Afurika y’Epfo yabonye Minisitiri w’Ububanyi n’Amahanga mushya witezweho kuzahura umubano n’u Rwanda

Yanditswe na IGIHE
Kuya 30 Gicurasi 2019 saa 10:38
Yasuwe :
0 0

Lindiwe Sisulu wari Minisitiri w’Ububanyi n’Amahanga wa Afurika y’Epfo yasimbujwe kuri uwo mwanya Naledi Pandor wari usanzwe ari Minisitiri w’amashuri makuru.

Nyuma yo gutorerwa manda nshya, Perezida Cyril Ramaphosa kuri uyu wa Gatatu yatangaje Guverinoma nshya igizwe n’abaminisitiri 28 n’abanyamabanga ba Leta 34.

Muri Guverinoma nshya, hakozwe impinduka aho uwari Minisitiri w’Ububanyi n’Amahanga Lindiwe Sisulu yasimbujwe Naledi Pandor wari usanzwe ari Minisitiri w’amashuri makuru.

Minisitiri w’Ububanyi n’Amahanga, Dr Richard Sezibera, yifurije imirimo myiza Minisitiri mushya, avuga ko yizeye ko umubano w’ibihugu byombi uzamera neza kurusha.

Ati “Twishimiye kuba Naledi Pandor yagizwe Minisitiri w’Ububanyi n’Amahanga wa Afurika y’Epfo. Nizeye gukorana namwe mu guteza imbere umubano w’ibihugu byacu byombi.”

Sisulu wakuwe ku mwanya wa Minisitiri w’Ububanyi n’Amahanga asanzwe ari umuyoboke w’ishyaka riri ku butegetsi, ANC, yahawe kuyobora Minisiteri y’imiturire, amazi n’isukura.

Uyu mugore w’imyaka 65 wari umaze umwaka n’amezi atatu ashinzwe Ububanyi n’Amahanga bwa Afurika y’Epfo, igihe cye cyaranzwe n’ibibazo hagati y’umubano w’u Rwanda na Afurika y’Epfo.

Ubwo Zuma yeguraga muri Gashyantare 2018, abanyarwanda icyizere cyongeye kugaruka by’umwihariko abakora ubucuruzi basaga n’abakuyeyo amaso kuko kubona visa yerekeza muri icyo gihugu uvuye mu Rwanda byari ingume.

Icyizere cy’abanyarwanda cyarushijeho kwiyongera muri Werurwe 2018, ubwo ku nshuro ya mbere Cyril Ramaphosa yari ageze mu Rwanda yitabiriye Inama y’Abakuru b’Ibihugu bigize Umuryango wa Afurika Yunze Ubumwe.

Icyo gihe yatangaje ko ikibazo cy’Abanyarwanda bagorwa no kubona viza zo kujya muri Afurika y’Epfo kigiye kuba amateka nyuma y’ibiganiro yagiranye na Perezida Paul Kagame.

Nyuma y’aho Ramaphosa yagiye ahurira na Perezida Kagame mu zindi nama mpuzamahanga zitandukanye bakaganira.

Ibintu byarushijeho kuzamba mu mpera z’umwaka ushize ubwo Minisitiri Lindiwe Sisulu, yatangazaga ko yagiranye ibiganiro na Kayumba Nyamwasa, amusaba ibitekerezo ku mugambi w’icyo gihugu wo kuganira n’u Rwanda, hagamijwe kuzahura umubano hagati y’ibihugu byombi.

Ibyo biganiro byarakaje Guverinoma y’u Rwanda kuko Kayumba afatwa nk’umunyabaha wakatiwe n’inkiko z’u Rwanda, byongeye Afurika y’Epfo ikaba yarahuye na we itabanje kubiganirizaho u Rwanda.

Mu kiganiro yagiranye n’Ikinyamakuru The East African muri Gashyantare uyu mwaka, Perezida Kagame yavuze ko umubano w’u Rwanda na Afurika y’Epfo nta kibazo ufite ahubwo ikibazo ari abantu bamwe bari mu buyobozi bw’icyo gihugu.

Yagize ati “Afurika y’Epfo umubano umeze neza ku rwego rw’igihugu. Iyo bigeze kuri bamwe mu bayobozi nibwo ubona ibindi. Perezida wa Afurika y’Epfo aba abwirwa ibintu byinshi ariko ku ruhande rw’u Rwanda nta kunyuranya guhari ku buryo bw’imibanire yacu na Afurika y’Epfo. Icyo dusabwe gusobanura neza, tubikorera ku mugaragaro tugatanga n’ibimenyetso.”

U Rwanda ruvuga ko umubano w’ibihugu byombi utari ukwiye kubangamirwa n’ibikorwa by’abantu “bahamijwe cyangwa bashakishwa ku byaha bakoze.”

Naledi Pandor wari usanzwe ari Minisitiri w’amashuri makuru niwe Minisitiri w'Ububanyi n'Amahanga mushya wa Afurika y'Epfo
Sisulu wakunze kuba isubyo mu mubano wa Afurika y’Epfo n’u Rwanda yahinduriwe imirimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza

Article (118873) Re-process this page