Kenya: Daniel arap Moi yategetswe kwishyura arenga miliyoni $10 umupfakazi yambuye ubutaka

Yanditswe na Habimana James
Kuya 18 Gicurasi 2019 saa 09:48
Yasuwe :
0 0

Urukiko muri Kenya rwategetse ko uwahoze ari Perezida wa Kenya Daniel arap Moi, yishyura amashilingi miliyari 1.06, ahwanye na miliyoni $10.5 nk’impozamarira ku mugore w’umupfakazi yambuye ubutaka.

Moi yashinjwe kuba yarihaye ubutaka bungana na hegitari 21 zari iz’umugore witwa Susan Cheburet Chelugui.

BBC yatangaje ko ubu butaka bwajyanywe mu myaka 36 ishize ariko buza kwandikwa mu izina rya Moi mu 2007.

Noah Chelugui wari umugabo wa Susan Cheburet Chelugui yari asanzwe ari umuyobozi mu nzego z’ibanze ku butegetsi bwa Moi.

Chelugui n’umuhugu we David Chelugui bashyize Moi mu nkiko, bamushinja ko ubwo umugabo we yitabaga Imana, nyuma y’imyaka ibiri gusa uyu wari umukuru w’igihugu yabambuye ubutaka bwabo.

Hari amakuru avuga ko Moi akimara kwigarurira ubu butaka yahise abugurisha ikigo cyitwa Rai Plywood Limited gisanzwe gitunganya imbaho.

Iki kigo cyo cyabwiye urukiko ko cyaguze ubu butaka kuri Moi mu 2007 biciye mu nzira zubahirje amategeko, gusa Moi yananiwe kwerekana ibimenyetso bigaragaza uko yigaruriye ubu butaka.

Umucamanza Anthony Ombwayo yavuze ko ibyo Moi yakoze binyuranye n’amategeko n’Itegeko Nshinga.

Moi yabaye Perezida wa Kabiri wa Kenya mu 1978-2002, ni we wabaye umukuru w’igihugu wamaze igihe kirekire ku butegetsi.

Yashinjwe guhonyora uburenganzira bwa muntu ku butegetsi bwe ndetse bitewe n’igitutu cy’amahanga, yaje kwemera ko haba amatora ahuriweho n’amashyaka atandukanye mu 1992, nubwo nayo yaranzwemo n’imvururu no kwiba amajwi.

Kenya yugarijwe n’ikibazo cy’ubutaka aho usanga bwarigaruriwe n’abayobozi bakomeye, abakora muri leta n’abafite amafaranga menshi; abambuwe ibyabo ntibashobore kubona ubushobozi bwo kubigaruza mu nkiko kubera ruswa irangwamo.

Ibyabaye kuri Moi ngo bishobora gutanga ubutumwa ko n’abafite imbaraga badashobora kujyana ubutaka bw’abatishoboye uko babishatse.

Daniel arap Moi wayoboye Kenya mu myaka yo hambere yategetswe kwishyura arenga miliyoni $10 umupfakazi yambuye ubutaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza