Burundi: Leta yahaye Loni igihe ntarengwa cyo kuba yasimbuje intumwa yayo

Yanditswe na Uwishyaka Jean Louis
Kuya 16 Ugushyingo 2016 saa 02:57
Yasuwe : XX
0

Perezida w’u Burundi, Pierre Nkurunziza, yasabye Umunyamabanga Mukuru w’Umuryango w’Abibumye Ban Kim- Moon, ko yohereza indi ntumwa yawo kugira ngo isimbure uwari usanzweho utishimiwe n’iki gihugu.

Perezida Nkurunziza yandikiye uyu muyobozi kimwe n’uzamusimbura Antonio Guterres, abasaba gutangira gukora igenzura kugira ngo bashake uzasimbura Jamal Benomar, Umwongereza wavukiye muri Maroc, bitarenze ibyumweru bibiri.

Jamal Benomar asabirwa gusimbuzwa nyuma y’aho yakunze kugaruka ku bibazo by’umutekano muke n’ibiganiro by’amahoro mu Burundi.

Umuvugizi w’Umuryango w’Abibumbye, Farhan Haq, avuga ko ibyo gushaka umusimbura wa Benomar bitazakorwa nk’uko Ibiro Ntaramakuru by’Abafaransa AFP bibitangaza.

Farhan yemeza ko Benomar agifitiwe icyizere n’uwo muryango kandi ko agomba gukomeza imirimo ye.

Mu cyumweru gishe, Benomar ngo yavuye mu biganiro byavugaga ku cyemezo cya leta cyo gucana umubano n’amashyirahamwe y’Umuryango w’Abibumbye aharanira uburenganzira bwa muntu n’icyo kwanga iyohererwa ry’abapolisi b’uyu muryango muri iki gihugu nta mwanzuro ufashwe.

Jamal Benomar yoherejwe mu Burundi mu Ugushyingo umwaka ushize agiye gusimbura Said Djinnit, wari weguye muri Kamena uwo mwaka nyuma yo gushinjwa kubogama mu biganiro by’amahoro byaberaga muri icyo gihugu cyugarijwe n’imvururu zivanze n’ubugizi bwa nabi kuva muri Mata 2015.

Kuri ubu umubano w’u Burundi n’Umuryango w’Abibumbye ntiwifashe neza nyuma ya raporo yasohowe n’uyu muryango ugaragaza ko muri iki gihugu hakorerwa ibikorwa bihungabanya uburenganzira bwa muntu ku buryo bukomeye.

Imiryango iharanira uburenganzira bwa muntu, igaragaza ko kuva muri Mata 2015 ubwo Perezida Nkurunziza yatangazaga ko aziyamamariza manda ya gatatu yaje no gutorerwa, abantu barenga ibihumbo 300 bahunze igihugu.

Perezida Nkurunziza yasabye Ki- Moon gushaka umusimbura wa Benomar bitarenze ibyumweru bibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza