Amayeri mashya mu bucuruzi bw’amahembe y’inkura

Yanditswe na Evariste Nsengimana
Kuya 19 Nzeri 2017 saa 08:36
Yasuwe :
1 0

Iperereza ryakozwe n’ibigo bishinzwe kurengera ubuzima bw’imyamaswa, ryagaragaje ko ba rushimusi b’inkura n’amahembe yazo bafite amayeri mashya yo kugurisha bimwe mu bice byazo ku buryo bigora cyane abashinzwe kubikumira (polisi) ku bibuga by’indege n’ahandi babinyuza babijyanye ku masoko mpuzamahnga.

Iri perereza ryagaragaje ko ba rushimusi basigaye babijyana mu buryo bw’imikufi, imiringa, impeta n’ibindi ku buryo bigoye kuba bavumburwa n’abashinzwe kugenzura abakora ubucuruzi bw’ibice by’ inkura, imyamaswa nyaburanga zizwi cyane ku mugabane wa Afurika.

Umwe mu bayoboye iryo perereza, Julian Rademeyer, yabwiye BBC dukesha iyi nkuru ko ubwo bucuruzi busigaye bukorwa mu bintu by’agaciro bigashorwa ku masoko mpuzamahanga bidafashwe.

Yatangaje ko kuva mu 2007, inkura zirenga 7 100 zishwe na ba rushimusi. Yavuze ko biteye impungenge zikomeye ati “Birababaje cyane, kuko niba umuntu ashobora guca ku kibuga cy’indege yambaye umukufi ukoze mu ihembe ry’inkura. Ese urumva ari inde wamuhagarika? Polisi yo iba yirebera ibice by’amahembe cyangwa inkura yose.”

Yakomeje atangaza ko kugeza uyu munsi, Afurika ariyo ba rushimusi bakuramo inkura n’ibice byazo bakazishora ku masoko mpuzamahanga akomeye yo mu Bushinwa na Vietnam, ndetse ko iryo perereza ryanagaragaje ko abakora ubwo bucuruzi butemewe bagenda bahindura inzira bacamo, banga guca mu bihugu bifite amategeko arengera inyamaswa ngo badafatwa.

Julian yasobanuye kandi ko imyumvire abantu bari bafite ko amahembe y’inkura avura indwara zitagira ingano zirimo na Cancer biri kugenda bigabanuka, ubu igisigaye kigoranye ari imyumvire y’abanya-Vietnam ko gutunga amahembe yazo ari ikimenyetso cy’ubukire ndetse ko nta muntu ukuvogera no mu rwego rw’amategeko.

Umuyobozi mukuru w’umuryango mpuzamahanga ushinzwe kurengera ubuzima bw’inkura, Susie Offord-Woolley, yatangaje ko kumenya ayo makuru bizagira akamaro gakomeye mu gutoza abashinzwe kugenzura abacuruza amahembe yazo ku buryo bazajya banasaka bakitegereza neza imikufi, inigi n’ibindi bikozwe mu bice by’inkura, yongeraho ko bari gukorwa ibishoboka byose ngo barwanye icika ry’inkura nkuko byagaragajwe ko hatagize igikorwa, mu myaka 10 zitazaba zikigaragara ku Isi.

Ba rushimusi basigaye babijyana mu buryo bw’imikufi, imiringa, impeta n’ibindi ku buryo bigoye kuba bavumburwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza