Byemejwe ko isoko rusange rya Afurika rizatangira ku wa 30 Gicurasi

Yanditswe na Rabbi Malo Umucunguzi
Kuya 29 Mata 2019 saa 10:37
Yasuwe :
0 0

Umuyobozi wa Komisiyo y’Umuryango wa Afurika yunze Ubumwe, Moussa Faki Mahamat agaragiwe na Komiseri muri AU ushinzwe ubucuruzi n’inganda, Albert Muchanga, kuri uyu wa Mbere bakiriye inyandiko z’ibihugu bibiri zemeza burundu ishyirwaho ry’isoko rusange rya Afurika, AfCFTA, ari nabyo byaburaga ngo ritangire.

Izo nyandiko ni iza Sierra Leone na Repubulika ya Sahrawi, zatumye aya masezerano yemezwa burundu n’ibihugu 22 byari bikenewe ngo atangire gushyirwa mu bikorwa.

Aya masezerano yasinyiwe i Kigali muri Werurwe 2018 biteganywa ko azahuriza ibihugu bigize uyu mugabane ku isoko ry’abaturage bagera kuri miliyari 1.2 batuye Afurika, n’ibihugu 55 bifite umusaruro mbumbe wa miliyari 2500 z’amadolari ya Amerika.

Azazamura ubucuruzi bukorwa hagati y’ibihugu bya Afurika busanzwe kuri 16%, igipimo kiri hasi cyane ugereranyije na 60% ibyo bihugu bikorana n’u Burayi na 50% bikorana Aziya.

Ibi bihugu bibiri byatanze inyandiko zabyo byatumye uyu mugabane utera intambwe ikomeye, kuko ingingo ya 23 y’amasezerano ya AfCFTA iteganya ko azatangira gushyirwa mu bikorwa nyuma y’iminsi 30 igihugu cya 22 gitanze muri AU inyandiko ziyemeza burundu, ari byo Repubulika ya Sahrawi yakoze none.

Ibyo bisobanuye ko amasezerano ya AfCFTA azatangira gushyirwa mu bikorwa ku wa 30 Gicurasi 2019.

Umuyobozi wa Komisiyo ya AU yashimiye ibi bihugu byiyemeje gutera intambwe ngo bikureho imbogamizi zari ziziritse ubukungu bwa Afurika n’isoko ryo kuri uyu mugabane, bigatangira urugendo ruzahanga isoko ryagutse, rukongera ubucuruzi n’ishoramari.

Nk’uko AU yabitangaje, “igisigaye ubu ni uko Umuryango wa Afurika Yunze Ubumwe n’abaminisitiri bashinzwe ubucuruzi muri Afurika barangiza amasezerano azafasha mu ishyirwa mu bikorwa rya AfCFTA mu nama idasanzwe y’abakuru b’ibihugu ba za guverinoma izaba ku wa 7 Nyakanga 2019.”

Ibigomba kubanza kwemeranywaho harimo ibirebana n’inkomoko y’ibicuruzwa, ibijyanye n’imisoro, uburyo bwo kwishyurana n’ubwo gukurikirana ubucuruzi.

Biteganyijwe ko ba Minisitiri b’ubucuruzi bazahurira i Kampala muri Uganda mu cyumweru cya mbere cya Kamena uyu mwaka, ngo basuzume ingingo zizajyana n’ayo masezerano mbere y’inama y’abakuru b’ibihugu na za guverinoma.

Repubulika ya Sahrawi yabaye igihugu cya 22 cyemeje AfCFTA
AU yamaze kwakira inyandiko z'ibihugu 22 byemeje AfCFTA

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza