Burundi: Mu mezi atageze kuri atatu abantu 700 bishwe na Malariya

Yanditswe na Mukaneza M.Ange
Kuya 15 Werurwe 2017 saa 09:00
Yasuwe :
0 0

Minisitiri y’Ubuzima mu Burundi yatangaje ko Malariya ari icyorezo cyugarije iki gihugu, aho kuva mu ntangiriro z’uyu mwaka wa 2017, imaze guhitana abantu bagera kuri 700.

Mu Kiganiro yagiranye n’abanyamakuru ku itariki 13 Werurwe 2017, Minisitiri wUbuzima, Josiane Nijimbere, yavuze ko hari n’abandi bagera kuri miliyoni ebyiri barwaye iyi ndwara.

Nijimbere yavuze ko kuva tariki ya 1 Mutarama kugeza kuwa 10 Werurwe 2017, abagera kuri 1 823 012 bagaragayeho Malariya, 700 muri bo bakaba barahitanywe nayo.

Ni mu 2016 iki cyorezo cyahitanye abantu 3000 muri 8 169 484 bari bayirwaye. Ugereranyije amezi atatu y’umwaka ushize n’uyu usanga ubwiyongere bwa Malaria buri ku kigero cya 13%.

Nk’uko RFI dukesha iyi nkuru yabyanditse, Leta y’u Burundi yemeye ko Malariya ari ikibazo gikomereye igihugu ndetse isaba n’ubufasha, nyuma y’ukwezi kumwe hashyizwe hanze raporo y’Umuryango Mpuzamahanga wita ku buzima (OMS).

Umuyobozi w’Ishyirahamwe rishinzwe kurwanya Malariya mu gihugu, Albert Mbonerane yavuze ko kuva batangira mu 2004, ari ubwa mbere hagaragaye umubare munini w’abaje kwivuza bagasanga barwaye Malariya, aho bihariye 70% by’abarwayi bose.

Ati “Malaria ni indwara y’abakene, ni abantu bake bafite ubushobozi bwo kwigurira imiti, ndetse rimwe na rimwe natwe iradushirana. Ntabwo wavuga ko mu mavuriro n’ibitaro hirya no hino mu gihugu hari imiti ihagije.”

Leta y’u Burundi igaragaza ko ubwiyongere bwa Malariya bukomeje guterwa n’imihindagurikire y’ibihe, kwagura imirima y’umuceri n’inzara ikomeje gutuma abantu bimuka. Asaga miliyoni 31 z’amadorali niyo akenewe kugira ngo babashe guhangana n’iki cyorezo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza