Kwamamaza

Ethiopia:Abahagarariye ibihugu byabo bashyiriweho aho batagomba kurenga

Yanditswe kuya 17-10-2016 saa 20:30' na Philbert Hagengimana


Gushyiriraho ahantu ntarengwa abahagarariye ibihugu byabo muri Ethiopia, ni imwe mu ngamba nshya zafashwe na Guverinoma ya Ethiopia mu rwego rwo gushyira mu bikorwa gahunda zo gucunga umutekano no kugarura umudendezo mu gihugu cyane cyane muri ibi bihe bidasanzwe.

Hashize iminsi umunani (8) Guverinoma ya Ethiopia itangaje ibihe bidasanzwe bizamara amezi atandatu (6), hakaba hafashwe ingamba nshya zishimangira izafashwe mbere mu rwego rwo kugarura amahoro n’umudendezo w’abaturage.

Izo ngamba zatangajwe ku Cyumweru tariki ya 16 Ukwakira, zirimo kuba hashyizweho ahiswe “Red Zone”, ingana n’ibirometero 50 uturutse ku mupaka, aho bibujijwe kuhageza intwaro kimwe no mu nkengero z’imihanda minini.

Abahagarariye ibihugu byabo muri Ethiopia babujijwe kurenga ibirometero 40 hanze y’Umujyi wa Addis Ababa “ku mpamvu z’umutekano wabo.”

Umwe mu bahagarariye ibihugu by’u Burayi yatangarije Ibiro Ntaramakuru by’Abafaransa AFP, ati “Ibi ni ibihe bidasanzwe kandi turateganya ko hashobora kubaho kwihimura. Icyakora turateganya ko abatavuga rumwe n’ubutegetsi bagiye guhabwa uruvugiro muri politiki nk’uko Umukuru w’Igihugu yabivugiye imbere y’Inteko Ishinga Amategeko.”

Guverinoma ya Ethiopia yanategetse ko abaturage bagomba kuguma mu nzu zabo hagati ya saa kumi n’ebyiri z’umugoroba na saa kumi n’ebyiri za mu gitondo , cyane cyane abaturiye inganda n’izindi nyubako za Leta, dore ko ari na zo ziherutse kwibasirwa n’abigaragambyaga mu byumweru bishize.

Abanyamadini babujijwe kwigisha ibirebana na politiki, amashyaka cyane cyane atavuga rumwe n’ubutegetsi abuzwa kongera gutanga amatangazo ahamagarira abantu kwigaragambya

Abakozi mu nzego z’umutekano na bo babujijwe kujya mu biruhuko cyangwa kutaboneka mu kazi kabo ka buri munsi. Izo ngamba kandi zatumye biba icyaha kureba televiziyo yashyizweho n’abatavuga rumwe n’ubutegetsi baba hanze y’igihugu nka ESAT na Oromia Media Network (OMN) ikorera muri Leta Zunze Ubumwe za Amerika.

Uretse kureba izo televiziyo, no gusangiza abandi aho bashobora kuzirebera (Links) ku mbuga nkoranyambaga ni icyaha. Ibyo byanajyanye no gufunga internet muri telefoni ngendanwa mu gice kinini cy’igihugu, ibyo bikazamara ibyumweru bitatu.

Imvururu muri Ethiopia zatangiye muri Nzeri uyu mwaka, aho abaturage bo mu bwoko bwa Oromo n’aba Amhara bombi bagize 60% by’abatuye icyo gihugu, bigaragambyaga bamagana gukandamizwa na Guverinoma igizwe ahanini n’abo mu bwoko bwa Tigrayans, bihariye ubutegetsi ndetse n’ubukungu bwose bw’igihugu.

Ibyo byarushijeho kudogera nyuma y’aho Polisi yifashishije ibyuka biryana mu maso itatanya abo mu bwoko bwa Oromo bari mu iserukiramuco rishingiye ku madini kuwa 2 Ukwakira, bigateza imvururu zahitanye abantu bagera kuri 50.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved