Ibendera rya Maroc ryongeye kuzamurwa ku cyicaro cya AU

Yanditswe na Rabbi Malo Umucunguzi
Kuya 13 Werurwe 2017 saa 06:34
Yasuwe :
0 0

Ibendera ry’ubwami bwa Maroc ryongeye kuzamurwa ku cyicaro cy’Umuryango wa Afurika Yunze Ubumwe (AU) i Addis Ababa muri Ethiopie, nyuma y’imyaka isaga 30 iki gihugu cyivanye mu muryango uhuza ibihugu bigize uyu mugabane.

Uyu muhango wabaye kuri uyu wa Mbere, tariki 13 Werurwe 2017, urashimangira umwanzuro wafatiwe mu nama ya 28 y’Abakuru b’ibihugu yaberaye i Addis Ababa kuwa 30 Mutarama 2017, bemera kongera kwakira Maroc yari yarivanyemo mu 1984.

Ibihugu 39 muri 54 byemeye ko Maroc igaruka mu muryango ariko ibindi bisigarana ingingimira, Perezida Alpha Condé uri kuyobora AU ahita atangaza ko ubwiganze bugomba gutsinda, Maroc iba Umunyamuryango wa 55 wa AU.

Perezida wa Komisiyo ya AU ucyuye igihe, Dr Nkosazana Dlamini Zuma, yifashishije Twitter yatangaje igikorwa cyo kongera kuzamura ibendera rya Maroc “nk’indi ntambwe itewe mu guha ikaze ubwami bwa Maroc mu muryango.”

Maroc yatangiye gusaba kugaruka muri AU mu nama ya 27 y’Abakuru b’Ibihugu bya Afurika yabereye i Kigali, ivuga ko ikeneye gusubirana umwanya yahoranye kuri uyu mugabane.

Maroc yavuye mu muryango uhuza ibihugu bya Afurika ukiri OUA, nyuma yo kwakira Repubulika ya Sahara nk’umunyamuryango wuzuye kandi Maroc iyifata nk’intara yayo, itanafite ubwigenge busesuye.

Maroc yemerewe kugaruka mu ihuriro ry’ibindi bihugu nyuma y’imyaka isaga 10 umwami Mohammed VI agirana ibiganiro bya dipolomasi n’abakuru b’ibihugu batandukanye ba Afurika, bagasinyana amasezerano y’ishoramari rikomeye n’ubufatanye, harimo n’ayasinyiwe mu ruzinduko yagiriye mu Rwanda mu Ukwakira 2016.

Icyatumye Maroc iva muri OUA kiracyahari

Ubwo Maroc yasabaga kugaruka muri AU, yakunze kuvuga ko OUA yakoze ikosa ryo kwemera Repubulika ya Sahara nyamara itaremerwa n’Umuryango w’Abibumbye, Ihuririro ry’ibihugu byemera Islam, Ibihugu by’Abarabu cyangwa undi muryango w’akarere uwo ariwo wose. Byongeye kuva mu 2000, ibihugu 36 bimaze kwambura uburenganzira icyo gihugu yita “icya baringa.”

Umwe mu ntumwa zari zihagarariye Mauritanie mu nama ya 28 i Addis Ababa yavuze ko hakiri impungenge ku bihugu bimwe bya Afurika, ariko ati « Twizere ko Maroc izemera gukorana na Repubulika ya Sahara.»

Maroc ubu ni umunyamuryango wemewe wa AU, ariko iracyafashe 80% by’ubutaka bwa Afurika y’Iburengerazuba yo yita intara yayo y’amajyepfo, kandi ubu bombi ni abanyamuryango bemewe ba AU, ibintu bitemerwa n’abarimo Perezida Robert Mugabe wa Zimbabwe.

Gusa Minisitiri w’Ububanyi n’Amahanga wa Sahara, Mohamed Salem Ould Salek, we yavuze ko Maroc yemeye amabwiriza AU igenderaho, igisigaye ari ukureba niba izayubahiriza.

Nubwo Maroc yagarutse muri AU, hari ibihugu bisaga 10 byagaragaje ingingimira birimo Algeria, Afurika y’Epfo na Angola basabaga ko Maroc igaruka mu muryango ariko igashyirirwaho akanama kazakurikirana ukugaruka kwayo, hagenzurwa ko yubahiriza amabwiriza agenga umuryango.

Abayobozi batandukanye bakurikiye izamurwa ry'ibendera rya Maroc kuri AU
Ibendera rya Maroc rimaze kuzamurwa ku cyicaro cya AU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244