Ibyo guca ikorwa n’icuruzwa ry’amashashi muri EAC bishobora kuzagorana

Yanditswe na Evariste Nsengimana
Kuya 11 Werurwe 2017 saa 04:05
Yasuwe :
0 0

Abacuruzi bo mu bihugu bigize Umuryango wa Afurika y’Uburasirazuba (EAC), bagaragaje impungenge z’igihombo cyaterwa no guca icuruzwa n’ikoreshwa ry’amashashi, basaba ko bahabwa igihe gihagije cyo gusuzuma neza umushinga w’itegeko ugena iki cyemezo.

Uyu mushinga wo guca ikorwa, ikoreshwa n’icuruzwa ry’amashashi muri EAC, watanzweho icyifuzo ubugira kabiri n’umudepite uhagarariye u Rwanda mu Nteko yawo, Hajabakiga Patricia, mu nama yari yateraniye i Arusha muri Tanzaniya, muri Kanama 2016, nyuma y’uko utemerejwe mu nama y’abakuru b’ibihugu bigize uyu muryango, yateranye mu 2013.

Ni umushinga watangijwe hagamijwe kubungabunga ibidukikije by’umwihariko, hafatwa ingamba zo kubuza ikorwa, icuruzwa n’ikoreshwa ry’amashashi mu bihugu bigize uyu muryango.

The New Times ivuga ko ubwo abagize ihuriro by’abacuruzi bo muri aka karere (EABC) bahuraga n’abadepite bo muri EALA muri iki cyumweru, hano i Kigali, umuyobozi waryo Lilian Awinja yongeye kubahamiriza ko nubwo uyu mushinga ari mwiza, bakeneye kubanza kuwusuzuma byimazeyo mbere yo kwemezwa.

Yagize ati “Turasaba dukomeje ko mwaduha umwanya twebwe abikorera tugasuzuma neza uwo mushinga, tugatanga ibitekerezo byacu kuri EALA mbere y’uko ushyirwaho umukono.”

Ibyi byashigikiwe n’abandi bacuruzi bo muri iryo huriro harimo n’umunyarwanda Dennis Karera, unaribereye umuyobozi mukuru wungirije, wavuze ko uyu mushinga bakwiye kubanza kuwiga neza, bakawutangaho ibitekerezo.

Ibihugu bya Uganda na Kenya byakomeje kugira impungenge kuri uyu mushinga w’iri tegeko bitewe n’igihombo bibona uzateza, bigasaba ko hagira amategeko agena ikoreshwa n’icuruzwa ry’amashashi aho kuyahagarika burundu. By’umwihariko muri Kenya bagaragaza ko hariyo inganda zikora amashashi, ku buryo zigira uruhare mu kuzamura ubukungu bw’iki gihugu binyuze mu gutanga imisoro, gutanga akazi ku batagafite n’ibindi.

Godfrey Ssali, umusesenguzi akaba n’umuvugizi w’ihuriro ry’abanyenganda muri Uganda, avuga ko muri uyu mushinga hakwiye kwibanda ku gushyiraho amategeko agenga ikorwa n’icuruzwa ry’amashashi kuko atari byo byangiza ibidukikije gusa, hagashyirwaho n’ibihano k’utayubahirije nk’uko bikorwa ahandi.

Avuga kandi ko harebwa uburyo bwiza bwo kwita ku ikoreshwa ryayo ku buryo bitabangamira ibidukikije ku kigero cyo hejuru.

Ssali akomeza agaragaza impungenge zishingiye ku gihombo inganda nyinshi zo mu muryango wa Afurika y’u Burasirazuba zaterwa n’iyubahirizwa ry’iri tegeko, aho avuga ko hinjizwa miliyoni zirenga 250 z’amafaranga ava mu icuruzwa ry’amashashi mu bihugu bituranyi na EAC nka Somalia, Ethiopia, Congo na Repubulika ya Centrafrique.

U Rwanda rwatangiye guhagarika ikoreshwa ry’amashashi no kuyinjiza mu gihugu mu 2005, mbere y’uko mu 2008 hashyirwaho itegeko rikumira ikoreshwa n’iyinjizwa ryayo mu gihugu hagamijwe kurengera ibidukikije.

Ku rwego mpuzamahanga, ibihugu birimo Bangladesh, Botswana, Israel, n’u Bufaransa na byo byamaze kwemeza iri tegeko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244