Burundi: Abantu batatu bo mu ishyaka riri ku butegetsi bishwe na gerenade

Yanditswe na Jean Pierre Tuyisenge
Kuya 18 Gicurasi 2017 saa 08:21
Yasuwe :
0 0

Umuntu utaramenyekana yateye gerenade mu nzu iherereye i Bujumbura yica abantu batatu bikekwa ko bari mu ishyaka riri ku butegetsi, kuri uyu wa Gatatu tariki 17 Gicurasi.

Umuvugizi wa polisi y’u Burundi, Pierre Nkurikiye, yabwiye itangazamakuru ko usibye abo batatu bapfuye abandi nkabo bakomeretse barimo umugore, umwana we n’umugabo bahita bajyanwa kwa muganga igitaraganya.

Yagize ati “Abishwe bose biravugwa ko bari abo mu ishyaka riri ku butegetsi (CNDD FDD) barimo n’umuyobozi waryo ku rwego rw’ibanze. Batanu bakekwaho uruhare muri ubwo bwicanyi bamaze gutabwa muri yombi.”

Reuters dukesha iyi nkuru ivuga ko umuturage wo mu gace ka Musaga kari hafi y’umurwa mukuru aho byabereye, yavuze ko muri abo bishwe barimo umuhungu w’umuyobozi wo muri ako gace.

U Burundi bwinjiye mu bihe by’umutekano muke ubwo Perezida Nkurunziza yafataga icyemezo cyo kwiyamamaza kuri manda ya gatatu, igikorwa abatavuga rumwe na we bavugaga ko gihabanye n’ibiteganywa n’Itegeko Nshinga ndetse ko bidahuye n’ibiri mu masezerano y’amahoro ya Arusha mu 2005.

Imwe mu miryango iharanira uburenganzira bw’Ikiremwamuntu ivuga ko Abarundi basaga ibihumbi 400 bahunze bakajya mu bihugu bituranye birimo n’u Rwanda, ndetse bamwe mu bategetsi bakomeye barimo n’abasirikare bahasize ubuma.

Mu kwezi gushize, Ishami ry’Umuryango w’Abibumbye ryita ku burenganzira bw’ikiremwamuntu ryatunze agatoki ibikorwa by’umutwe w’Imbonerakure birimo guhoza akarindi ku ngo z’abatavuga rumwe n’ubutegetsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza