Kwamamaza

Impuguke eshatu za Loni zangiwe gukandagiza ikirenge i Burundi

Yanditswe kuya 11-10-2016 saa 10:36' na Niyonsenga Schadrack


Leta y’u Burundi yangiye abakozi batatu b’Umuryango w’Abibumbye bakora iperereza kwinjira mu gihugu nyuma y’uko basohoye raporo ishinja leta kubangamira uburenganzira bwa muntu.

Raporo aba bagenzuzi baherutse gusohora mu kwezi gushize, yagaragazaga ko kuva aho imvururu za politiki zitangiriye mu Burundi muri Mata 2015, hari abantu benshi bakorewe iyicarubozo, bamwe bakorerwa ihohoterwa rishingiye ku gitsina naho abandi baburirwa irengero.

Muri iyo raporo kandi aba bagenzuzi ba Loni bari bagaragaje impungenge ko mu Burundi hashobora kuvuka Jenoside mu gihe imvururu zaba zikomeje kwiyongera.

Iki cyemezo cyo gukumira aba bagenzuzi, gifashwe nyuma y’uko Leta y’u Burundi itangaje ko igiye kwivana mu Rukiko Mpuzamahanga Mpanabyaha (ICC).

Ku wa 6 Ukwakira 2016, nibwo Visi-Perezida w’iki gihugu, Gaston Sindimwo, yatangarije Inama y’Abaminisitiri ko bamaze kohereza ubusabe mu Nteko Ishinga Amategeko basaba ko u Burundi bwava mu rukiko rwa ICC.

Sindimwo yagize ati “Twamaze kohereza uyu mushinga mu Nteko ngo iwemeze, twasanze ari ngombwa ko tuvamo kugira ngo turusheho kwigenga."

Ibi kandi bikozwe nyuma y’uko ku wa Gatandatu w’icyumweru gishize, abaturage b’u Burundi cyane abatuye mu Mujyi wa Bujumbura, bakoze imyigaragambyo imbere y’ibiro by’Umuryango w’Ubumwe bw’u Burayi n’iby’ishami ry’Umuryango w’Abibumbye riharanira uburenganzira bwa muntu muri iki gihugu, bamagana icyemezo cy’Umuryango w’Abibumbye cyo gukora iperereza ku bayobozi cyangwa abandi bashamikiye ku butegetsi bwa Nkurunziza bakoze ibyaha by’iyicarubozo no guhungabanya uburenganzira bwa muntu.

BBC dukesha iyi nkuru yanditse ko Minisitiri w’Ububanyi n’Amahanga mu Burundi, Alain Aimé Nyamitwe, yashyize umukono ku ibaruwa ivuga ko abagabo barimo Umunya-Colombia Pablo de Greiff,Umunya-Afurika y’Epfo Christof Heyns ndetse n’umunya-Algeria Maya Sahli-Fadel, batemerewe kongera gukandagira ku butaka bw’iki gihugu.

Gusa ku wa Mbere, tariki ya 10 Ukwakira 2016, Stephane Dujarric, Umuvugizi w’Umuryango w’Abibumbye, yagiriye inama u Burundi yo gukomeza gukorana n’abagenzuzi ba LONI.

Yagize ati "Ni ingenzi cyane ko u Burundi n’ibindi bihugu bikorana n’amashami ya Loni yita ku burenganzira bwa muntu ku buryo bwuzuye, burimo no gukorana n’abayahagarariye.”

Leta y’u Burundi yatangaje ko igiye kwikura mu muri ICC nyuma y’amezi atandatu uru rukiko rutangaje ko ruzakora iperereza ku mvururu zikomeje kuba muri iki gihugu.

Umuryango w’Ubumwe bwa Afurika, nawo ntiwahwemye kugaragaza ko ICC yitwara nabi ku bayobozi bo kuri uyu mugabane, bavuga ko isa n’iyawibasiye.

Imvururu mu Burundi zatangiye mu mwaka wa 2015 ubwo Perezida Pierre Nkurunziza yemezaga ko aziyamamariza manda ya gatatu nk’Umukuru w’Igihugu. Kuva icyo gihe Abarundi barenga 500 barapfuye kubera izo mvururu n’aho abarenga ibihumbi 270 barahunga.

Aimé Nyamitwe yashimangiye ko izi ntumwa za Loni batazishaka i Burundi
Iki cyemezo gifashwe nyuma y'uko abaturage bigaragambije bamagana iperereza Loni ivuga ko izakorera mu Burundi

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 15 Ugushyingo 2016
Copyright © 2009 -2014 - IGIHE Ltd - All Rights Reserved