Dlamini Zuma arakomanga ku biro by’Umukuru w’Igihugu muri Afurika y’Epfo

Yanditswe na Cyprien Niyomwungeri
Kuya 17 Werurwe 2017 saa 08:28
Yasuwe :
0 0

Dr. Nkosazana Dlamini Zuma arahabwa amahirwe menshi yo kugaruka muri Guverinoma ya Afurika y’Epfo nyuma yo gusimburwa ku mwanya w’Umuyobozi Mukuru wa Komisiyo y’Umuryango wa Afurika yunze ubumwe, AU yayoboraga kuva mu 2012.

Uyu mugore wa mbere wayoboye Komisiyo ya AU, amaze iminsi agarukwaho muri politiki yo muri Afurika y’Epfo ndetse ari mu bahabwa amahirwe yo gusimbura Perezida Jacob Zuma wahoze ari umugabo we mu myaka yashize.

Hari amakuru aturuka mu bakomeye muri Guverinoma avuga ko ubwo Perezida Jacob Zuma azaba avugurura Guverinoma mu kwezi gutaha, azamugira umwe mu baminisitiri, nk’imwe mu nzira yoroshye yo kumutegurira kuzamusimbura.

Kuwa Gatatu w’iki cyumweru nibwo Dlamini Zuma yasubiye muri Afurika y’Epfo, aho yakiriwe ku kibuga cy’indege i Johannesburg n’amahuriro y’abagore n’urubyiruko, bavugaga ko hari akamaro gakomeye yagira muri Guverinoma.

Africa Review itangaza ko abashyigikiye Dlamini Zuma w’imyaka 67 basanga kumugira Minisitiri byamwongerera izina n’amahirwe yo gusimbura umugabo we ku buyobozi bw’ishyaka, ANC, gusa we ntaratangaza niba azatanga kandidatire ye kuri uwo mwanya.

Perezida Zuma byitezwe ko azegura ku buyobozi bw’ishyaka riri ku butegetsi rya ANC mu mpera z’umwaka, aherutse gutangaza ko biteguye gutanga umukandida w’umugore mu matora ateganyijwe mu 2019.

Umuminisitiri wungirije uzwiho kuba umwizerwa wa Jacob Zuma, yemeje ko bamwe mu bagize Guverinoma batakizerwa na Perezida bashobora gutakaza imyanya.

Yagize ati “Tuzi imigambi yo kumushyira [Dlamini] muri Guverinoma, kandi biragaragara ko ufite Abaminisitiri berekanye ko batari ku ruhande rwa Perezida, bamwe muri bo bashobora gusimbuzwa.”

Dr. Dlamini Zuma ashobora kutoroherwa no guhatana na Cyril Ramaphosa wungirije ku buyobozi bw’ishyaka ANC, kuko uzatsindira kuriyobora azaba ahabwa amahirwe yo gutsinda amatora y’Umukuru w’Igihugu ateganyijwe mu 2019. Kuva mu 1994 ishyaka ANC niryo shyaka ritsinda amatora.

Mbere yo kujya muri AU, Dr Dlamini-Zuma yigeze kuba muri Guverinoma ku myanya itatu itandukanye. Mu 1994, Perezida Nelson Mandela yamugize Minisitiri w’Ubuzima, Thabo Mbeki yamugize Minisitiri w’Ububanyi n’Amahanga mu 1999. Mu 2009 agirwa Minisitiri w’ibikorwa by’imbere mu gihugu.

Abasesenguzi barimo Susan Booysen, umwarimu muri Kaminuza ya Witwatersrand, yavuze ko gushyira Dlamini Zuma muri Guverinoma bishobora kuzamufasha cyane mu kwiyamamaza kuko ashobora guhabwa umwanya uzamwamamaza muri rubanda.

Dr Dlamini-Zuma yashakanye na Perezida Zuma, ariko baza gutandukana mu 1998 bafitanye abana bane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza