Huawei igiye kugeza muri AU interinet ya 5G iherutse kwamaganwa na Amerika

Yanditswe na Habimana James
Kuya 1 Kamena 2019 saa 06:49
Yasuwe :
0 0

Sosiyete yo mu Bushinwa ikomeye mu by’itumanaho, Huawei yasinyanye amasezerano n’Umuryango wa Afurika Yunze Ubumwe (AU) y’ubufatanye mu bikorwa by’ikoranabuhanga.

Ni amasezerano yasinywe hagati y’umuyobozi mukuru wungirije wa AU, Amb. Thomas Kwesi Quartey na visi Perezida wa Huawei muri Afurika y’Amajyaruguru Philippe Wang.

Aya masezerano akubiyemo ubufatanye mu by’ikoranabuhanga (ICT), intego nyamukuru y’aya masezerano ikaba ari ukongera ubufatanye n’uyu muryango nko gukwirakwiza internet yihuta (Broadband) no guha uyu muryango interinet igezweho ya 5G n’ibindi.

Mu minsi ishize Perezida wa Leta Zunze Ubumwe za Amerika, Donald Trump yasinye iteka rishyiraho ibihe bidasanzwe mu gihugu, rigatanga uburenganzira bwo guhagarika zimwe muri sosiyete z’ikoranabuhanga zikekwaho kubangamira umutekano wa Amerika.

Muri sosiyete zatunzwe agatoki harimo Huawei na Internet yayo yo mu bwoko bwa 5G bivugwa ko ari amayeri u Bushinwa bwifashisha bukora ibikorwa by’ubutasi ku bindi bihugu.

Umuryango wa Afurika Yunze Ubumwe wo wavuze ko aya masezerano aha amahirwe amashami atandukanye yawo gukorana na Huawei mu bice bitandukanye by’ikoranabuhanga, harimo gukumira ibyaha byo kuri interineti, guteza imbere uburezi, ubuzima n’ibindi.

Mu gihe cy’imyaka itatu aya masezerano azamara, uyu muryango wavuze ko aje yubakiye ku yandi izi mpande zombi zari zasinyanye mu 2015.

Aya masezerano kandi akubiyemo guhugura abakiri bato kuri uyu mugabane ngo bagire ubumenyi mu by’ikoranabuhanga, bibe n’amahirwe yo kwihangira imirimo.

Philippe Wang, yagize ati “Ubu bufatanye na AU buragaragaza icyizere uyu muryango ukomeje kugirira sosiyete ya Huawei, iki gikorwa cyakozwe kigomba kuvanaho ibihuha by’uko hari amabanga ya AU ajyanwa na Huawei, uyu muryango ugenzura mu buryo bw’ikoranabuhanga ibice byayo byose kandi nta kigaragazwa n’ibihuha bimaze umwaka bivugwa mu bitangazamakuru.”

Naho Thomas Kwesi Quartey we yavuze ko muri aya masezerano, barimo kwishimira kugirana ubufatanye na Huawei, ikigo avuga ko gikomeye mu buvumbuzi n’ubushakashatsi mu by’ikoranabuhanga.

Mu mwaka ushize ikinyamakuru ‘Le Monde’ cyo mu Bufaransa, cyanditse inkuru yavugaga ko u Bushinwa bumaze imyaka irenga itanu bwumviriza ibyo abayobozi ba Afurika baganirira mu nyubako bwubakiye Umuryango wa Afurica Yunze Ubumwe, iherereye i Addis-Ababa muri Ethiopia.

Iyi nyubako y’amazu 20 agerekeranye, yubatswe n’u Bushinwa ku nkunga ingana na miliyoni 200 z’amadorali ya Amerika, ikaba yaruzuye mu mwaka wa 2012 ihita ihabwa ubuyobozi bw’uyu muryango.

U Bushinwa buvuga ko kubakira Abanyafurika iyi nyubako, bigaragaza ubushuti buri hagati yabwo na Afurika.

Gusa iki kinyamakuru cyavuze ko muri iyi nyubako ihurirwamo n’abakuru b’ibihugu 54 bya Afurika, hashyizwemo utwuma dutanga amakuru mu Bushinwa ku bintu byose bikorerwamo.

Abayobozi ku mpande zombi bamaganye aya makuru, bavuga ko ari ibihuha bikwirakwizwa n’ibihugu byo mu Burengerazuba bw’Isi na Amerika, bitishimiye uburyo u Bushinwa burimo gufatanya na Afurika.

Huawei ni rumwe mu nganda zikomeye zicuruza ibikoresho byifashishwa mu itumanaho ndetse ikaba iya kabiri mu gukora telefone zigezweho ku Isi.

AU yizeye kugezwaho ibikorwa by'ikoranabuhanga na Huawei y'u Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza