Kwamamaza

Haracyategerejwe ko ukuri ku rupfu rwa Sankara gushyirwa ahagaragara

Yanditswe kuya 15-10-2016 saa 17:06' na Ntakirutimana Deus


Umwunganizi w’umuryango wa Thomas Sankara wayoboraga Burkina Faso aratangaza ko bategereje ukuri ku rupfu rwe nubwo babona urubanza rwe rurimo gutinda, ariko ngo icy’ibanze ni uko igihe cyose ukuri kuzashyirirwa ahabona.

Me Bénéwendé Sankara yabitangaje ku wa Gatatu tariki ya 12 Ukwakira 2016, mu kiganiro yagiranye n’itangazamakuru i Ouagadougou.

Ni mu gihe hibukwa urupfu rwa Thomas Sankara wishwe tariki ya 15 Ukwakira 1987.
Jeune Afrique dukesha iyi nkuru yatangaje ko Me Bénéwendé yatangaje ko iperereza ku bakekwaho kwica Sankara ryatangiye muri Mutarama 2015.

Urwo rupfu rukurikiranyweho abantu 26 ndetse abantu bagera ku 100 bakaba barumviswe mu mezi 22 barimo n’abanyapolitiki.

Bénéwendé yavuze ko iyo dosiye irimo kugenda gahoro, ariko bizeye ko izaca mu mucyo.

Ati “Isi ya none by’umwihariko urubyiruko rw’Afurika, bategereje urwo rubanza. Icy’ibanze si igihe, ahubwo igikomeye ni ukugaragaza ukuri, vuba cyangwa bitinze.”

Mu bakekwa barimo gukurikiranwa harimo Gen Gilbert Diendéré wahiritse ubutegetsi muri Burkina Faso ntibimuhire , Gabriel Tamini, umunyamakuru wari n’umujyanama wihariye wa perezida Blaise Compaoré n’abandi.

Uwo mucamanza kandi ari mu nzira zo gutangaza inyandiko zo guta muri yombi Blaise Compaoré, Hyacinthe Kafando bari muri Côte-d’Ivoire bakekwa kugira uruhare muri urwo rupfu.

Mu bamaze kumvwa mu iperereza, barimo Salifou Diallo Perezida w’Inteko Ishinga Amategeko y’icyo gihugu, Étienne Traoré wahoze ari umudepite, ndetse na Basile Guissou wari Minisitiri w’Ububanyi n’Amahanga ku bwa Sankara.

Sankara yishwe tariki ya 15 Ukwakira 1987 n’ingabo zitaramenyekana. Yavugaga ko imfashanyo amahanga aha Afurika ari amadeni bayishyiraho, ntacyo ziyimariye, ahubwo zituma abanyafurika bahora batekereza gutegera amaboko abazungu.

Yashimangiraga ko abanyafurika bagomba guharanira kuzihagarika biciye mu gukora cyane, kuko bisanzwe ko uguha ibyo kurya agutegeka cyane.

Mu 1984 ari muri Amerika, mu mujyi wa New York, yasuye abirabura bo muri Amerika bahatuye abibutsa umugabane wabo bavanyweho bunyago bajya gukoreshwa imirimo y’agahato n’uburetwa.

Sankara yaraswe n’abagore kuko yabaye umuyobozi wa mbere muri Afurika winjije abagore benshi mu buyobozi.

Yarwaniriye uburenganzira bw’abagore n’abakobwa cyane arwanya umuco wari uri mu mashuri wo kwirukana abakobwa batwite kandi abahungu babateye inda bigaramiye.

Umurava we, ubwenge no kwanga abapfobya abanyafurika muri rusange byatumye Sankara akundwa bitavugwa n’abanyafurika, biba akarusho azimanganya izina Haute Volta, abakoloni bari barise igihugu cye, acyita Burukina Faso, ubutaka bw’abantu bashyize hamwe.

Yanze gukoresha imodoka zihenze yagenerwaga n’ubutegetsi, akoresha izidahenze mu rwego rwo kutarya imitsi ya rubanda.

U Bufaransa bwakunze kugaragaza ko butishimiye Sankara waje no kwicwa, bikavugwa ko yagambaniwe na Compaoré wari inshuti ye magara.

Blaise Compaore, Thomasa Sankara na Jerry Rawlings wahoze ayobora Ghana tariki ya 28 Nzeri 1983

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved