Kwamamaza

Abakuru b’ibihugu byo muri ICGLR bategerejwe i Luanda kwiga ku bibazo bya Congo

Yanditswe kuya 7-10-2016 saa 20:12' na Rabbi Malo Umucunguzi


Ikibazo cy’amatora akomeje guteza umwuka mubi muri Repubulika Iharanira Demokarasi ya Congo (RDC), kigiye gukoranya abakuru b’ibihugu by’akarere k’ibiyaga bigari, i Luanda muri Angola ku wa 29 Ukwakira uyu mwaka.

Ni inama yateguwe ku bufatanye bw’Inama Mpuzamahanga y’Akarere k’Ibiyaga Bigari (ICGLR), Umuryango w’Abibumbye,Umuryango ugamije Iterambere ry’Ibihugu bya Afurika y’Amajyepfo (SADC) n’Umuryango wa Afurika Yunze Ubumwe (UA).

RFI ivuga ko yateganywaga mu gihe kitari icya vuba, ariko imyigaragambyo yo kuwa 19 Nzeri yahitanye abasaga 53 no kuba impande zihanganye muri RDC zarananiwe kumvikana ku ngengabihe ikwiye y’amatora, byatanze indi sura kuri iyi nama bigaragaza ko ikenewe mu maguru mashya.

Minisitiri w’Ububanyi n’Amahanga wa Angola, George Chikoti, yagize ati “‘Igihari cyo amatora ntabwo azashoboka kuzaba ku matariki yari ateganyijwe, mu mpera z’uyu mwaka. Ubu rero hari hakenewe igihe cy’inzibacyuho kugira ngo harangizwe neza ibijyanye na tekiniki n’ingengo y’imari bibura kugira ngo amatora akorwe.’’

Biteganyijwe ko impuguke za Afurika Yunze Ubumwe, Umuryango w’Abibumbye na ICGLR zizabanza guhura mu cyumweru gitaha.

Umuryango w’Abibumbye n’Umuryango wa Afurika Yunze Ubumwe kimwe n’abakuru b’ibihugu bigize Akarere k’Ibiyaga bigari, bategerejweho umusanzu wo kugaragaza icyakorwa mu migirire kimwe n’ingengo y’imari, ngo hategurwe amatora yihuse y’Umukuru w’Igihugu n’abagize Inteko Ishinga Amategeko.

Iyi nama iteguwe nyuma y’uko Komisiyo y’Igihugu y’Amatora muri Repubulika Iharanira Demukarasi ya Congo, itangarije ko amatora y’umukuru w’iki gihugu adashobora kuzaba mbere y’Ugushyingo 2018, ibintu byahise byamaganirwa kure n’abatavuga rumwe n’ubutegetsi bahise basaba Perezida Kabila kuzarekura ubutegetsi mu gihe manda ye izaba irangiye mu mpera z’Ukuboza 2016.

Bamusabye kandi kutazahirahira yiyamamariza manda ya gatatu mu gihe amatora azaba yamaze gutegurwa.

Uretse ikibazo cy’amatora yo muri Congo Kinshasa, aba bayobozi bazanareba ku bibazo by’umutekano mu Burundi, Sudani y’Epfo na Repubulika ya Centrafrique.

Abakuru b'ibihugu byo mu karere bategerejwe mu nama iziga ku bibazo by'amatora muri Congo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved