Kenya: Ibitaro byitiriwe Kenyatta biravugwamo gufatwa ku ngufu kw’abagore bamaze kubyara

Yanditswe na Mukaneza M.Ange
Kuya 19 Mutarama 2018 saa 06:33
Yasuwe :
0 0

Abanya-Kenya batandukanye bakoresha imbuga nkoranyambaga, bakomeje kwibaza ukuri ku makuru avuga ko hari itsinda rikomeje gufata ku ngufu abagore bamaze kubyara ndetse n’abonsa baba bagiye kwivuriza mu bitaro byitiriwe Kenyatta.

Aya makuru yasakaye nyuma y’uko uwitwa Mildred Owiso yanditse ku rubuga rwa Facebook rw’itsinda “Buyer Beware”, avuga ko ibitaro bya KNH (Kenyatta National Hospital) bimaze kuba isibaniro ry’ibyaha bitandukanye birimo gufata ku ngufu abagore n’ubujura.

Mu nyandiko ye yakomeje avuga ko yahuye n’umugore warwanyije umuntu washakaga kumufata ku ngufu ubwo yari mu cyuma kigeza abantu mu magorofa atandukanye y’iri vuriro.

Uyu mugore watabawe no kuvuza induru ngo yerekezaga mu cyumba kiryamishwamo abana bamaze kuvuka kiri mu igorofa rya gatatu.

Abandi baba muri ririya tsinda na bo bavuze ibyo bagiye babona muri iri vuriro, birimo uburyo abakora mu buruhukiro iyo bahuye n’abagore bafite umurambo bawambika ubusa, ndetse rimwe na rimwe bagashaka kubafata ku ngufu.

Umwe mu barwayi baganiriye na Nation yavuze ko hari uwo azi wari uharwariye nyuma akaza gufatwa ku ngufu ndetse bikamuviramo urupfu.

Iki kinyamakuru ariko nticyabashije kugenzura neza ukuri kw’ibyatangajwe n’uyu murwayi wanze kuvuga amazina ye kubera umutekano we.

Ni mu gihe ariko abakozi batandukanye bakora muri ibi bitaro bahakanye ibyanditswe kuri Facebook, bavuga ko nta kibazo na kimwe kiragaragara, ndetse batiyumvisha uburyo igikorwa nk’iki cyabera ahantu hahora urunyurane rw’abantu.

Minisitiri w’Ubuzima muri Kenya, Cleopa Kilonzo Mailu, yahise asaba abayobozi b’ibi bitaro gukora iperereza kuri ibi birego, ndetse bagasaba inzego z’umutekano kurushaho kurinda abarwayi n’abarwaza ndetse n’abaje kubasura.

Ibizava muri iri perereza bizashyirwa hanze ku itariki ya 23 Mutarama 2018.

Ibitaro byitiriwe Kenyatta byashyizwe mu majwi bivugwa ko abagore bamaze kubyara babifatirwamo ku ngufu
Umuyobozi wa Kenyatta National Hospital, Lily Koros aganira na Minisitiri w’Ubuzima muri Kenya, Cleopa Kilonzo Mailu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza