Kenya ishobora kwamburwa kwakira imikino ya nyuma ya CHAN

Yanditswe na Cyprien Niyomwungeri
Kuya 17 Kamena 2017 saa 05:47
Yasuwe :
0 0

Impuzamashyirahamwe y’umupira w’amaguru ku mugabane wa Afurika (CAF), yaciye amarenga ko Kenya ishobora kwamburwa kwakira imikino ya nyuma y’igikombe cy’uyu mugabane gikinwa n’abakinnyi bakina imbere mu bihugu byabo (CHAN), kubera amasitade atameze neza.

Mu kiganiro n’abanyamakuru cyo kuri uyu wa Gatandatu cyabereye kuri Moi International Sports Centre, Kasarani, Visi Perezida wa kabiri wa Caf, Constant Omari, yasobanuye ko mu gihe Kenya yananirwa gutunganya amasitade yayo biteguye gushaka ikindi gihugu cyakira iriya mikino.

Omari usanzwe ayobora ishyirahamwe ry’umupira w’amaguru muri Repubulika Iharanira Demokarasi ya Congo, yari uyoboye itsinda ryagenzuraga uko Kenya yiteguye kwakira CHAN ibura amezi atandatu ngo itangire, yaburiye iki gihugu agira ati “Dufite uburyo bwa B (kabiri), ni uburyo busanzwe, iyo habonetse ikibazo, Caf ihora yiteguye gushyira irushanwa ahandi.”

Daily Nation itangaza ko itsinda riyobowe na Omari ritanyuzwe n’uko Kenya irimo gutegura Chan, kuko mu masitade atanu agomba kwakira imikino y’iri rushanwa nta n’imwe irageza ku gipimo gikenewe yaba ku birebana n’umutekano n’ibindi nkenerwa.

Umuyobozi w’ishyirahamwe ry’umupira w’amaguru muri Kenya, Nick Mwendwa, yatangaje ko Caf yabanenze amasitade ariko nta kibazo ifite ku bijyanye n’amahoteli, gutwara abantu n’abakozi.

Yagize ati “Sitade ya Kasarani iri i Nairobi na Kinoru iri Meru zarakozwe nubwo zitararangira. Twabonye ibibazo bikomeye kuri sitade za Kenyatta iri Machakos, Nyayo iri Nairobi na Kip-Keino iri Eldoret.”

Umunyamabanga wa Leta ushinzwe siporo, Hassan Wario, yemeye ko Guverinoma yakererewe gutanga amafaranga yo gusana amasitade.

Yagize ati “Mu by’ukuri Kenya irashaka kwakira irushanwa kuko Abanya-Kenya bakunda umupira w’amaguru. Icyo dutegereje ni umwaka wacu w’ingengo y’imari uzatangira mu kwezi gutaha. Nimugaruka (Caf) mu Ugushyingo, muzasanga dusa n’abiteguye.”

Kenya yambuwe kwakira Chan, ishobora kwakirwa na Maroc cyangwa Côte d’Ivoire kuko byamaze kugaragaza ko bibyifuza. Ibi kandi byakurikirwa n’ibihano kuko yahita icibwa amande ndetse igahagarikwa mu marushanwa yose ya Caf imyaka ine.

Ntabwo byaba ari ubwa mbere inaniwe kwakira amarushanwa kuko no mu 1996 bagombaga kwakira igikombe cya Afurika cy’Ibihugu (CAN), ku munota wa nyuma gihabwa Afurika y’Epfo.

Amarushanwa ya CHAN aheruka yakiriwe n’u Rwanda agenda neza yegukanwa na Repubulika iharanira Demokarasi ya Congo (RDC), ku bitego bibiri bya Elia Mechak na kimwe cya Jonathan Bolinga Mpangi ku busa bwa Mali, bituma Les Leopards yegukana iki gikombe ku nshuro ya kabiri.

isi Perezida wa kabiri wa Caf, Constant Omari(ibumoso), yasobanuye ko mu gihe Kenya yananirwa gutunganya amasitade yayo biteguye gushaka ikindi gihugu cyakira iriya mikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza