Centrafrique: Abagera kuri 15 baguye mu mirwano hagati y’ingabo za Loni n’inyeshyamba

Yanditswe na Mukaneza M.Ange
Kuya 3 Nyakanga 2017 saa 01:04
Yasuwe :
0 0

Abantu bagera kuri 15 baguye mu mirwano hagati y’Ingabo z’Umuryango wa Abibumbye zishinzwe kubungabunga amahoro muri Centrafrique, MINUSCA, n’Inyeshyamba zahoze mu mutwe wa Seleka.

Iyi mirwano yabaye kuwa Gatandatu mu isoko ryo mu mujyi wa Kaga-Bandoro, ubwo izi nyeshyamba ziganjemo abayisilamu zagabaga igitero kigamije kwihorera.

Umwe mu bantu bari mu buyobozi muri MINUSCA yabwiye AFP ko izi nyeshyamba zarwanye n’ingabo zikomoka mu Burundi no muri Pakistan zibarizwa muri uyu mujyi.

Yakomeje avuga ko ingabo za MINUSCA zakoze neza inshingano zo kurinda abaturage batuye muri uyu mujyi, uherereye muri kilometero 400 uvuye mu majyaruguru y’umurwa mukuru Bangui.

Kuva muri Gicurasi 2017, mu mujyi wa Kanga-Bandoro uherereye mu gace ka Nana-Grebizi katujwemo impunzi zigera ku bihumbi 20, hakunze kugaragara imvururu za hato na hato.

Iyi mirwano ibaye mu gihe mu kwezi gushize imitwe itavuga rumwe na leta yashyize umukono ku masezerano yo gushyira intwaro hasi no guharika intambara yatangiye mu 2013, ubwo umutwe wa Seleka wahirikaga ku butegetsi perezida François Bozize.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza