Burundi: Imvura ivanze n’umuyaga yahitanye ubuzima bw’abantu

Yanditswe na Jean Luc K. Mugisha
Kuya 18 Werurwe 2017 saa 08:48
Yasuwe :
1 0

Imvura idasanzwe yahitanye abaturage mu Burundi mu ijoro ryo ku wa Gatanu, aho imibare y’agateganyo itangazwa n’abayobozi b’icyo gihugu ivuga ko abantu batandatu bamaze gutakaza ubuzima n’ibintu bitari bike bikaba byarangiritse.

Gaston Sindimwo, visi Perezida w’u Burundi, yatangarije AFP ko "imvura nyinshi ivanze n’umuyaga ukaze yibasiye uturere twinshi two mu gihugu".

Iyi mvura yateje inkangu mu Ntara ya Cibitoke ishyira mu Burengerazuba bw’amajyaruguru yagwiriye inzu z’abaturage abantu batanu bahasiga ubuzima.

Naho muri Kinama, mu majyaruguru y’umurwa mukuru Bujumbura, umwuzure watembanye umuturage nk’uko Sindimwo yakomeje abisobanura.

Inzu zisaga 162 zasenyutse ndetse ubuyobozi bukomeje gukora ibishoboka byose ngo butabare abagezweho n’amakuba.

Imvura idasanzwe yaherukaga kwibasira icyo gihugu hagati ya Nzeri umwaka ushize na Gashyantare uyu mwaka.

Hari hashize iminsi mike imvura n’umuyaga ukaze uzwi nka "Cyclone Enawo" uhitanye abatari bake wangiza n’ibintu bitagira ingano mu gihugu cya Madagascar, ibintu bishobora kwerekana ko Afurika ishobora gukomeza kwibasirwa mu bihe biri imbere n’ibiza biturutse ku ihindagurika ry’ikirere.

Umwuzure wibasiye uduce tumwe na tumwe tw'u Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza