Gambia: Perezida Jammeh yirukanye ba ambasaderi 12 bamusabye kuva ku butegetsi

Yanditswe na Jean Pierre Tuyisenge
Kuya 10 Mutarama 2017 saa 02:15
Yasuwe : XX
0 0

Perezida wa Gambia Yahya Jammeh yirukanye ba ambasaderi 12 bamusabye kuva ku butegetsi akabusigira Adama Barrow watsinze amatora yo ku wa 1 Ukuboza 2016.

Amakuru agera kuri Jeune Afrique aturuka kuri umwe mu bakozi ba Minisiteri utashatse ko amazina ye atangazwa avuga ko Guverinoma ya Gambia yahamagaje abambasaderi 12 nyuma yo kubahagarika ku mirimo yabo.

Yavugaga ati “Sinzi impamvu Yahya Jammeh yabirukanye ariko icyo nababwira ni uko ari abambasaderi bashimiye Perezida Adama Barrow watowe bakanamwifuriza intsinzi.”

Abirukanywe ni abahagarariye Gambia mu bihugu birimo Leta Zunze Ubumwe za Amerika, Sénégal, u Bwongereza, u Bushinwa, u Burusiya, Cuba, Guinée-Bissau, Turikiya, Ethiopie, u Bubiligi, Espagne no mu Muryango w’Abibumbye, bose bari bandikiye ibaruwa Perezida Jammeh imusaba kuva ku butegetsi.

Igitutu cy’amahanga

Kuva yahindura imvugo akavuga ko amatora yakozwe nabi nyamara yari yabanje gutangaza ko yemera ibyayavuyemo, Perezida Jammeh yokejwe igitutu n’amahanga ngo azave ku butegetsi ubwo manda ye izaba irangiye ku wa 19 Mutarama 2017.

Umuryango w’Ubukungu w’Ibihugu byo mu Burengerazuba bwa Afurika (CEDEAO) ugizwe n’ibihugu 15 wagejeje intumwa mu Murwa Mukuru Banjul zo kugarura amahoro ku wa 13 Ukuboza 2016, ariko nta musaruro byatanze ndetse hakomeje kuba izindi nama ziga kuri icyo kibazo.

Nubwo hari icyo gitutu ariko, Perezida Jammeh ku itariki ya 20 Ukuboza 2016, yatangaje ko atazava ku butegetsi, kereka gusa Urukiko rw’Ikirenga rutangaje umwanzuro warwo kuri ayo matora.

Icyo gihugu cyahoze gikoronizwa n’u Bwongereza gikunze kwitabaza abanyamategeko bo mu bindi bihugu by’ibituranyi bikoresha Icyongereza cyane cyane abakomoka muri Nigeria kugira ngo batere imbaraga inzego zabo z’ubutabera.

Gambia iciye mu bihe by’imvururu byavutse kuva haba amatora yo ku itariki ya mbere Ukuboza 2016, Perezida Jammeh yashimiye Adama watowe nyamara ku wa 9 z’uko kwezi yongera kumvikana anenga ibyayavuyemo ndetse anavuga ko azakomeza kuyobora icyo gihugu.

Perezida Jammeh umaze imyaka 22 ayobora Gambia, yatsinzwe na Adama Barrow nyuma aza kugeza mu butabera ikirego cy’uko amatora yabayemo uburiganya mu kubara amajwi, asaba ko yateshwa agaciro.

Perezida Yahya Jammeh yirukanye abambasaderi 12 bamusabye kuva ku butegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE