Kwamamaza

Ethiopia: Leta yatangaje ibihe bidasanzwe mu gihugu hose

Yanditswe kuya 9-10-2016 saa 21:09' na Philbert Hagengimana


Nyuma y’imyigaragambyo ikaze imaze icyumweru ikorwa n’abigometse ku butegetsi, igahitana abatari bake n’imitungo myinshi ikangirika mu gihugu cyane mu gace ka Oromia, Minisitiri w’Intebe wa Ethiopia, Hailemariam Desalegn, yatangaje ibihe bidasanzwe mu gihugu hose.

Mu Itangazo ryatambutse kuri Televiziyo mu gitondo cyo kuri ’iki cyumweru,

Minisitiri w’Intebe Hailemariam yatangaje ibihe bidasanzwe kubera iyangirika rikabije ry’imitungo ya rubanda, ahanini bitewe n’imyigaragambyo ikorwa n’abaturage bo mu bwoko bw’aba Oromo.

France24 dukesha iyi nkuru ivuga ko Minisitiri w’Intebe Hailemariam yavugiye kuri Televiziyo y’Igihugu ati “Dushyira imbere umutekano w’abaturage bacu, ikirenze kuri ibyo, dushaka guhagarika burundu iyangirika ry’umutungo n’ibindi bikorwa remezo nk’ibigo by’amashuri, ibigo nderabuzima inyubako z’ubuyobozi ndetse n’ingoro z’ubutabera.”

Yongeyeho ati “Ibimaze iminsi bibera muri Ethiopia byashyize igihugu mu kangaratete. Ibihe bidasanzwe ntibizahungabanya uburenganzira bw’ibanze bwa muntu nk’uko biteganywa n’Itegeko Nshinga, nta n’icyo bizahungabanya ku burenganzira bushingiye kuri dipolomasi nk’uko buteganywa mu masezerano ya Vienna.”

Ibitangazamakuru byo muri iki gihugu byatangaje ko ibi bihe bidasanzwe biza gutangarizwa abaturage ku mugoroba wo kuri iki cyumweru.

Hatangajwe ibihe bidasanzwe muri Ethiopia nyuma y’igihe kirenga icyumweru hafunzwe internet mu gihugu hose, icyo cyemezo kikaba cyarafashwe bitewe n’uko abatavuga rumwe n’ubutegetsi baba hanze y’igihugu bifashishaga imbuga nkoranyambaga bagategura imyigaragambyo bakanaha ubufasha abayikora.

Imyigaragambyo muri Oromia yahitanye abantu bagera kuri 50 ku wa 2 Ukwakira, ubwo Polisi yakoreshaga imyuka iryana mu maso ndetse n’amasasu kugira ngo itatanye ikivunge cy’abigaragambyaga ahitwa Bishoftu.

Iyo myigaragambyo y’abatavuga rumwe n’ubutegetsi yakomeje ku cyumweru gishize, aho abigaragambya bari bafunze imihanda yose yo mu nkengero z’umujyi wa Addis Ababa, Umurwa Mukuru wa Ethiopia, bafungishije amabuye ku buryo nta modoka zabashaga gutambuka.

Imyigaragambyo muri Ethiopia yadutse mu Ugushyingo umwaka ushize, nyuma y’aho hatangajwe umugambi wo kwagura Umujyi wa Addis Ababa bikagera no mu gace ka Oromia, byatumye abahinzi n’aborozi bo muri ako gace bagira impungenge n’ubwoba byo kwimurwa.

Nubwo uwo mugambi waje guhagarikwa, ntibyabujije imyigaragambyo gukomeza kubera ibibazo abayikora bagaragaza birimo guhezwa mu bya politiki no kutubahiriza uburenganzira bwa muntu.

Imyiragambyo nk’iyo yabaye no mu kwezi kwa munani (Kanama), ihitana abasaga 100 nkuko umuryango uharanira uburenganzira bwa muntu, Amnesty International wabitangaje.

Hailemariam Desalegn yavuze ko ibihe bidasanzwe igihugu kigiye kujyamo bitazahungabanya abaturage

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved