo twafata bigomba kuba bishingiye ku mategeko.”

Impuguke za Loni ziherutse gushyira ahagaragara raporo ivuga ko bamwe mu bategetsi b’u Burundi kimwe n’Imbonerakure (urubyiruko rushamikiye ku ishyaka CNDD-FDD), bakoreye iyicarubozo bamwe mu baturage cyane abatavuga rumwe nabo, aho bamwe bishwe urw’agashinyaguro, abandi barafungwa ndetse hakaba n’ababurirwa irengero.

Umuryango w’Ubumwe bw’u Burayi (EU) wari warageneye u Burundi inkunga ya miliyoni 430 z’Amayero yagombaga gutangwa kuva mu 2014-2020, ariko ku wa 14 Werurwe 2016, uwo muryango wafashe icyemezo cyo kuyihagarika uvuga ko icyo gihugu cyananiwe kugira icyo gikora ku ihutazwa ry’uburenganzira bwa muntu.

Ku wa 29 Nzeri 2016, EU yagumishijeho ibihano byo guhagarika abarundi bane barimo Godefroid Bizimana, Umuyobozi Mukuru wungirije wa Polisi; Gen. Gervais Ndirakobuca bakunze kwita Ndakugarika; Mathias Joseph Niyonzima bakunze kwita Kazungu hamwe na Gen Leonard Ngendakumana wahoze ari Umuyobozi muri Perezidansi.

Ibi bihano bibabuza gutemberera mu bihugu bigize uyu muryango, kubera uruhare rwabo mu mvururu za politiki zikomeje kuba muri icyo gihugu kuva muri Mata 2015.

Kuri iyo tariki, ni na bwo hemejwe ko hakorwa iperereza ryimbitse, kugira ngo hagaragazwe uruhare rwa buri wese maze bashyikirizwe ubutabera. Icyakora umunsi umwe mbere y’uko icyo cyemezo gifatwa, Abategetsi b’u Burundi bari bakanguriye abaturage kwigaragambya bacyamagana ariko ntacyo byatanze.

Raporo ya Loni ntibonwa kimwe

Imiryango itegamiye kuri Leta yagiye itangaza iyicarubozo n’ibindi byaha byibasira inyokomuntu bikorerwa mu Burundi, maze impuguke za Loni zibihamya muri raporo zakoze muri Mutarama ndetse binashimangirwa n’indi raporo y’Umuryango Mpuzamahanga uharanira uburenganzira bwa muntu (HRW) yashyizwe ahagaragara ku wa 27 Nyakanga uyu mwaka.

Mu itangazo Minisitiri w’Ububanyi n’Amahanga w’u Burundi, Alain Aimé Nyamitwe yashyize ahagaragara mu ntangiriro z’iki cyumweru, yavuze ko Leta yeretse abahagarariye EU ibyo yise ibinyoma biri mu cyegeranyo abahanga b’Umuryango w’Abibumbye baherutse gukora, cyagaragazaga uburyo uburenganzira bw’ikiremwamuntu bukomeje kubangamirwa mu Burundi.

Muri iryo tangazo, Minisitiri Alain Nyamitwe agira ati “Ni icyegeranyo cyakozwe vuba na vuba, kandi u Burundi ntibwagishijwe inama.”

Umuvugizi wa Guverinoma Philippe Nzobonariba, na we yabwiye Reuters ko icyo cyegeranyo “cyakozwe hagamijwe guhungabanya umudendezo w’u Burundi.”

Icyakora ngo Leta yeretse abahagarariye EU ko uburenganzira bw’ikiremwamuntu mu Burundi bumeze neza, kandi ko n’umutekano uhari, ariko ibyo bihabanye n’ibyo Koen Vervaeke wari uhagarariye iryo tsinda, yatangaje kuko hari ibyo yabonye bitaratungana birimo iby’uburenganzira bw’ikiremwamuntu n’ubwisanzure mu gutanga ibitekerezo.

Abarundi bamagana icyemezo cya Loni cyo gukora iperereza ku bwicanyi mu gihugu cyabo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved