Kenya: Kenyatta yashyigikiye umwanzuro wo kugabanya imishahara irimo n’uwa Perezida

Yanditswe na Mukaneza M.Ange
Kuya 11 Nyakanga 2017 saa 07:35
Yasuwe :
0 0

Perezida wa Kenya, Uhuru Kenyatta, yatangaje ko ashyigikiye byimazeyo umwanzuro wafashwe na Komisiyo ishinzwe ibijyanye n’imishahara ( SRC) wo kugabanya umushahara ugenerwa abadepite n’abandi bayobozi barimo n’Umukuru w’igihugu.

Kuwa Mbere nibwo byatangajwe ko umushahara ugenerwa umudepite uzagabanywa kugera kuri 15%, ukava ku 7200 by’amadolari y’Amerika ukagera ku 6 100 $.

Umushahara wa Perezida ugomba kuva ku bihumbi 16 $ ukagera ku bihumbi 14 $ naho imishahara y’abaminisitiri n’abanyamabanga ba Leta ikava ku 10,560 $ ukagera 9 240 $.

Kuri uyu wa Kabiri Perezida Kenyatta yatangaje ko ashyigikiye iki cyemezo kigamije kugabanya ingengo y’imari igenerwa imishahara y’abakozi ba leta no kurushaho gukoresha neza umutungo w’igihugu.

Nk’uko The Nation dukesha iyi nkuru yabyanditse, Kenyatta yasabye Abanyakenya gushyigikira uyu mwanzuro wa SRC kuko uzagira uruhare mu kuzigama agera kuri miliyari umunani z’Amashilingi ya Kenya yagendaga ku mishahara n’ibindi byagenerwaga abayobozi bakuru mu nzego za leta.

Si Kenyatta wakiriye neza iki cyemezo cyo kugabanya imishahara y’abayobozi n’abakozi mu nzego zitandukanye za Leta kuko n’Ikigo cy’igihugu gishinzwe ubucuruzi cyabyishimiye ariko gisaba SRC kugaragaza n’ibizajya bigenerwa abakozi ba za komisiyo zitandukanye.

Depite w’agace ka Budalang’I, Ababu Namwamba, nawe yashimye iki cyemezo, avuga ko n’ubundi uyu mwanzuro wari waratinze kuko wasangaga imishahara y’abakozi ba leta yiharira 52% by’umusaruro mbumbe w’igihugu, bigatuma izindi gahunda z’iterambere zidindira.

Iyi mishahara mishya izatangira gukurikizwa nyuma y’amatora ya Perezida ateganyijwe tariki ya 8 Kanama 2017.

Perezida wa Kenya, Uhuru Kenyatta

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza