Leta y’u Burundi irashyirwa mu majwi ku kwica Imbonerakure zikekwaho kuzatanga ubuhamya muri ICC

Yanditswe na Herve Ugirumukunda
Kuya 1 Ukuboza 2017 saa 02:24
Yasuwe :
0 0

Bamwe mu Imbonerakure, urubyiruko rw’ishyaka riri ku butegetsi mu Burundi, CNDD FDD, biravugwa ko batangiye kwicwa kugira ngo Leta y’icyo gihugu irebe ko yarokoka iperereza ry’Urukiko Mpuzamahanga Mpanabyaha, ICC.

Inkuru dukesha Ibiro Ntaramakuru by’Abanyamerika, Associated Press, ivuga ko abicwa ni abatagaragaza amatwara akarishye yo gushyigikira Perezida Nkurunziza, ku buryo bashobora kuzamenera abakozi ba ICC amabanga babitse ku bwicanyi bwakozwe hagati ya 2015 na 2017.

Vanessa Kaneza, wahungiye mu Rwanda avuga ko yari Imbonerakure akaza kubivamo, umugabo we akabikomeza ariko akaba yarishwe kugira ngo ‘atazatatira igihango.’

Yagize ati “Narasengaga buri munsi ngo umugabo wanjye nawe ave mu byo guhiga abantu ariko sinari mufiteho ububasha, ubu yarapfuye urupfu rwe ndaruryoza Perezida [Nkurunziza].

Avuga ko umugabo witwa Aime Manirakiza yahoze ku rugerero, nyuma aba Imbonerakure.

Yakoreye cyane ahitwa i Musaga mu Mujyi wa Bujumbura aho Imbonerakure zagaragaye zirasa abigaragambya basaba ko Nkurunziza atakwiyamamariza manda ya Gatatu muri 2015.

Kuva muri Gicurasi Manirakiza w’imyaka 40 yarabuze, umugore we Kaneza ahungira mu Rwanda, nyuma aza kubwirwa ko yishwe na bagenzi be b’Imbonerakure ku mategeko avuye hejuru.

Impirimbanyi y’Uburenganzira bwa Muntu, Pierre Claver Mbonimpa, yatangaje ko muri iki gihe ICC yatangaje ko igiye gukora iperereza ku bwicanyi mu Burundi, abicwa bashobora kuziyongera.

ICC ivuga ko izakora iperereza ku byaha byakozwe na Leta ya Nkurunziza birimo ubwicanyi, gufata ku ngufu n’iyicarubozo.

Kuba abatangabuhamya batangiye kuburirwa irengero, ngo bishimangira ibivugwa na Guverinoma y’u Burundi ko izitambika iperereza ry’urwo rukiko ariko bigahishura ko itewe ubwoba n’uko rizaba dore ko yari yamaza no kwivana muri urwo rukiko yibwira ko birangiriye aho.

Umwe mu barwanya Leta y’u Burundi, Pacifique Nininahazwe, avuga ko mu myaka ibiri ishize ababuriwe irengero barimo abanyapolitiki bo mu mashyaka atandukanye, abanyamakuru, ba maneko, abapolisi, abasirikare n’abasivili.

Nta muyobozi ku ruhande rw’u Burundi wigeze ashaka kugira icyo avuga kuri aya makuru kuko abajijwe bose batasubije.

Leta y’u Burundi irashyirwa mu majwi ku kwica Imbonerakure zikekwaho kuzatanga ubuhamya muri ICC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza