Burundi: Handicap International yahisemo gufunga ibikorwa byayo aho gutanga akazi igendeye ku moko

Yanditswe na Akayezu Jean de Dieu
Kuya 8 Mutarama 2019 saa 02:10
Yasuwe :
0 0

Umuryango Handicap International wafunze ibikorwa byawo i Burundi nyuma yo kwanga kubahiriza itegeko rishya, risaba imiryango mpuzamahanga gutanga akazi hakurikijwe ijanisha ryagenwe ku Bahutu n’Abatutsi.

Guverinoma y’u Burundi iheruka gutangaza ko imiryango mpuzamahanga ifite kugeza tariki ya 31 Ukuboza 2018, ngo ibe yubahirije itegeko rishya riyisaba gukurikiza uburyo bwo kumenyekanisha imitungo no kuzajya itanga akazi ku Bahutu 60% n’Abatutsi 40%.

Mu gihe hari hategerejwe icyo buri muryango witeguye gukora, ku wa 1 Ukwakira 2018 Guverinoma y’u Burundi yari yabaye ihagaritse iyo miryango.

Mu itangazo rigenewe abanyamakuru, uyu muryango ukorera i Burundi kuva mu 1992 watangaje ko wabanje kugerageza ibiganiro na Guverinoma y’u Burundi ku byo wasabwe, ariko Minisitiri w’Umutekano abamenyesho ko ingingo bahawe zitagibwaho impaka.

Icyo gihe ngo nibwo wabonye ko utazakomorerwa ngo usubukure ibikorwa, uhitamo gusezera mu Burundi.

Itangazo ryawo rigira riti “Nk’umuryango wita ku baturage ugendera ku kutabogama n’ubwigenge, Handicap International isanga kugenzura amoko y’abakozi bayo ndetse igashyikiriza guverinoma ayo makuru, bigize umurongo utukura idashobora kurenga.”

Ikindi ngo isanga idashobora kubarura abakozi igendeye ku moko yabo, mu gihugu kitemera ko agaragazwa mu ndangamuntu.

Uyu muryango wanishingikirije Itegeko Nshinga ry’u Burundi, mu ngingo ya 22 rivuga ko nta muntu ugomba gukorerwa ivangura iryo ariryo ryose “ryaba irishingiye ku bwoko”, ndetse itegeko ry’umurimo, mu ngingo ya gatandatu rivuga ko “abantu bose bagomba guhabwa amahirwe angana kandi bagafatwa kimwe mu kazi, nta vangura iryo ariryo ryose.”

Uyu muryango wahise utangaza ko n’ukwicuza kwinshi ugiye gufunga ibikorwa byawo mu Burundi nyuma y’imyaka 26 uhamaze. Wari ufite ibikorwa birimo ibijyanye n’ubuzima, uburezi, ubuvuzi, guteza imbere imibereho y’abaturage no gufasha amashyirahamwe.

Handicap International ikorera mu bihugu bisaga 60 ku Isi. I Burundi yafashije abafite ubumuga 3,514, itera inkunga uburezi bw’abana bafite ubumuga 887, unafasha abatishoboye muri iki gihugu cyanyuze mu bihe by’intambara ishingiye ku moko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza