Kofi Annan yibukije ibyabaye mu Rwanda asaba ko kuva muri ICC byitonderwa

Yanditswe na Kanamugire Emmanuel
Kuya 22 Ugushyingo 2016 saa 01:22
Yasuwe :
0 0

Uwigeze kuba Umunyamabanga Mukuru w’Umuryango w’Abibumbye, Kofi Annan, yavuze ko inkundura yo kwivana mu rukiko mpuzamahanga mpanabyaha, ICC, kw’ibihugu bya Afurika igomba guhagarikwa, kugirango hacike umuco wo kudahana abakora ibyaha by’ubwicanyi kuri uwo mugabane.

Kofi Annan umwe mu bashyizeho ruriya rukiko ubwo yayoboraga Umuryango w’Abibumbye, yabivuze nyuma y’uko u Burundi, Afurika y’Epfo na Gambia biteye intambwe ikomeye yo kwivana muri ICC, bashingiye ko urwo rukiko rwibasira cyane Abanyafurika rukirengagiza ab’ahandi baba bakoze ibyaha rushinzwe kuburanisha. Mu birego 10 byashyikirijwe ICC harimo icyenda by’Abanyafurika.

Mu nyandiko yanyujije muri The Guardian, Annan yagarutse ku cyemezo cya biriya bihugu avuga ko gishobora kugira ingaruka ku mugabane wose bigatuma wiyemeza guca ukubiri na ruriya rukiko, asaba ko byitonderwa cyane.

Ati “Guverinoma nyinshi ku mugabane wa Afurika zishyigikiye ICC kuko zemera ko ibyaha byinshi birimo ubwicanyi bigomba guhanwa.”

Kofi Annan akomeza yibutsa ibyabaye mu Rwanda muri Jenoside yakorewe Abatutsi bikwiye kubera isomo amahanga, agashyigikira ko umuco wo guhana abagize uruhare mu bwicanyi ubwo aribwo bwose wimakazwa.

Yagize ati “Afurika yari ikeneye inashyigikiye ruriya rukiko. Mu bitekerezo byacu harimo cyane amahano yabaye mu Rwanda mu gihe cya Jenoside.”

Akomeza avuga ko hakwiye kuzirikanwa ko igihugu cya mbere cyasinye kuri ariya masezerano ari Senegal, bityo Afurika igatera intambwe yo kugira ibihugu 34 mu 124 byasinye amasezerano ya Roma ashyiraho ICC, rukorera i La Haye mu Buholandi.

Muri iyo nyandiko Annan avuga ko ibikorwa bya ICC kuri Afurika bitagaragaramo kubogama ko ahubwo bigaragaza ubushake bwa Afurika bwo kuyigezaho ibirego by’abo ikurikirana.

Ati “Mu maperereza icyenda rwakoze kuri Afurika, umunani rwari rwabisabwe n’ibihugu bya Afurika. Ibihugu bya Afurika bitandatu byigereje ibibiberamo muri ICC, ibindi bitora ko ku bufatanye n’akanama ka Loni gashinzwe umutekano rwakoherezwa muri Darfur na Libya.”

“Dosiye ya Kenya niyo yonyine ruriya rukiko rwatangije ku bwarwo ariko rwafatanyije bikomeye cyane n’Abanya-Kenya. Bashakaga ubutabera bw’abantu babo 1300 bishwe abandi ibihumbi bakava mu byabo bitewe n’imvururu za nyuma y’amatora.”

Annan avuga ko Afurika atariwo mugabane gusa uba mu mboni z’ubutabera mpuzamahanga, ko ahubwo arirwo rukiko rufitiwe icyizere n’ubushobozi bwo kuburanisha ibyaha bikomeye inkiko z’ibihugu zidashobora kuburanisha.

Ibitekerezo bya Annan bikaba bizigwaho mu nama izahuza ibihugu byose byasinye ku masezerano ashyiraho urukiko rwa ICC.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza