Burundi: Perezida Nkurunziza yagizwe Umuyobozi w’ikirenga wa CNDD-FDD

Yanditswe na Mukaneza M.Ange
Kuya 12 Werurwe 2018 saa 08:57
Yasuwe :
0 0

Perezida w’u Burundi, Pierre Nkurunziza, yazamuwe mu ntera n’ishyaka rye rya CNDD-FDD riri ku butegetsi, aho ryamugize Umuyobozi w’Ikirenga (Guide suprême éternel).

Uyu mwanzuro wo gushyira ku rwego rwongerera Nkurunziza ubudahangarwa, wafatiwe mu nama y’abayobozi bakuru ba CNDD-FDD, yabaye ku wa Gatanu no ku wa Gatandatu w’icyumweru dusoje mu gace ka Buye mu Majyaruguru y’igihugu.

Mu mashusho yageze ku Biro Ntaramakuru by’Abafaransa, AFP ndetse akabanza kugenzurwa ko ari ukuri, Umunyamabanga Mukuru wa CNDD-FDD, Gen. Evariste Ndayishimiye yumvikanye avuga ko Nkurunziza yagizwe umuyobozi w’ikirenga kandi ntawe ukwiye kwigereranya nawe.

Ati “ Ubuyobozi bwa CNDD-FDD bwafashe umwanzuro ko nyakubahwa Perezida Pierre Nkurunziza ari Umuyobozi w’ikirenga w’ishyaka ryacu. Ni mukuru wacu, ni umubyeyi wacu, umujyanama wacu, nta n’umwe ukwiye kwigereranya nawe muri CNDD-FDD.”

Itangazo ryaje gushyirwa hanze n’iri shyaka ryemejwe ibyavuzwe na Ndayishimiye, ibintu byanenzwe n’abashinja Nkurunziza gushaka kuyobora ubuziraherezo ndetse bamwe batangira kuvuga ko ari umushinga ugamije kumugeza ku kwitwa umwami Nkurunziza wa mbere.

Umwe mu bayobozi bakuru muri iri shyaka utifuje ko amazina ye atangazwa yavuze ko ibyo bakoze bitandukanye cyane n’ibyo abatavuga rumwe nabo bashaka kumvikanisha bagereranya Nkurunziza na Kim Il Sung, umunyagitugu wayoboye Koreya ya Ruguru ndetse kugeza n’ubu ubutegetsi bukaba buri mu maboko y’umwuzukuru we Kim Jong-Un.

Nkurunziza wagiye ku butegetsi mu 2005, asanzwe afatwa nk’umuyobozi ndahangarwa ugaragiwe n’abasirikare bakuru bafatanyijwe mu rugamba rwatumye aba perezida.

Kuva muri Mata 2015, u Burundi buri mu bibazo bya politiki byavutse ubwo Nkurunziza yavugaga ko aziyamamariza manda ya gatatu ndetse muri Nyakanga agatsinda amatora.

Imvururu zavutse nyuma y’iki cyemezo zimaze kugwamo abagera ku 1200 mu gihe abandi basaga ibihumbi 400 bahungiye mu bihugu bitandukanye birimo n’u Rwanda, ahabarizwa abasaga ibihumbi 75.

Biteganyijwe ko muri Gicurasi 2018, mu Burundi hazaba kamarampaka yo guhindura Itegeko Nshinga, igikorwa gishobora gusiga Nkurunziza yongeye kwemererwa kuyobora manda ebyiri z’imyaka irindwi guhera mu 2020.

Perezida Nkurunziza yagizwe Umuyobozi w'Ikirenga mu ishyaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza