Guverinoma ya Tanzania yasubije mu kazi abakozi barenga 4000 bari barirukanywe

Yanditswe na Ferdinand Maniraguha
Kuya 7 Gicurasi 2019 saa 07:54
Yasuwe :
0 0

Guverinoma ya Tanzania yatangaje ko yasubije mu kazi abakozi 4,160 mu 9,900 birukanywe mu 2017 bashinjwa gukoresha impamyabumenyi z’impimbano.

Ubwo yari mu Nteko Ishinga Amategeko kuri uyu wa Mbere tariki ya 6 Gicurasi 2019, Minisitiri wungirije mu Biro bya Perezida ushinzwe Imirimo rusange n’Imiyoborere Myiza, Mary Mwanjelwa, yavuze ko abo bakozi basubijwe mu kazi nyuma yo kubona ko bari babibeshyeho.

Yavuze ko bamaze kwirukanwa, bamwe muri bo bajuriye hakorwa isuzuma bagasanga koko bararenganyijwe.

Yagize ati “Twakurikiraniye hafi icyo kibazo, tuza gusanga abagera kuri 4160 barakuwe ku rutonde rw’abakozi ba Leta mu buryo butari bwo.”

Mwanjelwa yavuze ko benshi muri abo bakozi bahawe akazi mu nzego z’ibanze, nkuko Ibiro Ntaramakuru by’Abashinwa, Xhinua byabitangaje.

Muri Mata 2017 nibwo Perezida John Pombe Magufuli yategetse ko abakozi basaga 9900 birukanwa nyuma y’igenzura ryakozwe mu gihugu hose bikaza kugaragara ko hari abafite impamyabumenyi z’inkorano.

Ibyo byabaye nyuma y’uko muri Werurwe 2016 hakozwe irindi genzura rigasanga hari abakozi basaga 19,700 bari ku rutonde rw’abahembwa kandi badakora.

Tanzania ikoresha miliyoni zisaga 260 z’amadolari buri kwezi ku mishahara y’abakozi ba Leta.

Minisitiri wungirije mu Biro bya Perezida ushinzwe Imirimo rusange n’Imiyoborere Myiza, Mary Mwanjelwa, yavuze ko abakozi bari birukanwe basubijwe mu kazi nyuma yo kubona ko bari babibeshyeho
Perezida John Pombe Magufuli yategetse ko abakozi basaga 9900 birukanwa muri Mata 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza