Kwamamaza

Ibyo nabonye: I Cotonou ruswa iraganje, abatega moto babayeho ku bugenge (Amafoto)

Yanditswe kuya 16-11-2016 saa 13:38' na Munyengabe Murungi Sabin


Cotonou, umurwa mukuru w’ubukungu n’ubutegetsi muri Benin ukaba ku isonga mu duce dukorerwamo ubucuruzi bufatwa nk’ingingi mwikorezi ya byinshi mu bihugu bya Afurika y’Uburengerazuba.

Ntaragera i Cotonou nasomaga inkuru zivuga ku bukungu bw’iki gihugu nkibwira ko ibintu byose biri ku murongo ariko nkigera ku kibuga cya Aéroport international Cardinal Bernardin Gantin nasanze ibyo nabwiwe mbere yo gufata indege ngo njyeyo byose bishobora kuba ari ibinyoma. Nkijya guteza visa muri Passport umupolisi umwe mu babishinzwe yahise ambwira ko ‘biri bukorwe ari uko muhaye amafaranga bitaba ibyo ngasiga ibyangomba nkazagaruka.’

Namwambuye passport yanjye ndayisubirana, bagenzi banjye twari kumwe na bo mbona byabayobeye kuko mu Rwanda ntitumenyereye kugura serivise. Umukozi umwe ukomeye muri Rwandair mu Mujyi wa Cotonou yahise adusanga atubaza uko bimeze, tukibimubwira atubwira ko agiye kudufasha kubona iyi serivise bitagombeye gutanga ruswa. Kuri we byari byoroshye kuko arubashywe ku kibuga cy’indege.

Byari mu masaha ashyira saa yine z’ijoro, yadusabiye serivise bayimuha bigoranye gusa umupolisi wadutereyemo visa arangije twamuhaye amafaranga igihumbi y’ama CFA arishima cyane ndetse atubwira ko ‘duhawe ikaze muri Benin’.

Igitangaje cyane rero, mu biro by’umuyobozi mukuru w’abashinzwe abinjira n’abasohoka twasanzemo umupolisi mukuru w’umugore aryamye ku mufariso muto yiyoroshe igitenge. Narongeye ndatungurwa! Nahise mbaza uwo mukozi wa Rwandair impamvu ushinzwe umutekano aryama mu biro kandi hari gutangirwa serivise yaransubije ati “Ni gutya aba hano bakora, ubu arashaka kubyuka mu gitondo agasinya avuga ko yakoze mu ijoro.”

Uwo mupolisi w’umugore yavugaga nabi cyane, yatwukaga inabi. Narongeye mbaza uwo mukozi wa Rwandair impamvu atubwira nabi, ansubiza ko ‘I Cotonou haba abantu bavuga nabi ndetse ko batabikorana ubugome ahubwo ko ariyo kamere yabo.’

Ntibyarangiriye aho, tugisohoka aho twafashe imizigo yacu dushaka inzira idusohora mu kibuga, ntabwo byatworoheye, twasanze hari umusaza wayifashe atubwira ko ‘agomba kudufasha kuyiterura ku ngufu ndetse tukamuha icyo arya’. Naratangaye, nagerageje kumubwira ko ‘imizigo itaremereye aratsimbarara, wa mugabo wadufashije araza aramukabukira amubwira ko aduha ituze dusohoka ubwo’.

Burya Polisi y’u Rwanda ni ntamakemwa

Mu nzira dusohoka mu kibuga cy’indege twahuye n’umupolisi mukuru, umwe mu bari mu kazi k’ijoro, yahise ahamagara Miss Kwizera Peace twari kumwe dusohoka amubwira ko asubira inyuma, undi yatubwiye ko abashinzwe umutekano bamusubije inyuma bityo ko agomba kujya kubareba natwe tukamutegereza.

Uyu mupolisi yarabanje amusuhuza amuhobera mbyibazaho ariko sinabitindaho, baganiriye umwanya munini nkeka ko uyu mukobwa ashobora kuba yabuze bimwe mu byangombwa nanjye musanga aho bahagaze mubaza uko byagenze ansubiza mu Kinyarwanda ati ‘uyu mupolisi ari kunsaba numero ngo tujye tuvugana’, nahise mukurura turasohoka umupolisi aratsimbarara akomeza kuzimusaba undi amusubiza tugenda ko atumva Igifaransa’.

Nahise mbona uburyo abapolisi b’u Rwanda bafite ikinyabupfura cyo ku rwego rwo hejuru kuko abakora ku kibuga cy’indege cya Kanombe bubaha buri wese mu cyiciro cye. Abapolisi b’abagore basaka abagenzi b’igitsinagore, abagabo na bo bikaba uko, ariko i Cotonou rwose umupolisi w’umugabo ajagajaga ibikapu by’abagore ubona nta soni bimuteye.

No mu bapolisi bato bacungaga umutekano wabonaga bitegereza umukobwa barangiza bakamubwira amagambo atari ay’ubupfura arimo no kumwubahuka, ibidashobora kuranga umupolisi w’u Rwanda nubwo byagenda bite.

Kubwirwa nabi ntabwo byarangiriye ku kibuga cy’indege, n’abatwakiriye kuri hoteli wumvaga bakubwira bati ‘Zana passport yawe byihuse uri kuntinza’. Iyo wajijinganyaga ugashaka kugira ikindi umubaza yahita afata undi mukiriya cyangwa akajya kuri WhatsApp yakongera guhuguka akabona kukwakira nabwo nabi.

Umunsi wakurikiyeho najyanye n’inshuti yanjye ituye i Cotonou kureba isoko mpuzamahanga rya ‘Dantokpa Market’ kugira ngo ndebe ibitangaje rirusha andi maguriro mato nagezemo. Mbere yo kuryinjiramo twabanje kujya ku kibuga cy’indege kuvunjisha amafaranga, twasanze hari umubyigano ukomeye w’imodoka zashakaga kwinjira mu kibuga gusa nkabona hari zimwe zemererwa kwinjirira ahagenewe izisohoka nibaza impamvu biranyobera, umuntu twari kumwe ahita ambwira ko natwe tuhaca byoroshye kuko ngo ‘bisaba guha abasirikare barinda ikibuga amafaranga ubundi ukinjirira ahatemewe’, natwe twishyuye magana atanu y’ama CFA[Ahwanye na 660 frw] baratureka turinjira, ndibaza nti ibi bikozwe i Kigali byaba ari agahomamunwa.

Abakirisitu badakozwa inkweto

Cotonou ibarizwamo amadini n’amatorero atabarika gusa ubwiganze ni abakirisitu bagize 42,8% by’abaturage ba Benin. Ibarura ryakozwe mu mwaka wa 2002 ryagaragaje ko abaturage ba Benin 27.1% ari abagatolika, 24.4% Abayisilamu, 17.3% ni aba Vaudou, 10.4% abaporoso (barimo igice kimwe cy’abitwa Celestial bagize 5%, Methodist 3.2%, n’abandi baporoso bagiye mu yandi madini bagize 2.2%).

Muri Benin kandi harimo abaturage bemera imana zo mu bwoko butandukanye, abasenga umwuka, umuyaga, umuriro, amabuye, inyamaswa ziri ku Isi mu moko anyuranye, abatemera Imana n’ubundi bwoko bw’abiganjemo Abahinde bafite Imana zabo basenga.

Abakirisitu bantangaje cyane ni abitwa Celestial, abagabo bambara amakanzu maremare naho abagore bakambara aya makanzu bakarenzaho utugofero duto. Mu myemerere yabo ntibemerewe kwambara inkweto ndetse ngo nta musore ubarizwamo wemerewe gukundana n’umukobwa wo mu yandi madini.

Aba bose kandi basenga mu ndimi zitandukanye gusa bagahurira ku Gifaransa nubwo bose batakizi. Ibarura rya 2014 ryagaragaje ko 57,3 % by’abaturage ba Benin, abafite hejuru y’imyaka 15 bazi kwandika no gusoma Igifaransa mu gihe 58,6 bakivuga bakanacyumva ariko batabasha kucyandika. Uretse Igifaransa, muri Cotonou bakoresha izindi ndimi zirimo fon, yoruba, bariba (baatɔnum), goun, mina, adja, dendi n’urundi rwitwa haoussa.

Imana irebera abatega moto i Cotonou….

Mu Mujyi wa Cotonou habarurwa moto zitwara abagenzi zizwi nka Zemidjans zirenga 200,000. Aba bamotari bose nta mategeko ahari abagenga, buri wese akora mu buryo ashaka apfa kubona ikimutunga.

Uko barenga ibihumbi magana abiri batwara moto, bose nta byapa(plaque) biranga ibinyabiziga bagira. Ubwo nari muri uyu mujyi hari ikiganiro cyakozwe kuri Radio y’Igihugu ya Benin abashinzwe kurengera ubusugire bw’Umujyi wa Benin bavuga ko bashaka gushyira gahunda yo guha buri mumotari ibimuranga ndetse bakagira amatsinda azwi babarizwamo, mu bitekerezo byatanzwe wumvaga benshi barwanya iki cyemezo.

Umumotari afite uburenganzira bwo gupakira abagenzi babasha kwicara kuri moto ye ndetse hejuru ya byose nta mugenzi wambara ingofero imurinda. Nabajije umumotari wantwaye impamvu badaha abagenzi ingofero zibarinda mu gihe habaye impanuka ambwira ngo ‘ibyo ntabwo biba bikenewe, iy’umushoferi irahagije’.

Abagore, abagabo, abasore n’inkumi, bose usanga bashabika bashakisha abagenzi kuri moto , ziba zigendera ku muvuduko wo hejuru ndetse biragoye ko wabona umupolisi wo mu muhanda wahagaritse moto.

Abatega moto barinzwe n'Imana

Umujyi wa Cotonou ufite imihanda iwuhuza n’indi mijyi yo mu bihugu birimo Nigeria, Togo, Niger, Burkina Faso. Inafite umuhanda wa gari ya moshi mu majyaruguru uyihuza n’Umujyi wa Parakou. Mu buryo bwo gutwara abantu n’ibintu muri uyu mujyi kandi harimo bus nini n’imodoka nto zitwara abagenzi gusa umubare munini utega moto.

Bashyira imbere ibyakorewe iwabo

Ni gake wakumva kuri Radio zo muri Benin bacuranga abahanzi bo mu bindi bihugu, imiziki itambuka kuri radio y’igihugu usanga yiganjemo cyane iy’abahanzi bo muri iki gihugu nabwo abaririmba gakondo, iyo bavanze bacuranga izo muri Congo.

Iyo ushatse kwidagadura mu tubyiniro cyangwa mu nzu z’urunywero, baguhata umuziki w’iwabo, baguha ibyo mu bindi bihugu bakakumvisha iza Papa Wemba, Koffi Olomide, Fally Ipupa n’abandi bahanzi bakunzwe muri Congo. Biragoye kumva imiziki igezweho dusanzwe dukunda mu Rwanda[iyo muri Nigeria, Tanzania, Amerika no mu bindi bihugu] bayicuranga muri Benin.

Mu Kiganiro IGIHE yagiranye n’umuhanzi witwa Kollins wo muri Togo ariko uri mu baharawe muri iki gihe muri Benin, yavuze ko n’iwabo batajya bacuranga iby’ahandi. Ati “Iwacu abagezweho ni Toofan, Magic System […] Imiziki y’ahandi ntabwo abaturage baba bayishaka, abahanzi batera imbere iyo bashyigikiwe mu gihugu.”

Abajijwe impamvu indirimbo ze by’umwihariko iyitwa ‘Ma Préférée’ yakoranye na Chidinma wo muri Nigeria icurangwa cyane kuri Radio zo muri Benin, avuga ko yayikoze irimo umwimerere wo muri Togo no mu muziki w’i Cotonou.

Ati “Nabwo sinavuga ko nzwi hano, abantu bo muri ibi bihugu bacuranga ibyabo, iwacu niko bimeze na Nigeria usanga bacuranga ibyabo gusa.”

Yavuze ko nta byinshi azi ku muziki wa Afurika y’Uburasirazuba, u Rwanda rwo ngo nta mateka baruzimo mu muziki. Mbere y’uko dukorana ikiganiro yari azi ko Eddy Kenzo akomoka mu Rwanda, undi muhanzi azi muri Afurika y’Uburasirazuba ni Diamond abandi ngo ntabwo bazwi muri Afurika y’Uburengerazuba.

Ibyihariye i Cotonou

Umujyi wa Cotonou ubarizwamo bibiri bya gatatu by’inganda z’igihugu, unabarizwamo inzego zikomeye z’igihugu[Minisiteri, Ambasade zikomeye, ibiro bya Perezida], Banki zikomeye niho zibarizwa, ibikorwa bikomeye by’ubucuruzi byose bibarizwa muri Cotonou mu gihe umurwa mukuru w’igihugu ari Porto-Novo.

Benin izwiho guhinga ipamba ndetse ifite inganda nyinshi n’isoko rinini ryo kuyigemuraho no kugurisha ibirivamo. Muri uyu mujyi harimo ibikorwa by’Abadage bakora sima [ HeidelbergCement], unafite isoko mpuzamahanga rikomeye muri Afurika y’Uburengerazuba ryitwa Dantokpa. Muri iri soko hakorerwa ubucuruzi buhuza ibihugu byinshi ku buryo ku munsi ryinjiza inyungu igera kuri miliyari y’amafaranga y’ama CFA[miliyoni 1,5 z’ama euros].

Uyu mujyi kandi ukorerwamo ubucuruzi bw’imodoka ziba zarakoze i Burayi[voitures d’occasions européennes] ari nazo usanga ari nyinshi ku cyambu cya Cotonou. Iki cyambu cya Cotonou kandi gicaho byinshi mu bicuruzwa byo mu bihugu byo muri Afurika y’Uburengerazuba, gifatwa nk’irembo rya mbere rya Benin mu bukungu bw’igihugu.

Icyambu [Port autonome de Cotonou (PAC)] ni cyo mutima w’ubukungu bwa Benin, cyinjiriraho ibigera kuri 90% by’inyungu igihugu kibona mu buhahirane n’amahanga. Ni nacyo cyinjiza amafaranga menshi mu musaruro uva imbere mu gihugu, ubu kigeze kuri 60%.

Iki cyambu gihuza Benin mu by’ubukungu n’ibihugu by’u Burayi, Amerika ya ruguru n’epfo ndetse na Aziya.

Cotonou irangwa n’ubushyuhe bukomeye gusa iyo bigeze mu gihe cy’izuba biba akarusho, iyo hakonje baba bafite 18° C naho mu gihe hashyushye cyane barenze 35° C. Uyu mujyi ukunze kubona imvura nke mu mezi ari hagati ya Mata na Nyakanga, ikongera kuboneka mu Ukwakira.

Kuva mu Ukuboza kugeza muri Mutarama haba hava izuba ryinshi rivanzemo umuyaga ushyushye cyane witwa harmattan. Uyu muyaga uba ushyushye cyane ku manywa naho mu ijoro ukazana ubukonje budasanzwe. Mu bihe by’imvura isenyera abaturage benshi, Cotonou igizwe n’imirambi gusa, nta hantu na hamwe hari agasozi cyangwa akanunga, ahantu hose ni ikibaya, ubutaka burashashe.

Aba bakirisitu nta nkweto bambara
Abagore na bo nta nkweto bambara
Umuhanda uva mu mujyi rwagati werekeza mu mucanga
Iki gihugu kigizwe n'imirambi gusa
Ntiwapfa kubona umugenzi wambaye ingofero
Abacuruza ubuconsho ubasanga mu mujyi hagati ntacyo bikanga
Mu bihe by'imvura hari imihanda imwe irekamo amazi
Uyu mumotari ahetse umugore n'abana be babiri
Ku mucanga ntihajya abanyamafaranga gusa...
Ku mucanga uhasanga abantu mu ngeri zose
Ahari ibiro bya Perezida wa Benin ni mu mujyi rwagati
I Cotonou haba abazunguzayi bacuruza essance, iyo uyiguriye ku muhanda litiro wishyura 300 naho kuri station ukishyura 400
Ni gutya abatwara moto bakora akazi
Mu mujyi rwagati hari isuku
Imashini itunganya amazi iri muri iriya nyubako imeze nk'umutemeri
Kubera ubushyuhe ku manywa abantu baryama hanze
Mu mujyi hari agace kabamo inzu zishaje
Umusigiti munini wa Cotonou uherereye ahitwa Zongo
Inzira yerekeza ku cyambu cya Cotonou
Imiturirwa mishya iracyazamuka
Iyi hoteli icumbikira abanyamafaranga biganjemo abo muri Nigeria baba baje kureba imari yabo ku cyambu
Ecobank iri muri banki zibarizwa muri uyu mujyi
Umuhanda werekeza kuri Paruwasi St Michel i Cotonou
Abazunguzayi baba banyuranamo n'ibinyabiziga
Stade de l'amitie, imwe mu zikomeye i Cotonou
Kuri Paruwasi ya Saint Michel
Iyi nyubako iberamo inama zikomeye muri Benin
Banki y'Isi ikorera hano
Marina Hotel, imwe mu zicumbikira abayobozi bakomeye basura Benin
Ibiro by'ikigo gishinzwe iby'amazi mu gihugu
Ibitaro bikuru bya Cotonou
Hanze y'ikibuga cy'indege
Mbere yo kwinjira mu kibuga cy'indege
Ahagenewe abarwaniye intambara yo guharanira ubusugire bwa Benin mu 1977
Place de l'Etoile Rouge, hamwe mu hasurwa cyane i Cotonou
Umuhanda w'indege mu kibuga cya Cotonou
Cotonou uyirebeye hejuru y'inyanja ya Atlantic

Amafoto: Murungi Sabin/Cotonou-Benin


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved