Kwamamaza

Bombori bombori mu kwinjiza abakozi bashya mu Bunyamabanga bwa EAC

Yanditswe kuya 25-10-2016 saa 14:36' na Rabbi Malo Umucunguzi


Inteko Ishinga Amategeko y’Umuryango wa Afurika y’u Burasirazuba, EALA, yasabye ko ibikorwa byo kwinjiza abakozi bashya mu bunyamabanga bw’uyu muryango byahagarikwa nyuma y’ibibazo bya ruswa n’ikimenyane biri gukemangwamo ko byaba byarahawe intebe.

Itegeko rishyiraho Umuryango wa Afurika y’Iburasirazuba, EAC, rigena ko abakozi bo mu Bunyamabanga bwayo bagira manda y’imyaka itanu ishobora kongerwa rimwe, ku buryo abasaga 30 bamaze imyaka 10 bakoramo bazasoza imirimo mu mpera z’uku kwezi, bakaba bagomba gusimburwa n’itsinda rishya ry’abakozi baturuka mu bihugu bitandatu bigize EAC.

Inteko Rusange ya EALA yabereye muri Zanzibar mu cyumweru gishize, yazamuye ibitekerezo bikomeye by’abadepite, bavuga ko Umuryango wa Afurika y’Iburasirazuba (EAC) uri kugaragaza imikorere idahwitse.

Iyi ni nayo yarahiriyemo abadepite bashya muri EALA, barimo Umurundi Jean Marie Muhirwa wasimbuye Hafsa Mossi uheruka kwicirwa i Bujumbura, n’Umunyarwandakazi Oda Gasinzigwa wasimbuye Bazivamo Christophe, wagizwe Umunyamabanga Mukuru Wungirije wa EAC.

Inkuru yatambutse kuri NTV Uganda, igaragaza abadepite batishimye na gato kubera uko abakozi bashya bari guhabwa imyanya muri EAC.

Depite Ogle Abubakar D. Abdi, ukomoka muri Kenya agaragaza ko atishimiye ibiri gukorwa mu gutanga akazi muri EAC, agasaba impinduka zihuse.

Ati “Ubu ndi umugabo ufite impungenge zikomeye, ufite impungenge kuko turi kugendererwa cyane n’idayimoni. Hari ruswa n’ukundi kuboko kuri kugena uko kwinjiza abakozi muri uyu muryango bigenda; Ibi dukeneye kubigenzura. Muri make hari amafaranga yishyurwa ngo umuntu abashe kujya ku rutonde rw’abahatana, andi yishyurwa ngo umuntu ahabwe gahunda, ikintu gikomeye cyane ku izina n’agaciro k’umuryango wose.’’

Mugenzi we Abubakar Zein nawe ukomoka muri Kenya, avuga harimo amanyanga ku buryo umuntu ufite ubushobozi atari we witaweho.

Ati “Hari amagambo ari kuvugwa muri bamwe muri bagenzi bacu, muri EALA. Iyo ubonye umuntu ufite ubushobozi, ufite ibyangombwa, ufite ubunararibonye bwo ku rwego rwo hejuru, ugasanga nta nubwo aje ku rutonde rw’abemerewe guhatanira umwanya, ntanahabwe amahirwe yo kugera imbere y’akanama gakoresha ikizamini mvugo. Aho harimo ikibazo gikomeye.’’

Amagambo yazamuwe na Depite Ogle yazamuye impaka mu Nteko, abadepite batangira gusaba ko kwinjiza abakozi bashya byahita bihagarikwa, kugeza igihe iperereza rizarangirira.

Depite Nusura Tiperu ukomoka muri Uganda, ati ‘‘Guhagarika ibyo bikorwa bizafasha inama y’abaminisitiri gusuzuma neza ibyo bibazo, nyuma hatorwe uburyo bunoze bwakoreshwa, ku buryo umuntu wese uzatoranywa azemerwa n’umuryango wose.’’

Depite Zein yahise yungamo ati “Mutegereze, mubihagarike, tureke inama y’abaminisitiri ibifitiye inshingano isuzume iki kibazo.’’

Umuyobozi wa EALA, Daniel Fred Kidega, yasabye ko hakorwa iperereza nk’uko Depite Ogle yabisabye, nyuma yo kubona ko hari ikibazo gikomeye gikemangwa mu gushaka abayobozi bashya.

Impinduka mu buryo abakozi bari basanzwe batoranywa

Mu itangazo ryashyizwe ahagaragara kuri uyu wa Mbere n’Umunyamabanga Mukuru wa EAC, Umurundi, Liberat Mfumukeko, nyuma y’isakara ry’ibyatangajwe n’abadepite ko kwinjiza abakozi bihagarikwa, yashimiye EALA uburyo yubahiriza inshingano zayo zo kureberera imikorere y’umuryango.

Yavuzemo ko mu bihe byashize, kwinjiza abakozi bashya mu Bunyamabanga bwa EAC byakorwaga mu bufatanye bw’ibihugu bigize uyu muryango, Ubunyamabanga bwa EAC n’itsinda ry’impuguke.’

Ati “Gusa mu 2014, mu nama ya 28, abaminisitiri basabye ko EAC yajya yifashisha ibigo bikomeye byo hanze mu gutanga akazi ku bakozi bashya, hagamijwe kwimakazwa ugukorera mu mucyo n’ubworoherane.’’

Ibyo bigo ngo byateguraga imirimo y’ibanze yo gutanga akazi, hagategurwa urutonde rw’abujuje ibyangombwa, bakarugeza ku Bunyamabanga bwa EAC ari nabwo bwagenaga itsinda ry’impuguke ziturutse mu bihugu bigize EAC, zigakoresha ibizamini mvugo, abatsinze bagashyikirizwa inama y’abaminisitiri ikabemeza, bagahabwa akazi.

Mu kubahiriza umwanzuro w’abaminisitiri, Mfumukeko avuga ko Ubunyamabanga bwahaye akazi ibigo bya Deloitte na Touché ngo byuzuze izo nshingano.

Ati “Mu mavugururwa y’imikorere ya EAC muri 2016, hashyizweho komisiyo idasanzwe ikurikirana ibijyanye no gutanga akazi igizwe n’intumwa z’ibihugu byose bihuriye muri uwo muryango. Ni komisiyo yigenga igeza imyanzuro yayo ku nama y’abaminisitiri. Nyuma EAC yahise imenyesha irangira ry’amasezerano yari ifitanye na Deloitte na Touché.’’

Mfumukeko yavuze ko nubwo ibizamini mvugo biheruka byakoreshejwe n’iyi komisiyo, gutoranya abakandida byari byarakozwe na Deloitte na Touché, kuko amasezerano yabo yari agifite agaciro.

Ati ‘‘Gusa gushaka abakozi bashya biri gukorwa ubu byo, gutoranya abakandida byakozwe n’iyi komisiyo idasanzwe, ubu bari kwitegura gutanga ibizamini mvugo ku bakandida batoranyijwe. Nyuma iyo komisiyo ikazashyikiriza raporo yayo inama y’abaminisitiri itaha.’’

Mfumukeko yavuze ko nk’Umunyamabanga Mukuru, inshingano afite ari ugufasha iyo komisiyo ya EAC kuzuza inshingano zayo zirebana no kwinjiza abakozi bashya.

Ati “Impungenge za EALA zirababaje cyane kandi ziratuburira ku buryo niba ari ukuri hagomba kugira igikorwa. Muri urwo rwego, Umunyamabanga Mukuru yandikiye Perezida wa EALA amugezaho ibindi bisobanuro kuri iki kibazo hamwe n’ibimenyetso bifatika ku buryo iperereza ryahita ritangira.’’

Depite Aboubakar Zein
Depite Ogle Abubakar D. Abdi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved